ត្រីឡូម៉ាមួយក្បាលមានបំពាក់ឧបករណ៍ចារកម្មលើក្បាលទើបតែត្រូវសកម្មប្រយុទ្ធជើងទឹករបស់អង្គការហាម៉ាស់ ចាប់បានដោយចៃដន្យនៅដែនសមុទ្រជិតជ្រោយហ្គាហ្សារបស់ប៉ាឡេស្ទីន ។ ហេតុការណ៍នេះត្រូវកាសែតAL- Quds របស់ប៉ាឡេស្ទីនចុះផ្សាយធ្វើឱ្យមានការភ្ញាក់ផ្អើល និងនឹកឃើញរឿងរ៉ាវ កន្លងៗមកដែលគេធ្លាប់ចាប់បានសត្វធ្វើចារកម្មរបស់អុីស្រាអែលជាច្រើនកន្លែងក្នុងតំបន់មជ្ឈិមបូព៌ា ។
តាមការរៀបរាប់របស់កាសែត AL-Quds សកម្មប្រយុទ្ធជើងទឹករបស់អង្គការហាម៉ាស់ទើបតែចាប់បានត្រីឡូម៉ាមួយក្បាលលើក្បាលមានបំពាក់កាមេរ៉ា និងឧបករណ៍រាវស្ទង់ក្នុងទឹក ដែលឧបករណ៍នោះអាចបាញ់ផ្លែព្រួញបានខ្លះប្រសិនបើចាំបាច់ ។ នាយទាហានម្នាក់របស់អង្គការហាម៉ាស់ និយាយប្រាប់កាសែត AL- Quds ថា ត្រីដែលចាប់បាននោះជា «ចារបុរស» ក្នុងស្ថាប័នចារកម្ម Mossad របស់អីុស្រាអែល ប្រហែលជាកំពុងស៊ើបសកម្មភាពហ្វឹកហាត់របស់កម្លាំងជើងទឹកហាម៉ាស់ ។
តាំងពីយូរមកហើយ សត្វដែលអីុស្រាអែលបង្វឹកសម្រាប់ធ្វើចារកម្ម តែងត្រូវបណ្តាប្រទេសក្នុងតំបន់មជ្ឈិមបូព៌ាចាប់បានជាបន្តបន្ទាប់ ។ ប្រទេសអារ៉ាប៊ីសាអ៊ូឌីត តួកគី និងអីុរ៉ង់ចាប់បានច្រើនជាងគេ ។ សូម្បីនៅតាមចុងឈើក្នុងប្រទេសស៊ូដង់ខាងទ្វីបអាហ្វ្រិក ក៏ត្រូវពួកចារកម្មមានស្លាបរបស់អុីស្រាអែលធ្វើសកម្មភាពស៊ើបការណ៍ដែរ ។ ពួកវាច្រើនបង្ហាញខ្លួននៅចំណុចនិងពេលវេលាដែលគេមិនសូវចាប់អារម្មណ៍ ។
ឆ្នាំ២០០៧ អីុរ៉ង់ចាប់បានសត្វកំប្រុក១៤ក្បាល មានបំពាក់ឧបករណ៍ស៊ើបការណ៍នៅនឹងខ្លួន ។ ឆ្នាំ២០០៨ អីុរ៉ង់ចាប់បានសត្វព្រាប២ក្បាលទៀត សុទ្ធតែមានបំពាក់ឧបករណ៍ស៊ើបការណ៍ ខណៈសត្វព្រាប២ក្បាលនោះហើរទៅមកនៅក្បែរកន្លែងចម្រាញ់់អ៊ុយរ៉ានីញ៉ូមរបស់អីុរ៉ង់ ។
នៅអេហ្ស៊ីប ឆ្នាំ២០១០ អ្នកឯកទេសជីវសាស្ត្រសមុទ្ររបស់អេហ្ស៊ីបបានធ្វើឱ្យសាធារណមតិចាប់អារម្មណ៍យ៉ាងខ្លាំងពេលគាត់ប្រកាសថា អីុស្រាអែលបញ្ជូនត្រីឆ្លាមមួយក្បាលដែលមានបំពាក់ឧបករណ៍ GPS ទៅតំបន់ទេសចរណ៍ឆ្នេរសមុទ្រដ៏ល្បីល្បាញរបស់អេហ្ស៊ីបក្នុងឧបទ្វីបស៊ីណាយ (Sinai) ដើម្បីឱ្យវាវាយប្រហារអ្នកទេសចរដែលចុះហែលលេងក្នុងសមុទ្របណ្តាលឱ្យអ្នកទេសចរម្នាក់បាត់បង់ជីវិត ប៉ុន្មាននាក់ទៀតរងរបួស ។ អ្នកឯកទេសរូបនោះដាក់ជាសំណួរ «ហេតុម៉េចត្រីឆ្លាមនោះអត់បង្កគ្រោះថ្នាក់ដល់អ្នកណាតាមផ្លូវដែលវាធ្វើដំណើរចម្ងាយ៤.០០០គីឡូម៉ែត្រ រហូតទាល់តែមកដល់ឆ្នេរសមុទ្រដ៏ល្បីល្បាញរបស់អេហ្ស៊ីបទើបចាប់ផ្តើមវាយប្រហារអ្នកទេសចរ ?
សំណួរនេះត្រូវបានលោកអភិបាលតំបន់ឧបទ្វីបស៊ីណៃឆ្លើយភ្លាម៖ «ព្រោះត្រីឆ្លាមនោះជាចារបុរសរបស់ស្ថាប័នចារកម្ម Mossad ដែលវាមានភារកិច្ចដេញអ្នកទេសចរចេញពីតំបន់សមុទ្រក្រហម» ។
ប៉ុន្មានឆ្នាំក្រោយរឿង «ត្រីឆ្លាមចារកម្ម» មិនទាន់បាត់ភ្ញាក់ផ្អើលផង ប្រទេសអេហ្ស៊ីបចាប់បានសត្វក្រៀលសមួយក្បាល មានបំពាក់ឧបករណ៍ស៊ើបការណ៍នៅជើង ។ សត្វក្រៀលនោះក្រោយដោះយកឧបករណ៍ស៊ើបការណ៍ហើយ គេក៏ដោះលែងវាទៅវិញ តែវាតែងតែក្រវែលទៅមកនៅកន្លែងនោះដដែល អត់ព្រមទៅណាសោះ ម្ល៉ោះហើយគេក៏សម្លាប់ចោលតែម្តង ។
ឆ្នាំ២០១២ ភូមិតូចមួយក្នុងប្រទេសតួកគីសុខៗស្រាប់តែកើតជំងឺគ្រុនក្តៅស្ទើរពេញភូមិ ក្រោយពេលមានសត្វប្រមង់មួយក្បាលស្លាប់ ហើយលើជើងសត្វប្រមង់នោះមានបំពាក់លេខកូដ និងអក្សរអុីស្រាអែល ។ ស្ថាប័នប្រឆាំងចារកម្មតួកគីស្រាវជ្រាវយ៉ាងម៉ត់ចត់ចំពោះករណីចម្លែកនេះ ទីបំផុតបញ្ជាក់ថា ស្លាកលេខបំពាក់នៅលើសត្វប្រមង់ គេប្រើគ្រាន់តែដើម្បីតាមដានការរស់នៅរបស់ប្រមង់ប៉ុណ្ណោះ គ្មានអ្វីជាគ្រោះថ្នាក់ទេ ។ ដឹងអីមួយឆ្នាំក្រោយ ភូមិមួយផ្សេងក្នុងប្រទេសតួកគីដែលសត្វប្រមង់មួយក្បាលទៀតមានបំពាក់ស្លាកលេខកូដ និងអក្សរអីុស្រាអែលដូចគ្នា ត្រូវចាប់បាន ។ ម្តងនេះខាងវេជ្ជសាស្ត្រចូលរួមធ្វើការដោយយកសត្វប្រមង់នោះទៅឆ្លុះកាំរស្មីX ហើយបញ្ជាក់ថា វាជាសត្វធ្វើចារកម្មឱ្យអីុស្រាអែលយ៉ាងពិតប្រាកដ ។
ចុងឆ្នាំ២០១២ ករណីចារកម្មចម្លែកនេះ ផ្ទុះឡើងក្នុងប្រទេសស៊ូដង់ខាងទ្វីបអាហ្វ្រិកម្តង ។ នៅទីក្រុងដាហ្វួររបស់ស៊ូដង់ គេចាប់បានសត្វត្មាតមួយក្បាលមានបំពាក់ឧបករណ៍ GPS និង ឧបករណ៍ចាប់រលកធាតុអាកាសផ្កាយរណប។ ក្រៅពីឧបករណ៍ទាំងពីរនោះ នៅជើងត្មាតនោះមានបំពាក់ស្លាកមួយទៀតជាស្លាកបញ្ជាក់ថាវាជាសត្វត្មាតក្នុងកម្មវិធីស្រាវជ្រាវរបស់មហាវិទ្យាល័យ Hebreu នៅទីក្រុងតែលអាវីវ ប្រទេសអីុស្រាអែល ។ ក្រោយពេលដឹងដំណឹងសត្វត្មាតរបស់ខ្លួន ត្រូវគេចាប់បានក្នុងប្រទេសស៊ូដង់ ស្ថាប័នគ្រប់គ្រងឧទ្យាននិងសួនសត្វរបស់អីុស្រាអែលឆ្លើយតប ភ្លាមៗថា ត្មាតនោះក្នុងចំណោមត្មាត១០០ក្បាលដែល «បម្រើឱ្យការស្រាវជ្រាវ» មិនមែន «ធ្វើចារកម្ម» ទេ ។ រឿងហេតុនេះធ្វើឱ្យគេនឹកឃើញករណីមួយក្នុងឆ្នាំ២០១១ ។ កាលណោះសត្វត្មាតមួយក្បាលមានបំពាក់ឧបករណ៍ដូចគ្នានេះដែរ ត្រូវចាប់បាននៅប្រទេសអារ៉ាប៊ីសាអ៊ូឌីត ។ នៅជើងត្មាតមានបំពាក់ស្លាកឈ្មោះមហាវិទ្យាល័យតែលអាវីវ របស់អុីស្រាអែល ។ គេប្រញាប់ប្រគល់សត្វត្មាតនោះឱ្យស្ថាប័នសន្តិសុខភ្លាម ។
លើពិភពលោកមិនខ្វះទេសត្វដែលគេប្រើប្រាស់សម្រាប់ការងារចារកម្ម រឿងបែបនេះមានច្រើនសតវត្សមកហើយ ។ ដូចយ៉ាងសេអុីអា ធ្លាប់ចំណាយប្រាក់១៥លានដុល្លារសម្រាប់កម្មវិធីប្រែក្លាយសត្វឆ្មាចិញ្ចឹមជាឆ្មាចារកម្ម ។ ប៉ុន្តែដោយមានការភ្លាំងភ្លាត់ពេលអនុវត្ត ដូច្នេះកម្មវិធីនោះត្រូវបានបញ្ឈប់វិញ ។ ដូចគ្នានេះដែរ ទសវត្ស៧០នៃសតវត្សទី២០ ស្ថាប័នចារកម្ម MI5 របស់អង់គ្លេសក៏ធ្លាប់បង្វឹកកណ្តុរមាឌល្អិតដែលចូលចិត្ត លោតៗឱ្យក្លាយជាកណ្តុរប្រឆាំងចារកម្មដោយវាអាចស្រង់ក្លិន adremalin នៅខ្លួនមនុស្សចម្លែកក្នុងព្រិល ។ ប៉ុន្តែក្រោយមក កម្មវិធីនេះក៏លុបចោលវិញ ព្រោះអ្នកដំណើរខ្លាចក្រែងជិះយន្តហោះមានកម្រិត adremalin ក្នុងខ្លួនខ្ពស់ប្រហាក់ប្រហែលពួកភេរវករ… ៕
ចែករំលែកព័តមាននេះ