រាជធានីភ្នំពេញ ៖ ក្រសួងទេសចរណ៍សហការជាមួយអគ្គកុងស៊ុលកម្ពុជា និងសភាពាណិជ្ជកម្ម និងឧស្សាហកម្មបារាំងប្រចាំទីក្រុងលីយ៉ុង ប្រទេសបារាំងបានធ្វើការផ្សព្វផ្សាយទាក់ទាញទេសចរ និងអ្នកវិនិយោគបារាំងមកកម្ពុជា គ្រាដែលសន្និសិទសហប្រតិបត្តិការកម្ពុជា-បារាំងលើការអភិវឌ្ឍន៍សេដ្ឋកិច្ច និងទេសចរណ៍ត្រូវបានរៀបចំឡើងកាលពីពេលថ្មីៗនេះ នៅទីក្រុងលីយ៉ុង ប្រទេសបារាំង ដោយមានការចូលរួមពីលោកទ្រី ឈីវ អគ្គនាយករងទេសចរណ៍ និងលោក Jean Claude Poimboeuf អគ្គរដ្ឋទូតបារាំងប្រចាំកម្ពុជា លោក Jacques Beaulieu កុងស៊ុលកិត្តិយសកម្ពុជា ប្រចាំទីក្រុងលីយ៉ុង អ្នកវិនិយោគបារាំងក្នុងវិស័យទេសចរណ៍ និងអាជ្ញាធរបារាំងមួយចំនួនប្រមាណជាង១០០នាក់។
លោកទ្រី ឈីវ តំណាងក្រសួងទេសចរណ៍ បានបង្ហាញអំពីសក្តានុពល និងភាពទាក់ទាញទេសចរណ៍នៅកម្ពុជា ផែនការយុទ្ធសាស្ត្រអភិវឌ្ឍទេសចរណ៍កម្ពុជា និងកាលានុវត្តភាពនៃការវិនិយោគក្នុងវិស័យទេសចរណ៍នៅកម្ពុជា។
លោកបញ្ជាក់ថា បារាំងជាទីផ្សារដ៏មានសក្តានុពលសម្រាប់វិស័យទេសចរណ៍កម្ពុជា ហើយរហូតមកដល់បច្ចុប្បន្ន ទេសចរបារាំងមកកម្ពុជាមានចំនួនកាន់តែច្រើន ស្ថិតក្នុងចំណោមទីផ្សារធំៗទាំង១០របស់កម្ពុជាផងដែរ ចំណែកការវិនិយោគរបស់បារាំងក្នុងវិស័យទេសចរណ៍កម្ពុជារួមមាន ផ្នែកសណ្ឋាគារ ផ្ទះសំណាក់ ភោជនីយដ្ឋាន ទីភ្នាក់ងារទេសចរណ៍ និងសេវាកម្មទេសចរណ៍ជាច្រើនទៀត។
សូមរំលឹកថា បច្ចុប្បន្នក្រសួងទេសចរណ៍បាននិងកំពុងយកចិត្តទុកដាក់រៀបចំគោលនយោបាយទាក់ទាញទេសចរបារាំងចូលមកកម្ពុជា៕
ចែករំលែកព័តមាននេះ