រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជិះម៉ូតូហុងដាឌ្រីមមួយគ្រឿងព្យាយាមវ៉ាជែងខាងឆ្វេងម៉ូតូកង់បីដោយខ្វះការប្រុងប្រយ័ត្ន ក៏ជ្រុលទៅទាក់ដៃចង្កូតជាមួយនឹងរថយន្តកុងតឺន័រមួយគ្រឿងទៀតដែលបើកស្របទិសគ្នា ធ្វើឲ្យដួលខ្ទាតចូលក្រោមកង់រថយន្តកិនអូសជិត១០ម៉ែត្រស្លា.ប់ភ្លាមៗយ៉ាងអាណោចអាធ័មតែម្តង បង្កឲ្យមានការភ្ញាក់ផ្អើលកាលពីវេលាម៉ោង៩និង៥០នាទីយប់ ថ្ងៃទី១ ខែមិថុនា ឆ្នាំ២០២១ ត្រង់ចំណុចក្បែរសាលាបឋមសិក្សាភូមិឬស្សី តាមបណ្ដោយផ្លូវ២១៧ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញបុរសម្នាក់ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០០៨ ពណ៌ខ្មៅ ពាក់ស្លាកលេខ កោះកុង1A-0671 ធ្វើដំណើរតាមបណ្ដោយផ្លូវ២១៧ ទិសដៅពីត្បូងទៅជើង និងក្នុងល្បឿនលឿនទៀត។
ប្រភពដដែលបន្តថា លុះដល់ចំណុចកើតហេតុ ម៉ូតូនោះក៏បានព្យាយាមជិះវ៉ាជែងខាងឆ្វេងម៉ូតូកង់បីមួយគ្រឿងដែលធ្វើដំណើរស្របទិសគ្នា តែស្របពេលគ្នានោះដែរ ក៏មានរថយន្តកុងតឺន័រមួយគ្រឿងទៀតម៉ាក FUSO ពណ៌បៃតង់ ពាក់ស្លាកលេខ ភ្នំពេញ3F-0141 បើកបរដោយបុរសម្នាក់ ដែលធ្វើដំណើរទិសដៅស្របគ្នា និងបើកទន្ទឹមខាងឆ្វេងជាមួយម៉ូតូកង់បី ។
ប្រភពដដែលបន្តទៀតថា លុះពេលម៉ូតូរងគ្រោះព្យាយាមជិះវ៉ាជែងម៉ូតូកង់បីបានបន្តិច ដោយមិនបានប្រុងប្រយ័ត្នផងនោះ ក៏ជ្រុលចង្កូតទៅខាងឆ្វេង រួចទៅទាក់ដៃចង្កូតជាមួយនឹងកាងចំហៀងខាងស្តាំរថយន្តកុងតឺន័រធ្វើឲ្យម៉ូតូដួល និងខ្ទាតបុរសជាអ្នកបើកបរម៉ូតូចូលទៅខាងក្រោមកង់រថយន្តកិនអូសជិត១០ម៉ែត្រនៅជាប់ក្រោមកង់រថយន្តនោះស្លា.ប់ភ្លាមៗយ៉ាងអាណោចអាធ័មតែម្តង ចំណែកឯម៉ូតូវិញបានរងការខូចខាតបន្តិចបន្តួច។
បន្ទាប់ពីកើតហេតុភ្លាមៗនោះ អ្នកបើកបររថយន្តកុងតឺន័រក៏បានឈប់រថយន្ត រួចបើកទ្វារចុះរត់គេចខ្លួនចេញពីកន្លែងកើតហេតុបាត់ស្រមោលតែម្តង។ ចំណែកស.ពជនរងគ្រោះមិនស្គាល់អត្តសញ្ញាណនោះទេ គ្រាន់តែដឹងថា មានស្រុកកំណើតនៅឯខេត្តព្រៃវែង។
ក្រោយពេលកើតហេតុ ក៏មានសមត្ថកិច្ចមូលដ្ឋាន និងសមត្ថកិច្ចជំនាញបានចុះមកធ្វើការវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការដោះស្រាយទៅតាមផ្លូវច្បាប់។ ចំណែកឯស.ពជនរងគ្រោះវិញ ត្រូវបានសមត្ថកិច្ចធ្វើការស្រាវជ្រាវរកសាច់ញាតិ និងបានប្រគល់ស.ពឲ្យដឹកយកទៅធ្វើបុណ្យទៅតាមប្រពៃណីនៅឯខេត្តព្រៃវែង៕
ចែករំលែកព័តមាននេះ