ខេត្តមណ្ឌលគិរី ៖ អាវរងាចំនួន៤៥០អាវដែលជាអំណោយរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសម្រាប់ចែកជូនកងកម្លាំងយោធានារដូវរងា និងតាមរយៈលោកឧត្តមសេនីយ៏ឯក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ ត្រូវបានលោកឧត្តមសេនីយ៍ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរីចុះចែកជូនដល់កម្លាំងតាមបណ្តាក្រុង-ស្រុកទាំងប្រាំនៅក្នុងខេត្ត។
លោកឧត្តមសេនីយ៍ត្រី ឃិន ម៉េងស្រេង មេបញ្ជាការតំបន់ប្រតិបត្តិការសឹករងមណ្ឌលគិរីបានមានប្រសាសន៏ថា សម្តេចតេជោតែងយកចិត្តទុកដាក់ដល់កងកម្លាំងទាំងអស់មិនថាតែនៅខេត្តមណ្ឌលគិរី ឬខេត្តណានោះទេ គឺសម្តេចបានយកពេលវេលា និងធនធានផ្ទាល់របស់សម្តេចដើម្បីឧបត្ថម្ភដល់នាយទាហាន និងពលទាហាន ដែលកំពុងមានតួនាទីបម្រើជាតិមាតុភូមិ។
លោកមេបញ្ជាការខេត្តបានប្រសាសន៍បន្តថា បន្ទាប់ពីបានទទួលអាវរងាពីលោកហ៊ុន ម៉ាណែត នៅថ្ងៃទី១០ វិច្ឆិកា ២០១៥ រួចលោកក៏បានបន្តយករងាទាំងនោះមកចែកជូនជាបន្ទាន់ដល់កងម្លាំងដែលចំណុះឲ្យតំបន់ប្រតិបត្តិការសឹករងមណ្ឌលគិរី នៅព្រឹកថ្ងៃទី១១ វិច្ឆិកា ២០១៥ នៅមូលដ្ឋានកងទ័ពស្រុកកោះញែកភ្លាមៗ ដោយមិនទុកឲ្យហួសរដូវរងាឡើយ។
ក្រៅពីអាវរងាដែលបានចែកជូនដល់កម្លាំងយោធាខេត្តមណ្ឌលគិរី សម្តេចអគ្គមហាសេនាបតីតេជោហ៊ុន សែន ក៏បានឧបត្ថមដល់តំបន់ប្រតិបត្តិការសឹករងមណ្ឌលគិរីនូវរថយន្តម៉ាកវីហ្គោ ស៊េរី២០១៣ មួយគ្រឿងផងដែរដើម្បីជាការងាយស្រួលដល់តំបន់ប្រតិបត្តិការសឹករងក្នុងការប្រើប្រាស់ដឹកជញ្ជូនកម្លាំងទាហានបម្រើដល់ជាតិមាតុភួមិ។
លោកឧត្តមសេនីយ៍ត្រី ឃិន ម៉េងស្រេង បានថ្លែងអំណរគុណជាអណេកជូនដល់សម្តេចអគ្គមហាសេនាបតីតេជោ ហ៊ុន សែន ដែលជានិច្ចជាកាលសម្តេចតែងយកចិត្តទុកដាក់លើបញ្ហាសន្តិសុខជាតិ ប្រជាជន និងជាពិសេសលើបញ្ហាសុខភាពរបស់កងទ័ព។
លោកក៏បានផ្តាំផ្ញើទៅដល់មេបញ្ជាការសឹករងក្រុងស្រុកទាំងប្រាំនៅខេត្តមណ្ឌលគិរីត្រូវយកអាវរងាទាំងនេះទៅចែកជូនដល់នាយទាហាន នាយទាហានរងគ្រប់ៗគ្នាមិនត្រូវយកទៅទុកក្នុងឃ្លាំងឲ្យហួសរដូវរងាទេ៕
ចែករំលែកព័តមាននេះ