កណ្តាល៖ ក្រុមឧក្រិដ្ឋជន ជាជនជាតិចិន ៥នាក់ ពាក់ព័ន្ធបទល្មើសជួញដូរ កែច្នៃ វេចខ្ចប់ និងដឹកជញ្ជូនគ្រឿងញៀនឆ្លងដែន ពីកម្ពុជា ទៅប្រទេសវៀតណាម…
កណ្តាល៖ ក្រុមឧក្រិដ្ឋជន ជាជនជាតិចិន ៥នាក់ ពាក់ព័ន្ធបទល្មើសជួញដូរ កែច្នៃ វេចខ្ចប់ និងដឹកជញ្ជូនគ្រឿងញៀនឆ្លងដែន ពីកម្ពុជា ទៅប្រទេសវៀតណាម ១០០គីឡូក្រាម ត្រូវបានតុលាការខេត្តកណ្តាល សម្រេចឃុំខ្លួនដាក់ពន្ធនាគារហើយ។
លោក ជួន សុបញ្ញា អ្នកនាំពាក្យអយ្យការសាលាដំបូងខេត្តកណ្តាល បានថ្លែងថា នៅរសៀលថ្ងៃទី១ ខែមិថុនា ឆ្នាំ២០២១ លោក វ៉ាន់ សុបញ្ញា ចៅក្រមស៊ើបសួរ បានសម្រេចចេញដីកាឃុំខ្លួនក្រុមឧក្រិដ្ឋជន ៥នាក់ ដាក់ពន្ធនាគារបណ្តោះអាសន្ន ពាក់ព័ន្ធបទល្មើសជួញដូរ កែច្នៃ វេចខ្ចប់ និងដឹកជញ្ជូនគ្រឿងញៀនឆ្លងដែនទៅប្រទេសវៀតណាម ១០០គីឡូក្រាម។ ការសម្រេចនេះ បន្ទាប់ពីលោក សេង រិទ្ធី ព្រះរាជអាជ្ញារងអមសាលាដំបូងខេត្តកណ្តាល សម្រេចចោទប្រកាន់ពីបទ ” កែច្នៃ ជួញដូរ ដឹកជញ្ជូន និងរក្សាទុកដោយខុសច្បាប់នូវសារធាតុញៀន តាមមាត្រា ៣៩ មាត្រា៤០ ច្បាប់ស្តីពីការត្រួតពិនិត្យគ្រឿងញៀន។
របាយការណ៍ពីសមត្ថកិច្ច បានអោយដឹងថា កម្លាំងសមត្ថកិច្ចជំនាញមន្ទីរប្រឆាំងបទល្មើសគ្រឿងញៀន ដែលមានការសហការចូលរួមពីស្នងការដ្ឋាននគរបាលខេត្តកណ្តាល និងស្នងការដ្ឋាននគរបាលរាជធានីភ្នំពេញ បានបើកកិច្ចប្រតិបត្តិការ ៣ថ្ងៃ ដើម្បីបង្ក្រាបលើទីតាំងកែច្នៃផលិតគ្រឿងញៀន ៤កន្លែងរបស់ក្រុមឧក្រិដ្ឋជន ដោយចាប់ជនបរទេសចំនួន ៦នាក់ ក្នុងបទល្មើស ជួញដូរ កែច្នៃ វេចខ្ចប់ និងដឹកជញ្ជូនគ្រឿងញៀនឆ្លងដែន ទៅប្រទេសវៀតណាម ព្រមទាំងរឹបអូសគ្រឿងញៀនជិត ១០០ គីឡូក្រាម។ ទីតាំងទាំង ៤កន្លែងនោះ រួមមាន៖ នៅស្រុកមុខកំពូល ខេត្តកណ្ដាល នៅខណ្ឌច្បារអំពៅ ១កន្លែង និង៣កន្លែង នៅខណ្ឌបឹងកេងកង រាជធានីភ្នំពេញ។
ជនត្រូវចោទ ៥នាក់ ដែលឃាត់ខ្លួន៖ ទី១ឈ្មោះ LIANG LI HUA ភេទប្រុស អាយុ ៦០ឆ្នាំ ជនជាតិចិន។ ទី២-ឈ្មោះ QIU QING WEI ភេទប្រុស អាយុ ៦០ឆ្នាំ ជនជាតិចិន។ ទី៣ឈ្មោះ CHEN ZHI QIANG ភេទប្រុស អាយុ ៦០ឆ្នាំ ជនជាតិ ចិន សញ្ជាតិ កាណាដា។ ទី៤ឈ្មោះ CHEN SHEN TANG ភេទប្រុស អាយុ៥៧ឆ្នាំ ជនជាតិ ចិន ។ ទី៥ឈ្មោះ LI YI ភេទប្រុស អាយុ២៤ឆ្នាំ ជនជាតិ ចិន ។
រីឯវត្ថុតាង ដែលចាប់យករួមមាន៖ សារធាតុញៀនប្រភេទ(ថ្នាំក្រវី) អិចស្តាស៊ី (MDMA) ទម្ងន់ ៩៤ គីឡូ ៣១២.៨៨ ក្រាម។ សារធាតុញៀនប្រភេទមេតំហ្វេតាមីន(ICE) ទម្ងន់ ៤២.៨៥ ក្រាម។ សារធាតុផ្សំ (P2P)ទម្ងន់ ១០គីឡូ ៥១៩.៨៨ក្រាម៕ ឆដា
ចែករំលែកព័តមាននេះ