ប្រជាពលរដ្ឋដែលធ្វើដំណើរតាមដងផ្លូវក្រាលកៅស៊ូមួយកន្លែង ស្ថិតនៅក្បែរស្ពានថ្ម ក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន បានធុញទ្រាន់ និងធ្វើការរិះគន់ទៅលើ
ខេត្តប៉ៃលិន ៖ ប្រជាពលរដ្ឋដែលធ្វើដំណើរតាមដងផ្លូវក្រាលកៅស៊ូមួយកន្លែង ស្ថិតនៅក្បែរស្ពានថ្ម ក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន បានធុញទ្រាន់ និងធ្វើការរិះគន់ទៅលើមន្ត្រីជំនាញបរិស្ថានខេត្ត ក៏ដូចជាអាជ្ញាធរក្រុងប៉ៃលិនថា បើចេះតែបណ្តែតបណ្តោយឱ្យប្រជាពលរដ្ឋយកកាកសំណល់ផ្ទះបាយ និងសំរាមស្អុយរលួយយកទៅបោះចោលនៅលើចិញ្ចឹមផ្លូវបែបនេះ អាចនឹងបង្កក្លិនស្អុយអាសោចលំបាកក្នុងការដកដង្ហើម បាត់បង់សោភ័ណភាពជាដើម ។ ទោះបីជាខាងអនាម័យខេត្ត ធ្លាប់នាំគ្នាទៅប្រមូលឱ្យស្រឡះល្អ តែពេលនេះបែរជានាំគ្នាយកទៅចាក់ចោលដូចកន្លែងទីលានចាក់សំរាមទៅវិញ ។
អ្នកបើកបរម៉ូតូនៅលើដងផ្លូវខាងលើម្នាក់បានបង្ហើបប្រាប់ឱ្យដឹងថា ៖ ពេលអ្នកភូមិក្បែរៗនេះ ធ្វើដំណើរចេញពីផ្ទះឆ្លងកាត់ផ្លូវខាងលើ ម្នាក់ៗខំអត់ដកដង្ហើមស្ទើរដាច់ខ្យល់ស្លា.ប់ ព្រោះតែស្អុយក្លិនសំរាម កាកសំណល់ផ្ទះបាយ ស្រកាត្រី ក្បាលត្រី ឆ្អឹកគោ សំបកពងមាន់ ពងទា សំបកបន្លែផ្សេងៗ ដែលគេយកទៅបោះចោលនៅលើចិញ្ចើមផ្លូវក្លាយទៅជាដង្កូវតូចធំវាររវីមរវាម ហើយក៏មានសត្វឆ្កែនាំគ្នាចូលទៅហែកថង់ស៊ីអូសរាយពេញផ្លូវដែរ ។
ប្រភពដដែលបន្តទៀតថា ការបោះចោលសំរាមអនាធិបតេយ្យបែបនេះ បង្កផលប៉ះពាល់ដល់ផ្លូវដង្ហើមខ្លាំង ដល់ប្រជាពលរដ្ឋរស់នៅក្បែរសំរាម ហើយពេលស្អុយរលួយហូរតាមទឹកអូរធ្លាក់ទៅក្រោម លុះប្រជាពលរដ្ឋបូមយកមកប្រើប្រាស់ បង្កជាមេរោគ ក្លាយជាជំងឺរោគា ។ លើសពីនេះ ពេលភ្ញៀវទេសចរណ៍ធ្វើដំណើរតាមដងផ្លូវខាងលើ គេធ្វើការរិះគន់ទៅលើអាជ្ញាធរក្រុងប៉ៃលិន ដែលចេះតែបណ្តែតបបណ្តោយឱ្យជនខិលខូចយកសំរាមទៅបោះចោលយ៉ាងអនាធិបតេយ្យ ដោយមិនមានការហាមឃាត់ ។
ពាក់ព័ន្ធទៅនឹងបញ្ហាខាងលើនេះ លោក ស៊ុន យី អភិបាលក្រុងប៉ៃលិន បានឱ្យភ្នាក់ងារយើងដឹងថា ៖ ខាងលោកធ្លាប់ឱ្យកម្លាំងចុះទៅពិនិត្យ និងឃ្លាំមើលជនខិលខូចដែលយកទៅបោះសំរាមចោលខាងលើ ដើម្បីយកមកណែនាំ ព្រមទាំងផាកពិន័យទៅលើប្រជាពលរដ្ឋណា ដែលមិនព្រមរាងចាលផងដែរ ។
ចំណែកលោក គឹម សុខា ប្រធានមន្ទីរបរិស្ថានខេត្តប៉ៃលិន បានឱ្យដឹងដែរថា ខាងលោកក៏បានបញ្ជូនឱ្យមន្ត្រីក្រោមឱវាទចុះទៅត្រួតពិនិត្យមើលកន្លែងខាងលើ ព្រមទាំងជួយប្រមូលសំរាមយកទៅបោះចោលនៅទីលានចាក់សំរាមម្តងរួចមកហើយ ។
ប្រភពបន្តទៀតថា ខាងលោកក៏បានឱ្យក្រុមការងារចុះតាមដានសកម្មភាពបោះចោលសំរាមអនាធិបតេយ្យខាងលើនេះដែរ បើសិនជាឃើញប្រជាពលរដ្ឋទាំងនោះ នឹងធ្វើការណែនាំម្តងទៅពីរដង បើមិនព្រមស្តាប់លោកនឹងហៅមកធ្វើកិច្ចសន្យារាងចាលនៅមន្ទីរ ដោយផាកពិន័យផងដែរ ។
លើសពីនេះ លោកក៏នឹងឱ្យខាងក្រុមការងារយកស្លាកទៅដាក់ត្រង់កន្លែងចាក់សំរាមនេះ ដើម្បីឱ្យប្រជាពលរដ្ឋមានការខ្លាចញញើត និងអនុវត្តតាមការណែនាំ ដើម្បីកុំឱ្យខូចសោភ័ណភាពក្រុងប៉ៃលិន ប៉ះពាល់ដល់បរិស្ថាន បង្កជាក្លិនស្អុយ នាំឱ្យកើតជំងឺដល់អ្នករស់នៅក្បែរនោះ ក៏ដូចជាអ្នកធ្វើដំណើរទៅមកកាត់ត្រង់កន្លែងសំរាមនោះដែរ ៕
ចែករំលែកព័តមាននេះ