រាជធានីភ្នំពេញ ៖ លោក ប៉ុល ហំម អតីតមន្ត្រីមជាន់ខ្ពស់គណបក្សសង្គ្រោះជាតិ និងមន្ត្រីមួយចំនួនទៀតបានប្រកាសចូលរួមធ្វើនយោបាយជាមួយគណបក្សកែទម្រង់កម្ពុជា ។ នេះបើតាម លោក អ៊ូ ច័ន្ទរ័ត្ន ។
លោក អ៊ូ ច័ន្ទរ័ត្ន សមាជិក និងជាអតីតមន្ត្រីជាន់ខ្ពស់គណបក្សង្គ្រោះជាតិបានឲ្យកោះសន្តិភាពដឹង នៅថ្ងៃទី២៧ ឧសភា ឆ្នាំ២០២១ លោក ប៉ុល ហំម និងមេធាវី ផាន់ ច័ន្ទសាក់ ទើបត្រូវបានផ្តល់សម្បទានសិទ្ធិធ្វើនយោបាយបានប្រកាសចូលរួមជាមួយគណបក្សកែទម្រង់កម្ពុជាហើយ ។
លោក អ៊ូ ច័ន្ទរ័ត្ន បន្តថា លោកកំពុងជជែកគ្នាជាមួយអតីតមន្ត្រី ប្រឆាំងមួយចំនួនទៀត ដើម្បីពួកគេចូលមកគណបក្សនេះផងដែរ ។ លោកបញ្ជាក់ថា«យើងគម្រោងហៅមន្ត្រីសុំសិទ្ធិធ្វើនយោបាយផ្សេងទៀត មកចូលរួមជីវភាពជាមួយបក្សកែទម្រង់កម្ពុជាថ្មីនេះ»។
ជាមួយគ្នានោះដែរ លោកថា ក្រៅពីអតីតមួយចំនួនចូលរួមជាមួយគណបក្សកែទម្រង់ក៏មានលោកស្រី ទេព សុធី អតីតតំណាងខេត្តតាកែវក៏បានចូលរួមជាមួយគណបក្សថ្មីនេះដែរ ។
លោកបញ្ជាក់ថា «ការពិតយើងកំពុងជជែកគ្នាបន្តទៀតជាមួយមន្ត្រីអតីតគណបក្សសង្គ្រោះជាតិ ដើម្បីមករួបរួមនៅក្នុងគណបក្សកែទម្រង់កម្ពុជា» ។ ចំពោះមតិរបស់មន្ត្រីជំនិតរបស់ លោក សម រង្ស៊ីលើកឡើងថា ការដែលមន្ត្រីអតីតគណបក្សសង្គ្រោះជាតិសុំសិទ្ធិធ្វើនយោបាយឡើងវិញ ធ្វើឲ្យលទ្ធិប្រជាធិបតេយ្យកាន់តែធ្លាក់ចុះនោះ លោកមានយោបល់ថា មិនយល់ឃើញដូចពួកគេលើកឡើងបែបនេះទេ ព្រោះលទ្ធិប្រជាធិបតេយ្យកម្ពុជាមកទល់បច្ចុប្បន្នដូចគ្មានអ្វីប្រសើរសោះ ។ អ្វីដែលសំខាន់ត្រូវរួមកំលាំងនយោបាយឲ្យទៅជាប៉ូលថ្មីមួយ ដើម្បីស្តារលទ្ធិប្រជាធិបតេយ្យឡើងវិញ ។ នេះជាកាតព្វកិច្ចរបស់ពលរដ្ឋខ្មែរ បើមិននាំគ្នាធ្វើអ្វីទេមិនអាចស្តារឡើងវិញបានឡើយ ។
គម្រោងបន្តការហៅមន្ត្រីនៃអតីតគណបក្សសង្គ្រោះជាតិបន្ទាប់មន្ត្រីខ្លះៗបានស្ម័គ្រចិត្តរួចហើយ ។ ឃើញថា ក្រោយបើកសិទ្ធិឲ្យសុំធ្វើនយោបាយឡើងវិញ មានមន្ត្រីជាបន្តបន្ទាប់បានដាក់លិខិតបំពេញបែបបទសុំសិទ្ធិដូចជា ៖ លោក ប៉ុល ហំម លោក ញ៉ែម ប៉ុញ្ញឬទ្ធិ លោកមុត ចន្ថា លោកស្រី លីស្រី វិណា និងមន្ត្រីមួយចំនួនទៀត ។
សូមបញ្ជាក់ថា កាលពីថ្ងៃទី១៦ ខែមីនា ឆ្នាំ២០២១សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានសម្រេចអនុញ្ញាតឲ្យបង្កើតគណបក្សកែទម្រង់កម្ពុជា ដែលសរសេរជាអក្សរកាត់ «គកក» និងមានឈ្មោះជាអក្សរឡាតាំង «CAMBODIA REFORM PARTY» ។
គណបក្សមានទីស្នាក់ការកណ្តាល ផ្ទះលេខ៥១៥ ផ្លូវជាតិលេខ៥ ភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង ៕
ចែករំលែកព័តមាននេះ