រាជធានីភ្នំពេញ ៖ កីឡាករ លី រិទ្ធី មកពីក្លិបមីស្ទើលីគុនខ្មែរខេត្តសៀមរាប ត្រូវបានគណៈកម្មការប្រកួតរៀបចំឱ្យប៉ះជាមួយកីឡាករជើងចាស់គ្មានគូប្រៀប ធឿន ធារ៉ា មកពីសមាគមកីឡាប្រដាល់ក្រសួងកសិកម្ម នៅសង្វៀនស៊ីអិនស៊ី នាថ្ងៃសៅរ៍ ទី៥ ខែមិថុនាខាងមុខនេះ។
រាជធានីភ្នំពេញ ៖ កីឡាករ លី រិទ្ធី មកពីក្លិបមីស្ទើលីគុនខ្មែរខេត្តសៀមរាប ត្រូវបានគណៈកម្មការប្រកួតរៀបចំឱ្យប៉ះជាមួយកីឡាករជើងចាស់គ្មានគូប្រៀប ធឿន ធារ៉ា មកពីសមាគមកីឡាប្រដាល់ក្រសួងកសិកម្ម នៅសង្វៀនស៊ីអិនស៊ី នាថ្ងៃសៅរ៍ ទី៥ ខែមិថុនាខាងមុខនេះ។
តាមពិត លី រិទ្ធី ក៏ជាកីឡាករលំដាប់ជួរមុខម្នាក់ដែរ ហើយក៏ធ្លាប់មានបទពិសោធន៍ប្រកួតនៅលើសង្វៀនមិនតិចឆ្នាំនោះទេ។ ម្យ៉ាងវិញទៀត មួយរយៈមុនៗ គេច្រើនតែធ្លាប់ប្រកួតជាមួយកីឡាករបរទេសជាញឹកបំផុត។ដោយឡែកចំពោះកីឡាករកម្ពុជា គ្នាឯងវិញ គឺមិនសូវនោះទេ។ ហេតុដូច្នេះហើយ ទើបមួយរយៈចុងក្រោយដែលមានការរីករាលជំងឺកូវីដ១៩ មកនេះ មិនសូវដែលបានឃើញរូបគេមានមុខឡើងសង្វៀនប្រកួតញឹកញាប់ដូចកីឡាករដទៃនោះឡើយ។
ហើយគេចាំមិនខុសទេនោះ នេះក៏ជាលើកទី១ ផងដែរ ដែលកីឡាករដែលមានដើមកំណើតមកពីខេត្តសៀមរាបរូបនេះ ត្រូវប៉ះជាមួយកីឡាករ ធឿន ធារ៉ា។ មិនតែប៉ុណ្ណោះ គេក៏មិនហ៊ានធ្វើការអះអាងទុកមុន ចំពោះលទ្ធផលចុងក្រោយថា យ៉ាងណានោះដែរ។ តែគេបានធ្វើការប្ដេជ្ញាចិត្តថា នឹងមិនឱ្យអ្នកគាំទ្រខកបំណងនោះទេ។
រីឯកីឡាករ ធឿន ធារ៉ា វិញនោះ គេពិតជាដឹងច្បាស់ហើយថា មួយរយៈចុងក្រោយមកនេះអត់មានអ្នកណាម្នាក់អាចផ្ដួលគេបានឡើយ។ ធឿន ធារ៉ា ធ្លាប់មានបទពិសោធន៍ប្រកួតមិនតិចឆ្នាំនោះទេ ហើយក៏ធ្លាប់ឆ្លងដែនទៅប្រកួតនៅស្រុកថៃរាប់លើក មិនអស់រួចមកហើយដែរ។ ប៉ុន្តែចំពោះការមកប៉ះជាមួយ លី រិទ្ធី លើកនេះ គេក៏មិនអាចមើលស្រាលបានដែរ។ គ្រាន់តែដឹងថា ធឿន ធារ៉ា ក៏បានត្រៀមខ្លួនបានយ៉ាងល្អ ដើម្បីរង់ចាំស្វាគមន៍ លី រិទ្ធី លើកនេះដែរ។
ក្រៅពីនេះ ក៏នៅមានគូប្រកួតដ៏ជក់ចិត្តចំនួន៣គូបន្ថែមទៀត រួមមាន ៖ កីឡាករ សំ អាន មកពីក្លិបឯកភ្នំគុនខ្មែរ ប្រកួតជាមួយកីឡាករ ស៊ន រ៉ាគីម មកពីក្លិបរាហ៊ូកីឡាខេត្តបាត់ដំបង, កីឡាករនី សុភី មកពីក្លិបកុលបុត្រគុនខ្មែរខណ្ឌពោធិ៍សែនជ័យ ប៉ះជាមួយកីឡាករ គឹម វាសនា មកពីក្លិបខេត្តស្វាយរៀង។
លើកនេះ ជាជំនួបសងសឹក ព្រោះអីគេនៅចាំបានថា កាលពីឆ្នាំ២០២០ គេទាំងពីរធ្លាប់ប៉ះគ្នាមកម្ដង គឹម រិទ្ធី ត្រូវ នី សុភី វាយឱ្យសន្លប់ទឹកទី៤ ខណៈកីឡាករ សូត្រ សុខឃីម ក្លិបបក្សីស្លាបដែកប៉ះជាមួយកីឡាករ អេលីត ហែមឡុង ក្លិបនាយកដ្ឋានអង្គរក្ស។
ចំណែកគូប្រកួតដណ្ដើមប្រាក់លានពីខារ៉ាបាវនៅក្នុងសប្ដាហ៍នេះវិញ ក៏មិនអន់នោះដែ។ កីឡាករ សុខ សាវិន មកពីក្លិបនាយកដ្ឋានអង្គរក្ស ត្រូវប៉ះជាមួយនឹងកីឡាករ ឡុង ជិន មកពីក្លិបខ្លារខិនមានរិទ្ធ ដើម្បីដណ្ដើមយកប្រាក់លាន ខណៈកីឡាករ រិន សារ័ត្ន មកពីក្លិបខេត្តព្រៃវែង ត្រូវប្រកួតជាមួយកីឡាករសោម វិឆ័យ មកពីក្លិបកីឡាប្រដាល់បញ្ជាការដ្ឋានទ័ពពិសេស៕
ចែករំលែកព័តមាននេះ