រាជធានីភ្នំពេញ ៖ កម្លាំងជំនាញនាយកដ្ឋានប្រឆាំងការជួញដូរមនុស្ស និងការពារអនីតិជន បានសហការជាមួយកម្លាំងការិយាល័យប្រឆាំងការជួញដូរមនុស្ស និងការពារអនីតិជន នៃស្នងការដ្ឋាននគរបាលរាជធានីភ្នំពេញ កម្លាំងប៉ុស្តិ៍រដ្ឋបាលចោចៅ១ បានចាប់ឃាត់ខ្លួនអ្នកលក់ឡេអនឡាញម្នាក់ ដែលធ្វើការផ្សាយផ្ទាល់តាមបណ្តាញសង្គម ហើយប្រើសម្តីបែបក្តៅសាច់ ។
ជនសង្ស័យត្រូវសមត្ថកិច្ចឃាត់ខ្លួនកាលពីថ្ងៃទី៣ ខែមិថុនា ឆ្នាំ២០២១ តាមដីកាបញ្ជាឲ្យចូលខ្លួនលេង១១៣ អ.យ.ក របស់លោក ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ ។
សមត្ថកិច្ចបានបង្ហើបអោយដឹងថា ជនសង្ស័យ មានឈ្មោះ សៀន សូលក្ខិណា ហៅប៉ុប ភេទស្រី អាយុ២៣ឆ្នាំ ជនជាតិខ្មែរ ម្ចាស់ផេក Madam Chorda មានស្រុកកំណើតនៅឃុំបវេល ស្រុកបវេល ខេត្តបាត់ដំបង ស្នាក់នៅផ្ទះជួលលេខ៧៥សេ ផ្លូវលេខ២ ក្នុងបុរីហុងឡាយ ភូមិត្រពាំងថ្លឹង៣ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បើតាម ស្ត្រីជនសង្ស័យ បាននិយាយសារភាពថា ខ្លួនជាម្ចាស់គណនីផេកហ្វេសប៊ុក ម៉ាដាមឆដា (Madam Chorda) បានផ្សាយលក់ផលិតផលថែរក្សាសម្រស់របស់ក្រុមហ៊ុនមួយ តាំងពីអំឡុងឆ្នាំ២០១៨ ជាកម្មសិទ្ធិរបស់បងស្រីខ្លួន ដោយមានប្តីជាជនជាតិថៃ ដោយមានច្បាប់អនុញ្ញាតត្រឹមត្រូវ ។ ហើយរាល់ពេលផ្សាយផ្ទាល់លក់ផលិតផល លើបណ្តាញសង្គមម្តងៗ មានភ្ញៀវប្រមាណពី៤០ ទៅ៥០នាក់ បានទាក់ទងទិញ ។ ហើយកំឡុងពេលនោះខ្លួនបាននិយាយលេងសើចជាមួយភ្ញៀវ ដោយប្រើពាក្យអា.សអាភា.ស ពិតមែន ។
បច្ចុប្បន្នកម្លាំងការិយាល័យប្រឆាំងការជួញដូរមនុស្ស និងការពារអនីតិជន បាននាំខ្លួនជនសង្ស័យខាងលើ មកប្រគល់ជូនអយ្យការអមសាលាដំបូង ដើម្បីចាត់ការតាមផ្លូវច្បាប់ ៕
ចែករំលែកព័តមាននេះ