រាជធានីភ្នំពេញ ៖ អ្នករត់ផាស់អាប់មួយចំនួនបាននាំគ្នាយកផ្លូវសាធារណៈធ្វើជាផ្ទះសម្រាប់សម្រាកនាពេលយប់ដោយសារតែជំងឺកូវីដ១៩ បានវាយលុកកម្ពុជាយ៉ាងខ្លាំងក្លាតាមរយៈការឆ្លងសហគមន៍ ជាពិសេសនៅរាជធានីភ្នំពេញ។ បញ្ហានេះហើយ បានធ្វើឲ្យប៉ះពាល់យ៉ាងធ្ងន់ធ្ងរដល់ជីវភាពប្រចាំថ្ងៃរបស់បងប្អូនដែលប្រកបមុខរបររត់ផាស់អាប់ ត្រូវបង្ខំចិត្តនាំគ្នាដេកតាមផ្លូវសាធារណៈ មិនហ៊ានជួលផ្ទះគេស្នាក់នៅ ហើយខ្លះទៀតបានឲ្យប្រពន្ធកូនវិលទៅស្រុកកំណើតផងដែរ។
លោក ថង ប៊ុនសួ អាយុ៤៥ឆ្នាំ មានស្រុកកំណើតនៅស្រុករមាសហែក ខេត្តស្វាយរៀង ដែលកំពុងតែយកទឹកលុបមុខទាំងព្រលឹមស្រាងៗ បានរៀបរាប់ឲ្យដឹងថា ៖ គាត់បានមកដេកលើផ្លូវសាធារណៈខាងលិចរូបសំណាក់សម្តេចសង្ឃជួនណាត ស្ថិតក្នុងសង្កាត់ចតុមុខ ខណ្ឌដូនពេញ បន្ទាប់ពីមានការកើតជំងឺកូវីដ១៩ ពីមួយថ្ងៃទៅមួយថ្ងៃ ហើយមិនថមថយនោះ ។ កត្តានេះហើយ វាបានប៉ះពាល់ដល់មុខរបររត់ផាស់អាប់ ភ្ញៀវគេមិនសូវជិះដោយខ្លាចរអាក្នុងការឆ្លងជំងឺកូវីដ១៩ តើរកលុយឯណាយកមកជួលបន្ទប់ស្នាក់ជួបជុំគ្រួសារ?
លោក ថង ប៊ុនសួ បន្តថា ដោយសារតែព្រឹត្តិការសហគមន៍២០កុម្ភៈនេះហើយ គាត់ត្រូវបង្ខំចិត្តឲ្យប្រពន្ធកូនវិលទៅស្រុកកំណើតវិញ រួចគាត់ឈប់ជួលបន្ទប់ស្នាក់នៅ បែរជាមកយកផ្លូវសាធារណៈធ្វើជាផ្ទះ ទោះជាពេលយប់មានភ្លៀង ព្យុះបក់បោកម្តងកាលក៏ដោយ ប្រសើរជាជាងជំពាក់ថ្លៃជួលបន្ទប់គេដែរ ។
លោកប៊ុនសួ បានបញ្ជាក់ថា ៖ មិនមែនមានតែគាត់ទេ ដែលដេកនៅទីតាំងខាងលើ គឺមានបងប្អូនរត់ផាស់អាប់ជាច្រើនអ្នកទៀ តក៏នាំគ្នាមកសម្រាកនៅទីតាំងខាងលើមិនតិច១០០ផាស់អាប់ទេ ដែលសម្រាកនៅពេលយប់ លុះព្រលឹមស្រាងៗទើបនាំគ្នាចាក់ចេញតាមគោលដៅរៀងៗខ្លួន ។
លោកអ៊ុំ មាស យ៉ន អាយុជាង៦០ឆ្នាំ ជាអតីតយោធាចូលនិវត្តន៍ មានស្រុកកំណើតនៅស្រុកកំពង់ស្វាយ ខេត្តកំពង់ធំ បាននិយាយថា ៖ គាត់បានខ្ចីលុយពីអង្គការមួយក្នុងស្រុកកំពង់ស្វាយ យកមកទិញផាស់អាប់រត់ ដើម្បីដោះស្រាយជីវភាពគ្រួសារ ពេលមិនមានកើតជំងឺកូវីដ១៩ នៅភ្នំពេញ គឺគាត់រកលុយបានគួរសមអាចបង់លុយប្រចាំខែឲ្យអង្គការបាន ព្រមទាំងថ្លៃជួលបន្ទប់ដេកផងដែរ ។ ក្រោយពីកើតព្រឹត្តិការណ៍សហគមន៍២០កុម្ភៈ ពីមួយថ្ងៃទៅមួយថ្ងៃគ្មានភ្ញៀវជិះផាស់អាប់របស់គាត់ទេ ថ្ងៃខ្លះគ្មានភ្ញៀវជិះតែម្តង ។
លោកអ៊ុំបន្តថា ទោះបីជារាជរដ្ឋាភិបាល ក៏ដូចជាអាជ្ញាធររាជធានីភ្នំពេញ បានបន្ទូរបន្ថយវិធានរដ្ឋបាល ដើម្បីទប់ស្កាត់ការរាតត្បាតនៃជំងឺកូវីដ១៩ ដោយអនុញ្ញាតឲ្យធ្វើចរាចរណ៍ឆ្លងរាជធានី-ខេត្តវិញ និងអនុញ្ញាតឲ្យប្រកបមុខរបរ និងអាជីវកម្មមួយចំនួនក៏ដោយ ក៏មានអាជីវករមួយចំនួន និងអ្នកប្រកបមុខរបររត់តាក់ស៊ី និងរត់កង់បីជាដើម បានត្អូញត្អែរអំពីការរកចំណូលមិនសូវបាន ខណៈស្ថានភាពជំងឺកូវីដ-១៩ មិនទាន់មានការថមថយនៅឡើយ ។ បញ្ហានេះហើយ ទើបគាត់ត្រូវឲ្យប្រពន្ធកូនវិលទៅស្រុកវិញ ហើយគាត់សម្រេចចិត្តយកផ្លូវសាធារណៈធ្វើជាផ្ទះស្នាក់នៅពេលយប់ រួចមួយខែពីរខែគាត់ទៅជួបក្រុមគ្រួសារម្តង ។
ដោយឡែកប្អូនប្រុសជំនោ អាយុជាង២០ឆ្នាំ រត់រ៉ឺម៉ក់ម៉ូតូមានស្រុកកំណើតនៅខេត្តតាកែវ ដែលកំពុងតែស្រាយអង្រឹង ហើយនិយាយឲ្យដឹងថា ៖ វាស្រួលម្យ៉ាងដែរ ដែលគាត់មកដេកនៅទីតាំងខាងលើ ដោយមិនបាច់អស់លុយមួយរៀលថ្លៃជួលបន្ទប់ស្នាក់នៅ ស្របពេលសម័យកូវីដ១៩មិនមានការថមថយនោះ ។ សម្រាប់ប្អូនខិតខំប្រឹងប្រែងរកលុយយកទៅផ្គត់ផ្គង់គ្រួសារ និងសន្សំលុយទុកការប្រពន្ធផង គឺជារឿងសំខាន់ជាងជំងឺកូវីដ១៩ ។
ប្អូនប្រុសជំនោ ក៏បានបញ្ជាក់ថា ៖ ឥឡូវខ្ញុំអន់ភ័យ ហើយឥឡូវខ្ញុំភ័យតែម្យ៉ាងរឿងអត់លុយវិញ ។ ណាមួយ ខ្ញុំតែងតែមើលព័ត៌មានថា មានគេព្យាបាលជាសះស្បើយ អ៊ីចឹង វាធ្វើឲ្យខ្ញុំអត់សូវជាភ័យទេ ។ ទោះខ្ញុំមិនសូវភ័យ តែខ្ញុំនៅតែប្រុងប្រយ័ត្ន «៣ការពារ ៣កុំ» ជានិច្ច ។
គួរំលឹកផងដែរថា ៖ កាលពីថ្ងៃទី២២ ខែឧសភាកន្លងនេះ សាលារាជធានីភ្នំពេញ បានអនុញ្ញាតឲ្យភោជនីយដ្ឋានទទួលភ្ញៀវចូលទទួលទានក្នុងហាងឡើងវិញ ផ្សាររដ្ឋទាំងអស់បានអនុញ្ញាតឲ្យមានការលក់ដូរទំនិញ អាហារដែលជាតម្រូវការប្រចាំថ្ងៃ របស់ប្រជាពលរដ្ឋឡើងវិញ ចាប់ពីថ្ងៃនេះដែរ ។ ការឲ្យមានសកម្មភាពសេដ្ឋកិច្ចឡើងវិញនេះ ត្រូវបានប្រជាពលរដ្ឋដែលរកចំណូលមួយថ្ងៃសម្រាប់មួយថ្ងៃថា សំខាន់ណាស់សម្រាប់ពួកគាត់ ៕
ចែករំលែកព័តមាននេះ