ខេត្តបន្ទាយមានជ័យ ៖ បុរសម្នាក់ក្រោយរងរបួសធ្ងន់ ខ្លះថាដោយសារគ្រោះថ្នាក់ចរាចរណ៍ធម្មតា ខ្លះសង្ស័យថាអាចជារឿងគំនុំត្រូវគេបើករថយន្តបំបុក ចំណែកគ្រួពេទ្យថាអាចត្រូវនរណាម្នាក់កាប់និងកាំបិត ត្រូវបានសាច់ញាតិលើកផ្លោះរបងទ្វារព្រំដែនអន្តរជាតិខ្លងលឹក យកទៅព្យាបាលនៅមន្ទីរពេទ្យប្រទេសថៃ កាលពីវេលាម៉ោងជិត២រំលងអធ្រាត្រឈានចូលថ្ងៃទី៨ វិច្ឆិកា…
ខេត្តបន្ទាយមានជ័យ ៖ បុរសម្នាក់ក្រោយរងរបួសធ្ងន់ ខ្លះថាដោយសារគ្រោះថ្នាក់ចរាចរណ៍ធម្មតា ខ្លះសង្ស័យថាអាចជារឿងគំនុំត្រូវគេបើករថយន្តបំបុក ចំណែកគ្រួពេទ្យថាអាចត្រូវនរណាម្នាក់កាប់និងកាំបិត ត្រូវបានសាច់ញាតិលើកផ្លោះរបងទ្វារព្រំដែនអន្តរជាតិខ្លងលឹក យកទៅព្យាបាលនៅមន្ទីរពេទ្យប្រទេសថៃ កាលពីវេលាម៉ោងជិត២រំលងអធ្រាត្រឈានចូលថ្ងៃទី៨ វិច្ឆិកា ២០១៥ ។ ហេតុការណ៍គួរឲ្យសង្ស័យខាងលើបានកើតឡើងលើដងផ្លូវជាតិលេខ៥ ក្នុងភូមិអូរជ្រៅ សង្កាត់ប៉ោយប៉ែត កាលពីវេលាម៉ោងជាង១១យប់ ថ្ងៃទី៧ខែឆ្នាំដដែល ។
ជនរងគ្រោះខាងលើឈ្មោះ សៅ នុត អាយុ២៤ឆ្នាំ ជាបុគ្គលិកកាស៊ីណូមួយកន្លែងនៅក្រុងប៉ោយប៉ែត និងមានទីលំនៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែត ។ ជនរងគ្រោះរងរបួសដាច់រយះចំណុចបំពង់កធ្ងន់ធ្ងរ ។
ប្រភពបានឲ្យដឹងថា ហេតុការណ៍គ្រោះថ្នាក់ចរាចណ៍ខាងលើគឺកើតឡើងក្នុងដំណើរស្របទិសគ្នា ដោយជនរងគ្រោះជិះម៉ូតូម៉ាកឃ្លីក ស៊េរីឆ្នាំ២០១៤ ក្នុងទិសដៅពីលិចទៅកើត ស្រាប់តែរថយន្តមួយគ្រឿងបើកបរស្របទិសគ្នាមកបុកពីក្រោយតែម្តង ។
ជុំវិញករណីគ្រោះថ្នាក់ចរាចណ៍ខាងលើ គ្រប់គ្នាមានមន្ទិលសង្ស័យថា ម៉ូតូជនរងគ្រោះបើកមកពីលិច ឯរថយន្តបង្កក៏បើកមកពីទិសលិច ហេតុដូចម្តេចបែរជាស្នាមបុកពេញទំហឹងពីមុខម៉ូតូជនរងគ្រោះទៅវិញ ។ ម្យ៉ាងទៀតយោងតាមការជួបផ្ទាល់មាត់ជាមួយសាច់ញាតិជនរងគ្រោះ ខាងក្រុមគ្រូពេទ្យថៃប្រាប់ថា មុខរបួសមិនមែនជាករណីចរាចណ៍ទេ អាចជាការកាប់និងកាំបិតពីនណាម្នាក់ ។
ជុំវិញករណីនេះដែរ នគរបាលជំនាញចរាចណ៍សណ្តាប់ធ្នាប់សាធារណៈក្រុងបានប្រាប់ថា សមត្ថកិច្ចក៏កំពុងមានចម្ងល់ដែរ ព្រោះថា បើគ្រោះថ្នាក់ចរាចណ៍កើតឡើងស្របទិសគ្នា ហេតុអ្វីម៉ូតូ និងជនរងគ្រោះត្រូវគេបុកពីមុខទៅវិញ ។
យ៉ាងណាក៏ដោយ ក្រុមសាច់ញាតិបញ្ជាក់ថា មានតែជនរងគ្រោះទេទើបអាចដឹងពីការពិត ព្រោះមុនកើតហេតុមានគេទូរស័ព្ទហៅពីកន្លែងផឹកស៊ី លុះមកដល់កន្លែងកើតហេតុក៏កើតមានបញ្ហាតែម្តង ។ សាច់ញាតិប្រាប់ថា ជនរងគ្រោះពេលនេះសន្លប់ស្តូកស្តឹងក្នុងមន្ទីរពេទ្យថៃនៅឡើយ ៕
ចែករំលែកព័តមាននេះ