ខេត្តបាត់ដំបង ៖ បុរសជាកម្មករសំណង់ចំនួន៣នាក់ក្នុងចំណោម៤នាក់ មានអាការក្អួតចង្អោររហូតសន្លប់ស្តូកស្តឹងនៅនឹងកន្លែង ត្រូវលោកតាជី ប្រញាប់ដឹកតាមរថយន្តយកទៅសង្គ្រោះភ្លាមៗនៅមន្ទីរពេទ្យបង្អែក
ខេត្តបាត់ដំបង ៖ បុរសជាកម្មករសំណង់ចំនួន៣នាក់ក្នុងចំណោម៤នាក់ មានអាការក្អួតចង្អោររហូតសន្លប់ស្តូកស្តឹងនៅនឹងកន្លែង ត្រូវលោកតាជី ប្រញាប់ដឹកតាមរថយន្តយកទៅសង្គ្រោះភ្លាមៗនៅមន្ទីរពេទ្យបង្អែកខេត្តប៉ៃលិន បន្ទាប់ពីពួកគេចេញពីធ្វើការជាកម្មករសាងសង់វត្តមួយកន្លែង រួចនាំគ្នាទិញស្រាថ្នាំត្រាំពស់វែកចំនួន២លីត្រអង្គុយផឹកក្លែមជាមួយសាច់សុនខ (ឆ្កែ) ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង៥ និង៣០នាទីល្ងាច ថ្ងៃទី១០ វិច្ឆិកា ២០១៥ ស្ថិតនៅក្បែរបរិវេណវត្តព្រះពុទ្ធ ក្នុងភូមិព្រះពុទ្ធ ឃុំបឹងរាំង ស្រុកកំរៀង ខេត្តបាត់ដំបង ។
ប្រភពព័ត៌មានបានឱ្យដឹងថា ជនរងគ្រោះ ១-ឈ្មោះ ផូក រុន ហៅហួច ភេទប្រុស អាយុ២០ឆ្នាំ ២-ឈ្មោះ ផូក រតនា ហៅលីន ភេទប្រុស អាយុ២៤ឆ្នាំ និងទី៣-ឈ្មោះ ពាម រី ភេទប្រុស អាយុ៣០ឆ្នាំ ទាំងអស់គ្នាជាកម្មករ មានស្រុកកំណើតរស់នៅភូមិគោករលួស ឃុំដំដែក ស្រុកសូត្រនិគម ខេត្តសៀមរៀប ទើបមកធ្វើការជាកម្មករសំណង់នៅភូមិខាងលើ បានរយៈពេល១០ថ្ងៃប៉ុណ្ណោះ ។
ប្រភពបន្តទៀតថា ជារៀងរាល់ថ្ងៃជនរងគ្រោះទាំង៣នាក់ខាងលើ បន្ទាប់ពីសម្រាកការងារធ្វើកម្មករសំណង់តែងតែនាំគ្នាទិញស្រាថ្នាំនៅតូបលក់ចាប់ហួយនៅក្បែរវត្តមកផឹកដើម្បីបាយឆ្ងាញ់ លុះនៅថ្ងៃកើតហេតុ ពួកគេបានរៃអង្គាសលុយគ្នាយកទៅទិញស្រាថ្នាំដូចសព្វមួយដងរួចក៏នាំគ្នាអង្គុយផឹកក្លែមសាច់ឆ្កែ ។
ប្រភពដដែលបានបន្តទៀតថា លុះមួយសន្ទុះក្រោយមកស្រាប់តែបុរសម្នាក់ ឈ្មោះ ពាម រី អាយុ៣០ឆ្នាំ មានអាការក្អួតចង្អោរ ដោយឃើញដូច្នេះក៏នាំគ្នាចាប់កោសខ្យល់ តែមិនបាត់គឺកាន់តែក្អួតខ្លាំងឡើងៗ រហូតដល់បែកប្រម៉ាត់ថ្លាន់ ទើបក្រោយមកមានបុរស២នាក់ចាប់ផ្តើមក្អួតបន្តបន្ទាប់ ដេកននៀលរដូករណែលនៅក្នុងរោង ។
ដោយឃើញសភាពមិនស្រួលទើបលោកតាជីនៅក្នុងវត្តខាងលើបានទាញយករថយន្តដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលន ត្រូវគ្រូពេទ្យចាក់ថ្នាំ និងព្យួរសេរ៉ូមទាន់ពេលវេលា ។
លោកគ្រូពេទ្យបានបញ្ជាក់ឱ្យដឹងថា ប្រហែលជានៅក្នុងស្រាថ្នាំមានសារជាតិពុល អង់ទ្រីន ដែលគេដាក់លាយចូលបន្តិចបន្តួចដើម្បីឱ្យស្រាកាន់តែខ្លាំងឈួលឡើង ហើយម្យ៉ាងវិញទៀត អាចមកពីជនរងគ្រោះទាំងបីនាក់មានសភាពខ្សោយ បន្ទាប់ពីធ្វើការងារហត់អស់កម្លាំងមិនទាន់ហូបបាយផង នាំគ្នាផឹកស្រាទើបបណ្តាលឱ្យទៅជាក្អួតចង្អោរបែបនេះ ។
ទោះបីជាយ៉ាងណាក៏ដោយ លោកគ្រូពេទ្យមិនដឹងថា មកពីស្រាមានសារជាតិពុល ឬយ៉ាងណាដែរ ទាល់តែយកស្រានោះទៅពិនិត្យធ្វើកោសល្យវិច្ច័យមើលទើបអាចដឹងច្បាស់ ។ ប៉ុន្តែលោកគ្រូពេទ្យបានហាមប្រាមកុំឱ្យផឹកស្រា.សដែលផលិតដោយប្រជាពលរដ្ឋ ដែលខ្វះបច្ចេកទេសច្រើនដែរ ព្រោះបច្ចុប្បន្ននេះស្រា.សគេមិនបិទដូចពីមុនទៀតឡើយ ដោយគ្រាន់តែទិញមេមកចាក់ចូលក្នុងអង្ករ រួចផលិតទៅជាស្រាតែម្តង ក៏អាចបណ្តាលឱ្យប៉ះពាល់ដល់សុខភាពដែរ ៕
ចែករំលែកព័តមាននេះ