ទឹកដោះគឺជាធាតុចិញ្ចឹមដ៏មានសារប្រយោជន៍បំផុតដល់ទារក ប៉ុន្តែស្ត្រីមួយចំនួនតែងជួបបញ្ហាឈឺសុដន់ដោយសារតែការស្ទះទឹកដោះធ្វើឲ្យតឹងណែនឈឺចាប់ស្ទើរទ្រាំមិនបាន ពិបាកបំបៅកូនក្រៃពេក ។ ដោយសារតែបញ្ហានេះហើយធ្វើឲ្យស្ត្រីជាម្តាយមួយភាគធំងាកទៅរកការបំបៅកូនដោយអាហារបំប៉នផ្សេងៗវិញ។
ទាក់ទងនឹករណីនេះ តាមជំនឿរចាស់ៗឲ្យតែមានបញ្ហាស្ទះទឹកដោះ គាត់យករោមកន្ទុយគោមកចាក់ត្បារនៅត្រង់រន្ធសុដន់ ដើម្បីកុំឲ្យស្ទះទឹកដោះ ។ ប៉ុន្តែការអនុវត្តបែបនេះអាចនឹងប្រឈមបញ្ហាច្រើនចំពោះស្ត្រីដូចជា អាចឆ្លងរោគ និងមានការឈឺចាប់កាន់តែខ្លាំង។ អ្វីដែលប្រសើរបំផុតនៅពេលដែលមានបញ្ហានេះកើតឡើង ស្ត្រីគួរតែអនុវត្តតាមវិធីសាស្ត្រខាងក្រោម៖
-បំបៅដោះកូនឲ្យបានញឹកញាប់បើទោះជាទឹកដោះមិនសូវចេញ ៖ សប្តាហ៍ដំបូងស្ត្រីគួរតែឲ្យទារកបៅតិចៗសិន និងឲ្យបាន៨ដងក្នុងមួយថ្ងៃទាំងពេលថ្ងៃ និងពេលយប់ពី២ទៅ៣ម៉ោងម្តង ។ ជាពិសេសនៅពេលណាមានអារម្មណ៍ថា ដោះតឹងត្រូវឆាប់ឲ្យកូនបៅដើម្បីជួយបង្ហូរទឹកដោះចេញបានខ្លះ ។
-ស្អំទឹកក្តៅ ៖ គួរប្រើក្រមាពោះគោដែលជ្រលក់ទឹកក្តៅឧណ្ហមកស្អំនៅលើដោះ នៅពេលដោះនៅមិនតឹងពេក ឬស្ត្រីអាចប្រើដបដាក់ទឹកក្តៅឧណ្ហយកមកស្អំជំនួសក៏បាន ត្រូវស្អំមុនពេលបំបៅកូន៥ឬ១០នាទី ។
-ស្អំទឹកត្រជាក់ ៖ មានប្រសិទ្ធភាពបំផុតជួយកាត់បន្ថយការឈឺចាប់សុដន់ ស្ត្រីគួរប្រើថង់ដាក់ទឹកកក ឬយកក្រណាត់ស្អាតជ្រលក់ទឹកត្រជាក់ស្អំទុកប្រហែល១៥ទៅ២០នាទី ។ គួរអនុវត្តឲ្យបានញឹកញាប់នៅពេលដែលសុដន់មានសភាពតឹងរឹងរងការឈឺចាប់ ។
-ច្របាច់ដោះតិចៗ ៖ ស្ត្រីគួរធ្វើការម៉ាស្សាថ្នមៗដើម្បីជួយដល់ចរន្តទឹកដោះ ។ ធ្វើបែបនេះប្រហែលជា៣០នាទីមុនពេលបំបៅដោះកូន ប៉ុន្តែមិនត្រូវច្របាច់ ឬប្រើឧបករណ៍បូមទឹកដោះចេញរហូតហូរអស់ពីដោះនោះទេ ។
-ពាក់អាវទ្រនាប់ ៖ អាវទ្រនាប់ត្រូវពាក់ឲ្យបានសមស្របនឹងទំហំដោះ ចៀសវៀងការពាក់អាវទ្រនាប់ដែលមានគែមរឹង ឬតឹងចង្អៀតខ្លាំងពេកនោះទេ ព្រោះអាចបណ្តាលឲ្យមានបញ្ហាស្ទះទឹកដោះ ៕
ចែករំលែកព័តមាននេះ