មកដល់សម័យនេះទៅហើយ សម័យសេដ្ឋកិច្ចកម្ពុជាអួតថាបានរីកចម្រើនគួរឱ្យកត់សម្គាល់មែនហើយក៏ដោយ ប៉ុន្តែបទល្មើសសេដ្ឋកិច្ចខាងវិស័យនាំចូលគេចពន្ធនៅតែស្តែងចេញឱ្យឃើញកាន់តែច្បាស់ទ្បើងៗ ដែលគួរឱ្យសង្ស័យណាស់ថា មានប្រព័ន្ធប្រព្រឹត្តអំពើពុករលួយធំៗ ជាមួយឈ្មួញទុច្ចរិតកើតមានមិនអាចប្រកែកបាន ។
ជាក់ស្តែង កន្លងមកថ្មីៗនេះ អាជ្ញាធរមានសមត្ថកិច្ចខាងគយ និងរដ្ឋាករកម្ពុជា ចាប់បានរថយន្តទំនើបៗគេចពន្ធ ដែលកំពុងធ្វើចរាចរណ៍តាមដងផ្លូវជាបន្តបន្ទាប់ ។ រថយន្តទំនើបៗមានតម្លៃខ្ពស់ ដែលស្ថាប័នគយចាប់បាននេះ ប្រាកដណាស់គេចពន្ធ១០០% ដោយឥតប្រកែកបាន ។
សួរថា តើសម័យនេះហើយ រថយន្តទំនើបៗគេចពន្ធ ដែលភាគច្រើនអ្នកមានប្រាក់ មានអំណាចកំពុងជិះនេះ វាចូលមកដោយរបៀបណា ? វាចូលមកតាមច្រកណា ? ឬក៏វាចេះដុះស្លាបហោះចូលស្រុកខ្មែរដោយបំបាំងកាយ ?
បន្ទាប់ពីធ្វើការស្រាវជ្រាវសាកសួរគ្រប់ស្ថាប័នមានសមត្ថកិច្ចពាក់ព័ន្ធ ទើបដឹងថា ពួកអា ទំនើបធុនថ្លៃគេចពន្ធទាំងប៉ុន្មានគ្រឿងនេះ ជារថយន្តកាត់ត តក្បាល តខ្លួន តកន្ទុយ ដែលឈ្មួញទុច្ចរិតនាំចូលមកតម្លើងជាថ្មី នៅរាជធានីភ្នំពេញយ៉ាងពិតប្រាកដ ។ វាមិនអាចនាំចូលទាំងមូល ដោយគេចពន្ធបានទេ ។
ប្រភពគួរឱ្យជឿជាក់មួយប្រាប់កោះសន្តិភាពថា កន្លងមកឈ្មួញនាំចូល ឃើញមានក្បាលរថយន្ត មានកន្ទុយ មានគ្រឿងម៉ាស៊ីន មានពូកកៅអី ដាក់ក្នុងតុងតឺន័រធំៗដាច់ដោយទ្បែកពីគ្នា ដោយពាក្យមានសុំនាំចូលគ្រឿងបន្លាស់រថយន្ត ។ កុងតឺន័រខ្លះឃើញមានក្បាល មានកន្ទុយ មានពណ៌ផ្សេងៗគ្នា ។ កុងតឺន័រខ្លះទៀត មានជើងក្រោម មានកញ្ចក់គ្រឿងបន្លាស់ផ្សេងៗ ដែលគេដោះ គេកាត់ចេញ ហើយនាំចូលក៏ខុសពេលវេលាគ្នាដែរ ។ មិនបាននាំចូលរួមគ្នាតែម្តងទេ ។ ខែនេះមកក្បាល ខែក្រោយមកដងខ្លួន មកកន្ទុយ ដាច់ដោយទ្បែកពីគ្នា ដែលបញ្ជាក់ថា ជាគ្រឿងបន្លាស់សម្រាប់រថយន្ត ដោយគ្មានការបង់ពន្ធទ្បើយ ឬជាប់ពន្ធតិចតួចប៉ុណ្ណោះ ព្រោះមើលទៅជាគ្រឿងបន្លាស់រថយន្តប្រាកដមែន ប្រៀបដូចដែកអេតចាយ ។
បន្ទាប់ពីបាននាំចូលដល់រោងជាងធំៗរបស់គេហើយ ពួកគេបានប្រមូលរថយន្តដែលកាត់ចេញនោះតាមលេខកូដសម្ងាត់ មកផ្តុំផ្សារតភ្ជាប់គ្នាវិញ ស្អាតដូចដើម ចង់ស្អាតជាងរោងចក្រតម្លើងរថយន្តទៀតផង ដែលអ្នកល្មមៗមើលអត់ដឹងថា ជារថយន្តកាត់តទេ ។
លុះដល់ពេលលក់ចេញវិញ មានតម្លៃថោកបំផុត ព្រោះអត់ពន្ធ ដែលរថយន្តប្រភេទគេចពន្ធនេះមានតែអ្នកមានអំណាចទេ ដែលហ៊ានទិញជិះ ដោយយកស្បែក«ខេមរភូមិន្ទ» និង«នគរបាល» មកពាក់ជិះយ៉ាងហឺហា ។
សម័យនេះហើយ អ្វីដែលខុសច្បាប់ មិនអាចស្ថិតស្ថេរ គង់វង់ មានសេចក្តីសុខជារៀងរហូតបានទ្បើយ វាបានតែមួយពេលៗទៅតាមបរិយាកាស នៃសង្គមតែប៉ុណ្ណោះ ដែលទីបំផុត «ប្រាក់ក៏បង់ ថង់ក៏ដាច រហែករយីករយាក» នៅចំពោះមុខមហាជន ។
បាតុភូតដែលកើតមានក្នុងសង្គមយើង ដូចពោលខាងលើនេះ តើវាជាកំហុសរបស់អ្នកប្រើប្រាស់ ឬមួយជាកំហុសរបស់អ្នកនាំចូលបន្លំ ឬមួយក៏ពាក់ពន្ធជាមួយអ្នកយល់ព្រមឱ្យនាំចូល ?
តើត្រូវដោះស្រាយដោយវិធីណា ដើម្បីបានយុត្តិធម៌ក្នុងសង្គម ? ប្រសិនគ្មានដំណោះស្រាយតាមច្បាប់ឱ្យមានភាពសុក្រិត្យទេ មហាជនច្បាស់ជាទម្លាក់ទៅលើសមត្ថភាព នៃការដឹកនាំសង្គមមិនខានទ្បើយ ៕
ចែករំលែកព័តមាននេះ