ខេត្តសៀមរាប ៖ ភ្នំគូលែន គឺជារមណីយដ្ឋានវប្បធម៌ ប្រវត្តិសាស្ត្រ និងធម្មជាតិ ដែលកំពុងទទួលបានការចាប់អារម្មណ៍ពីអ្នកទេសចរជាតិ និងអន្តរជាតិ ។ ទន្ទឹមនឹងនេះដើម្បីបញ្ចៀសផលប៉ះពាល់ជាអតិបរមា
ខេត្តសៀមរាប ៖ ភ្នំគូលែន គឺជារមណីយដ្ឋានវប្បធម៌ ប្រវត្តិសាស្ត្រ និងធម្មជាតិ ដែលកំពុងទទួលបានការចាប់អារម្មណ៍ពីអ្នកទេសចរជាតិ និងអន្តរជាតិ ។ ទន្ទឹមនឹងនេះដើម្បីបញ្ចៀសផលប៉ះពាល់ជាអតិបរមា អាជ្ញាធរជាតិអប្សរាខិតខំយកចិត្តទុកដាក់ខ្លាំងចំពោះការអភិរក្សប្រាសាទ និងវត្ថុបុរាណនានាដែលមាននៅលើរមណីយដ្ឋានភ្នំគូលែន ធ្វើយ៉ាងណាឱ្យការអភិរក្ស និងអភិវឌ្ឍប្រកបដោយចីរភាព ។
ជាក់ស្តែងនៅថ្ងៃទី៣ ខែវិចិ្ឆកា ឆ្នាំ២០១៥ លោកឈាន រដ្ឋា ប្រធាននាយកដ្ឋានស្តីទីរបស់នាយកដ្ឋានអភិរក្សប្រាសាទក្រៅឧទ្យានអង្គរនៃអាជ្ញាធរជាតិអប្សរា បានដឹកនាំមន្ត្រី បុគ្គលិកក្រោមឱវាទទៅសិក្សារកទីតាំងចំនួន២ ដើម្បីសាងសង់រោងឆ្មាំចំនួន២ខ្នងទៀត នៅលើភ្នំគូលែន សម្រាប់ឱ្យបុគ្គលិកបច្ចេកទេស និងភ្នាក់ងារអភិរក្សប្រាសាទបំពេញការងារ ក៏ដូចជាដើម្បីឆ្លើយតបទៅនឹងអនុសាសន៍របស់កិច្ចប្រជុំ ICC អង្គរ លើកទី២៤ នាថ្ងៃទី៤ និងទី៥ ខែមិថុនា ឆ្នាំ២០១៥ ។ អាជ្ញាធរជាតិអប្សរា ដែលតម្រូវឱ្យពង្រឹងផ្នែកធនធានមនុស្ស និងធនធានសម្ភារដើម្បីអភិរក្សនិងលើកតម្លៃរមណីយដ្ឋានប្រវតិ្តសាស្ត្រនេះ ប្រកបដោយជោគជ័យ ។
ជាលទ្ធផលក្រុមការងាររកបានទីតាំងចំនួន ២ ដែលមានលក្ខខណ្ឌសមស្របអាចសាងសង់រោងឆ្មាំបាន គឺនៅតំបន់ការពារប្រាសាទរោងចិន និងនៅតំបន់ការពារស្រះដំរី ។
កន្លងមកអាជ្ញាធរជាតិអប្សរាបានសាងសង់រោងឆ្មាំ១ខ្នង និងបង្គន់អនាម័យសម្រាប់ភ្ញៀវទេសចរចំនួន១ខ្នងរួចហើយ នៅក្នុងតំបន់ «ព្រះអង្គធំ» ត្រង់វាលស្តេចគម្លង់ ។
ទន្ទឹមនឹងនេះ អាជ្ញាធរជាតិអប្សរាបានសហការជាមួយអង្គការ ADF កំណត់តំបន់ និងបោះបង្គោលព្រំការពារប្រាសាទ និងបុរាណដ្ឋានលើភ្នំគូលែនបានចំនួន ៥តំបន់ និងដាំកូនឈើចំនួន៥.០០០ដើម នៅតំបន់ការពារប្រាសាទអ្នកតា ។ ជាមួយគ្នានេះ អាជ្ញាធរជាតិអប្សរាបានដាក់បុគ្គលិកបចេ្ចកទេសផែ្នកបុរាណវិទ្យាចំនួន៣នាក់ និងភ្នាក់ងារអភិរក្សប្រាសាទចំនួន៤៨នាក់ ឱ្យបំពេញការងារនៅទីនោះ ៕
ចែករំលែកព័តមាននេះ