ទឹកភ្លៀងមួយមេធំធ្លាក់ជាប់ៗគ្នារយៈពេល២យប់ បណ្តាលឱ្យរបងថ្មមួយផ្ទាំងប្រវែង១០០ម៉ែត្រដួលសង្កត់ពីលើផ្ទះប្រជាពលរដ្ឋអស់៤ខ្នង ចំណែកមនុស្សវិញរងរបួសធ្ងន់ និងស្រាល បង្កឱ្យមានការភ្ញាក់ផ្អើលកាលពី
ខេត្តឧត្តរមានជ័យ ៖ ទឹកភ្លៀងមួយមេធំធ្លាក់ជាប់ៗគ្នារយៈពេល២យប់ បណ្តាលឱ្យរបងថ្មមួយផ្ទាំងប្រវែង១០០ម៉ែត្រដួលសង្កត់ពីលើផ្ទះប្រជាពលរដ្ឋអស់៤ខ្នង ចំណែកមនុស្សវិញរងរបួសធ្ងន់ និងស្រាល បង្កឱ្យមានការភ្ញាក់ផ្អើលកាលពីវេលាម៉ោង១០និង២០នាទីយប់ ថ្ងៃទី២៦ ខែឧសភា ឆ្នាំ២០២១ ស្ថិតនៅក្នុងភូមិទួលកណ្តាល ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ម្ចាស់លំនៅឋានរងគ្រោះដោយសាតែរបងថ្មបាក់សង្កត់ផ្ទះខាងលើមានឈ្មោះម៉ី ឈាន ភេទប្រុសអាយុ៧១ឆ្នាំ មានប្រពន្ធឈ្មោះ កែវ អូន អាយុ៧០ឆ្នាំ បានរៀបរាប់ថា មុនពេលកើតហេតុ ទឹកភ្លៀងបានធ្លាក់មួយមេយ៉ាងធំចាប់ពីវេលាម៉ោង១០និង២០នាទីយប់ ថ្ងៃទី២៦ ខែឧសភា ២០២១ ។ ខណៈពេលនោះកូនៗទាំងតូចទាំងធំកំពុងជ្រកកោនក្នុងផ្ទះសុខៗ ស្រាប់តែរបងថ្មបាក់ប្រាវដួលសង្កត់ផ្ទះតែម្តង បណ្តាលរងការខូចខាតអស់ចំនួន៤ខ្នង ។ ចំណែកកូនស្រីឈ្មោះ ចាន្ទី អាយុ២៩ឆ្នាំ ដែលមានផ្ទៃពោះ៨ខែផងនោះ ក៏បណ្តាលឱ្យរងរបួសធ្ងន់ និងនាំទៅធ្វើការសង្គ្រោះក្នុងមន្ទីរពេទ្យបង្អែកស្រុកអន្លង់វែង រីឯមនុស្សចំនួន៦នាក់ផ្សេងទៀតរងរបួសស្រាល។
ម្ចាស់ផ្ទះរងគ្រោះបញ្ជាក់ថា ចំពោះទំហំនៃការខូចខាតទ្រព្យសម្បត្តិវិញ គឺខូចខាតអស់ម៉ូតូមួយគ្រឿង, តុ ទូ ហើយលើសពីនោះគឺសម្ភារៈប្រើប្រាស់ជាច្រើនផងដែរ។
ទាក់ទិននឹងករណីខាងលើនេះ បើតាមប្រជាពលរដ្ឋម្នាក់សុំមិនបញ្ចេញឈ្មោះបាននិយាយអះអាងថា រូបគាត់ជាអ្នកចាំដីឱ្យអ្នកមានអំណាចម្នាក់បានធ្វើការសម្របសម្រួលជាមួយម្ទាស់ផ្ទះរងគ្រោះនៅនឹងប៉ុស្តិ៍រដ្ឋបាលឃុំត្រពាំងប្រីយ៍ដែរ តែខាងជនរងគ្រោះបានសុំសំណងខូចខាតដល់ទៅ២ម៉ឺនដុល្លារ ខណៈនេះដោយមិនបានត្រូវរ៉ូវគ្នាទេ។
ចំណែកលោក ស៊ូ ណាត មេឃុំត្រពាំងប្រីយ៍ក៏បានឱ្យដឹងនៅរសៀលថ្ងៃទី២៦ ខែឧសភា នេះថា ក្នុងហេតុការណ៍នេះ លោកបានចុះទៅដល់នឹងកន្លែងកើតហេតុឃើញថា ផ្ទះមួយខ្នងខូចខាតទាំងស្រុងនិងផ្ទះ៣ខ្នងទៀតខូចខាតស្ទើរទាំងស្រុងផងដែរ ចំណែកស្ត្រីដែលមានផ្ទៃពោះ៨ខែវិញកំពុងសង្គ្រោះនៅមន្ទីរពេទ្យ ហើយក្នុងការដោះស្រាយគ្នានេះ បើតាមការឱ្យដឹងពីជនរងគ្រោះមកថា ខាងម្ចាស់ដីសុំដោះស្រាយគ្នាត្រឹមតែមួយពាន់ដុល្លារ តែខាងជនរងគ្រោះមិនព្រមទទួលយក។
ចែករំលែកព័តមាននេះ