ខេត្តបន្ទាយមានជ័យ ៖ បុរសវ័យ៦២ឆ្នាំម្នាក់បានស្លា.ប់ ខណៈពេលដឹកដល់មន្ទីរពេទ្យ បន្ទាប់ពីជួបហេតុការណ៍គ្រោះថ្នាក់ចរាចរណ៍ម៉ូតូបុក កាលពីវេលាម៉ោង១១ និង១០នាទីព្រឹក ថ្ងៃទី១២ វិច្ឆិកា ២០១៥
ខេត្តបន្ទាយមានជ័យ ៖ បុរសវ័យ៦២ឆ្នាំម្នាក់បានស្លាប់ ខណៈពេលដឹកដល់មន្ទីរពេទ្យ បន្ទាប់ពីជួបហេតុការណ៍គ្រោះថ្នាក់ចរាចរណ៍ម៉ូតូបុក កាលពីវេលាម៉ោង១១ និង១០នាទីព្រឹក ថ្ងៃទី១២ វិច្ឆិកា ២០១៥ នៅលើកំណាត់ផ្លូវជាតិលេខ៥ ចំណុចមុខវត្តថ្មី ស្ថិតក្នុងភូមិវត្តថ្មី ឃុំភ្នំតូច ស្រុកមង្គលបូរី ចំណែកភាគីបង្កបានរត់គេចខ្លួនបាត់ បន្សល់ទុកតែម៉ូតូនៅកន្លែងកើតហេតុ។
នគរបាលចរាចរណ៍ស្រុកមង្គលបូរីបានឲ្យដឹងថា ជនរងគ្រោះដែលស្លាប់ក្នុងហេតុការណ៍គ្រោះថ្នាក់ចរាចរណ៍នេះ ឈ្មោះឡុត ចាន់ធូ ភេទប្រុសអាយុ៦២ឆ្នាំ នៅភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ បើកបរម៉ូតូម៉ាកហុងដាឌ្រីធុនសេ១២៥ ស៊េរី២០០៧ ពណ៌ខ្មៅ ពាក់ស្លាកលេខ ប.មានជ័យ, 1A.5661 ។ ចំណែកភាគីបង្កត្រូវបានគេស្គាល់ឈ្មោះ ពាត នេត ភេទប្រុស អាយុ១៩ឆ្នាំ នៅភូមិភ្នំតូចជើង ឃុំភ្នំតូច ស្រុកមង្គលបូរី បើកបរម៉ូតូម៉ាកសាន់យ៉ាន់ ពណ៌ខៀវ អូសរ៉ឺម៉ក ពាក់ស្លាកលេខបានត់ដំបង, 1K.7341។
ប្រភពដដែលបានបញ្ជាក់ថា មុនពេលកើតហេតុ អ្នកបើកម៉ូតូសាន់យ៉ាន់អូសរ៉ឺម៉ក បានធ្វើដំណើរពីត្បូងទៅជើង ពេលដល់ចំណុចកើតហេតុបានប្តូរទិសបត់ទៅខាងឆ្វេងដៃបំណងចូលផ្ទះ ស្របពេលនោះមានម៉ូតូម៉ាកហុងដាឌ្រីម ធុនសេ១២៥ ស៊េរី២០០៧ បើកមកពីក្រោយបានបុកចំកន្ទុយរ៉ឺម៉កពេញទំហឹង បណ្តាលឲ្យខ្ទាតផ្លោងបុកជ្រុងរ៉ឺម៉កចំក្រោមផ្ចិតធ្លាយពោះរងរបួសធ្ងន់ ហើយបានស្លាប់ពេលដឹកដល់ពេទ្យ។
ក្រោយពីកើតហេតុអ្នកបើកបរម៉ូតូសាន់យ៉ាន់បានរត់គេចខ្លួនបាត់បន្សល់ទុកតែម៉ូតូនៅកន្លែងកើតហេតុ។ ចំពោះមូលហេតុដែលបង្កឲ្យកើតមានគ្រោះថ្នាក់នេះគឺបណ្តាលមកពីអ្នកបើកម៉ូសាន់យ៉ាន់មុនពេលបត់មិនបានប្រយ័ត្ន និងមិនបានស៊ីញ៉ូ ឬលើកដៃជាសញ្ញាឲ្យអ្នកក្រោយបានដឹង៕
ចែករំលែកព័តមាននេះ