ខេត្តពោធិ៍សាត់ ៖ ស្រូវពូជ IR 504 ទម្ងន់១០តោន ដែលកសិករនិយមហៅជាភាសាវៀតណាមហៅថា ណាំខុងបូង របស់មន្ទីរកសិកម្មខេត្តពោធិ៍សាត់ ត្រូវបានលោក ម៉ៅ ធនិន អភិបាល នៃគណៈអភិបាលខេត្ត នាំយកទៅចែកជូនដល់ប្រជាកសិករចំនួន២៥០គ្រួសារ ជំហាន២ សម្រាប់ធ្វើស្រែចុងរដូវនៅឃុំស្វាយដូនកែវ និងឃុំអូរតាប៉ោង កាលពីថ្ងៃទី៧ ខែ វិច្ឆិកា ២០១៥ ។ ពិធីនេះបានប្រារព្ធធ្វើនៅលើខ្នងប្រឡាយភូមិផ្សារអណ្ដែត ឃុំអូរតាប៉ោង ដោយមានការចូលរួមពីបណ្ដាមន្ទីរមួយចំនួនក្នុងខេត្ត និងអាជ្ញាធរមូលដ្ឋានផងដែរ ។
លោក ម៉ៅ ធនិន អភិបាល នៃគណៈអភិបាលខេត្តពោធិ៍សាត់ បានមានប្រសាសន៍ថា ដោយសារការងារបង្កបង្កើនផលស្រូវរដូវវស្សា ភ្លៀងធ្លាក់តិចតួចដោយកន្លែង និងកន្លែងខ្លះទៀតពុំមានភ្លៀងសោះ ដូចជានៅឃុំអូរតាប៉ោង និងឃុំស្វាយដូនកែវនេះជាដើម ធ្វើឲ្យដំណាំស្រូវជួបបញ្ហារាំងស្ងួត រហូតមកដល់ពាក់កណ្តាលខែកញ្ញាទើបមានភ្លៀងធ្លាក់គ្រប់ទីកន្លែង ។ ដោយមើលឃើញស្ថានភាពបែបនេះអាជ្ញាធរខេត្ត និងមន្ទីរកសិកម្មខេត្ត បាននាំយកស្រូវពូជ IR 504 ទម្ងន់១០តោនមកចែកជូនប្រជាកសិករទាំង២៥០គ្រួសារ ជំហាន២ សម្រាប់បន្តធ្វើស្រូវចុងរដូវបន្ថែមទៀត ។ នេះគឺជាការព្រួយបារម្ភពីសំណាក់ថ្នាក់ដឹកនាំខេត្ត និងមន្ទីរជំនាញចំពោះប្រជាកសិករគ្រប់ពេលវេលា និងគ្រប់ទីកន្លែងទូទាំងខេត្ត ។
លោកបានឲ្យដឹងដែរថា ផ្អែកតាមរបាយការណ៍របស់មន្ទីរកសិកម្មខេត្តឃើញថា ឆ្នាំនេះការងារបង្កបង្កើនផល សម្រេចបាន១០៨.៣២៩ហិកតា លើផែនការ១០០ពាន់ហិកតា ក្នុងចំនួននោះស្រូវជួបគ្រោះរាំងស្ងួត៤៩.៨៨២ហិកតា ដោយរងប៉ះពាល់មធ្យម និងធ្ងន់ធ្ង២៤.៣២៧ហិកតា ។ ចំពោះការងារប្រមូលផលស្រូវ គិតមកដល់ដើមខែវិច្ឆិកា ២០១៥ ទូទាំងខេត្ត ស្រូវកំពុងបែកផ្កាជាង៧៦ពាន់ហិកតា កំពុងទុំជាបណ្តើរៗជាង៣១ពាន់ហិកតា និងច្រូតកាត់បានជាង១៣ពាន់ហិកតា ដោយក្នុងមួយហិកតាទទួលបានទិន្នផលជាង៣តោនទៅ៥តោន ។
ប្រជាកសិករ ដែលមកទទួលយកស្រូវពូជ IR 504 ទាំង២៥០គ្រួសារ មកពីឃុំអូរតាប៉ោង៤ភូមិ ស្មើនឹង១២៥គ្រួសារ និងមកពីឃុំស្វាយដូនកែវ៥ភូមិ ស្មើនឹង១២៥គ្រួរសារ ក្នុងមួយគ្រួសារទទួលបានស្រូវ៤០គីឡូក្រាម ដោយអមនូវសារុងម្នាក់មួយជាអំណោយរបស់លោកអភិបាលខេត្ត និងលោកជំទាវ ។
ក្រោយពីចែកជូនរួច ប្រតិភូបានអញ្ជើញទៅកាន់ភូមិតាណៃជាប់ព្រំប្រទល់ជាមួយភូមិអ្នកតាទ្វា ឃុំឫស្សីក្រាំង ស្រុកមោងឫស្សី ដែលប្រជាពលរដ្ឋនៅទីនោះបានសំណូមពរឲ្យលោកអភិបាលខេត្តជួយស្ថាបនាស្ពានឆ្លងស្ទឹងមួយកន្លែង មានប្រវែងជាង៥០ម៉ែត្រ ហើយត្រូវបានលោកឲ្យមន្ទីរអភិវឌ្ឍន៍ជនបទខេត្តពិនិត្យ និងសិក្សាជាមុនសិន ដើម្បីមានគម្រោងធ្វើការសាងសង់ ៕
ចែករំលែកព័តមាននេះ