ខេត្តសៀមរាប ៖ មន្ដ្រីយោធាបម្រើការក្នុងអង្គភាពកងវិស្វកម្មរបស់យោធភូមិភាគ៤ ប្រចាំការនៅតំបន់អូរកូនតឹង ឃុំស្រែណូយ ស្រុកវ៉ារិន ម្នាក់ បានត្រូវគ្រាប់កាំភ្លើងធ្លាយពោះបណ្ដាលឱ្យស្លាប់បាត់បង់ជីវិត កាលពីវេលាម៉ោងប្រមាណ ១០និង៣០នាទីយប់ថ្ងៃទី២៦ មីនា ខណៈប្ដីប្រពន្ធជាយោធានៅអង្គភាពជាមួយគ្នាពីរនាក់ផ្សេងទៀត បានផឹកស្រាស្រវឹង ហើយឈ្លោះប្រកែកគ្នាជាពាក្យសំដីរហូតទាញកាំភ្លើងគំរាមបាញ់ ហើយជនរងគ្រោះចូលទៅឃាត់ក៏កើតមានការប្រទូស្ដរ៉ាយដណ្ដើមកាំភ្លើងគ្នាទៅវិញទៅមកធ្វើឱ្យមានការផ្ទុះកើតឡើង។
នាយសេនាធិការវរកងវិស្វកម្មយោធភូមិភាគ៤ ប្រចាំការនៅតំបន់អូរកូនតឹង លោកអនុសេនីយ៍ឯក សូរ ស៊ុន កាលពីរសៀលថ្ងៃទី២៧ មីនា បានថ្លែងប្រាប់តាមទូរស័ព្ទថា ជនរងគ្រោះក្នុងហេតុការណ៍នោះឈ្មោះឈិន លីអ៊ី ភេទប្រុស អាយុប្រហែល២៨ទៅ២៩ឆ្នាំ មានស្រុកកំណើតនៅភូមិគោកមន្ដ ឃុំដានរុន ស្រុកសូទ្រនិគម ខេត្ដសៀមរាប ជាយោធាឋានៈព្រិន្ទបាលឯកបានត្រូវរបួសត្រង់ពោះ ហើយដាច់ខ្យល់ស្លាប់ក្រោយពីដឹកតាមរថយន្ដទៅសង្គ្រោះបានពាក់កណ្ដាលផ្លូវ។ ដោយឡែកយោធាបង្កហេតុមានឈ្មោះឡេន ញិន ឋានៈព្រិន្ទបាលឯកបម្រើការនៅក្នុងអង្គភាពវរកងវិស្វកម្មដូចគ្នា ។
លោកអនុសេនីយ៍ឯកបានបញ្ជាក់ថា ជនរងគ្រោះនិងជនបង្កហេតុទាំងពីរនាក់នោះមិនមានគំនុំអ្វីនឹងគ្នាទេពីមុនមក ប៉ុន្ដែនៅយប់កើតហេតុប្រពន្ធរបស់ឡេន ញិន បានផឹកស្រាស្រវឹង ហើយប្ដីគាត់បានហាមមិនស្ដាប់ ក៏កើតការឈ្លោះទាស់ទែងគ្នានិងទាញកាំភ្លើងគំរាមបាញ់។ ខណៈនោះជនរងគ្រោះដែលនៅក្បែរនោះក៏ចូលទៅឃាត់បណ្ដាលឱ្យកើតការប្រទូស្ដរ៉ាយដណ្ដើមកាំភ្លើងគ្នាទៅវិញទៅ ស្រាប់តែផ្ទុះមួយគ្រាប់ត្រូវជនរងគ្រោះត្រង់ពោះតែម្ដង។លោកបន្ដថា ក្រោយពីកើតហេតុភ្លាមៗជនរងគ្រោះត្រូវបានដឹកបញ្ជូនតាមរថយន្ដទៅសង្គ្រោះនៅមន្ទីរពេទ្យ ប៉ុន្ដែដោយសារគ្រាប់កាំភ្លើងបានត្រូវចំចំណុចសំខាន់ជនរងគ្រោះក៏ដាច់ខ្យល់ស្លាប់នៅតាមផ្លូវ ។
បច្ចុប្បន្នសពជនរងគ្រោះត្រូវបានបញ្ជូនតាមរថយន្ដទៅប្រគល់ឱ្យក្រុមគ្រួសារធ្វើបុណ្យតាមប្រពៃណី ដោយឡែកមន្ដ្រីយោធាដែលជាជនបង្កហេតុត្រូវបានសាមីអង្គភាពចាប់ខ្លួនបញ្ជូនទៅឱ្យសមត្ថកិច្ចនគរបាលខេត្ដសៀមរាបកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការទៅតាមផ្លូវច្បាប់៕
ចែករំលែកព័តមាននេះ