មុននេះ មានរថយន្តស៊ីរ៉ែនជាច្រើនគ្រឿងបានមកយកអ្នកជំងឺកូវីដ១៩ ដែលត្រូវបានរកឃើញនៅក្នុងរោងចក្រ ហ្គ្រេន ធ្វីន ដែលជាអតីតរោងចក្រ QMI ស្ថិតនៅក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ បង្កឱ្យមានការភ្ញាក់ផ្អើលយ៉ាងខ្លាំង
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា មុននេះ មានរថយន្តស៊ីរ៉ែនជាច្រើនគ្រឿងបានមកយកអ្នកជំងឺកូវីដ១៩ ដែលត្រូវបានរកឃើញនៅក្នុងរោងចក្រ ហ្គ្រេន ធ្វីន ដែលជាអតីតរោងចក្រ QMI ស្ថិតនៅក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ បង្កឱ្យមានការភ្ញាក់ផ្អើលយ៉ាងខ្លាំងដល់កម្មករ កម្មការិនី នាល្ងាចថ្ងៃទី០៦ ខែមិថុនា ឆ្នាំ២០២១នេះ ខណៈពេលផ្ទុះវិជ្ជមានកូវីដ១៩ នៅក្នុងរោងចក្រ ហ្គ្រេន ធ្វីន អ៊ិនធើរណេសិនណល (ខេមបូឌា) ភីអិលស៊ី ដែលត្រូវបានក្រុមគ្រូពេទ្យចុះមកយកសំណាកធ្វើតេស្តរហ័ស ហើយក៏រកឃើញកម្មករជាច្រើននាក់កើតកូវីដ់១៩ និងនៅក្នុងចំណោមកម្មករប្រមាណជាង៣ពាន់នាក់ ក៏ត្រូវបានក្រុមគ្រូពេទ្យកំពុងធ្វើការត្រួតពិនិត្យបណ្តើរៗហើយ។
សេចក្តីរាយការណ៍បានបន្តថា ហេតុការណ៍ខាងលើនេះ បង្កឱ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋនៅតាមដងផ្លូវ ខណៈពេលដែលឃើញរថយន្តស៊ីរ៉ែនជាច្រើនគ្រឿងបានឆ្លងកាត់នៅតំបន់រោងចក្រខាងលើនេះទៅមកទៅមក ក្រោយពេលតេស្តរកឃើញកម្មករ កម្មការិនីជាច្រើននាក់កើតកូវីដ១៩ ។
ពាក់ព័ន្ធនឹងករណីរកឃើញកម្មករ កម្មការិនីជាច្រើនកើតកូវីដ១៩នេះ នៅមិនទាន់ច្បាស់ពីចំនួនកម្មករឆ្លងកូវីដនៅឡើយនោះទេ ខណៈក្រុមគ្រូពេទ្យកំពុងធ្វើតេស្តរហ័សទៅលើក្រុមកម្មករ កម្មការិនីរោងចក្រខាងលើពេញមួយថ្ងៃហើយ មិនទាន់បានពាក់កណ្តាលនោះទេ។
គួរបញ្ជាក់ផងដែរថា បើប្រភពពីកន្លែងកើតហេតុបានរៀបរាប់ចំនួនកម្មករដែលកើតកូវីដនោះ ដោយមានកម្មករខ្លះនិយាយថា រកឃើញកម្មករកើតកូវីដប្រមាណជិត១០០នាក់ តែខ្លះទៀតថា រកឃើញជាង៧០នាក់ និងខ្លះទៀតថា ជាង៤០នាក់ ។ ហើយអ្វីដែលជាការកត់សម្គាល់ទៀតនោះ រហូតមកដល់ពេលនេះ ធ្វើឱ្យមានការព្រួយបារម្ភពីហានិភ័យយ៉ាងខ្លាំង ព្រោះថាក្នុងការត្រួតពិនិត្យរយៈពេលមួយថ្ងៃនេះ គឺមិនទាន់បានពាក់កណ្តាលផង ធ្វើឱ្យកម្មករជាច្រើននាក់មានការជ្រួលច្របល់ ហើយកម្មករកម្មការិនីខ្លះក៏នាំគ្នាដើរចេញពីរោងចក្រពេញដងផ្លូវ និងដើរត្រឡប់ទៅបន្ទប់ជួលវិញផងដែរ ។
គួរបញ្ជាក់ទៀតថា ក្នុងចំណោមអ្នកជំងឺទាំងអស់ដែលរកឃើញខាងលើនោះ ក៏មានស្ត្រីមានផ្ទៃជិតសម្រាលកូនចំនួន៣នាក់ផងដែរ ហើយរហូតមកល្ងាចម៉ោងជិត៥នេះ រថយន្តដែលដឹកកម្មករកើតកូវីដ១៩នោះ បានចេញពីរោងចក្រចំនួន៧រថយន្តហើយដោយក្នុងរថយន្តមួយគ្រឿងខ្លមានដឹកកម្មករ៩នាក់ និងខ្លះទៀតដឹកកម្មករ១០នាក់ក៏មាន ចំណែកឯកម្មករ កម្មការិនីជាច្រើនទៀតនៅតែតម្រង់ជួរដើម្បីយកសំណាកដដែល នៅមិនទាន់ចប់នៅឡើយទេ។
ព័ត៌មានលំអិតនឹងមានផ្សាយជូននៅពេលក្រោយ។
ចែករំលែកព័តមាននេះ