រាជធានីភ្នំពេញ ៖ ថ្វីដ្បិតតែព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ មិនប្រារព្ធឡើងនៅក្នុងឆ្នាំនេះក្តី ប៉ុន្តែកម្មវិធីប្រគំតន្ត្រីនានានឹងរៀបចំឡើង ។ ការប្រគំតន្ត្រីទាំងនោះនឹងជាការកម្សាន្តមួយផ្នែក
រាជធានីភ្នំពេញ ៖ ថ្វីដ្បិតតែព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ មិនប្រារព្ធឡើងនៅក្នុងឆ្នាំនេះក្តី ប៉ុន្តែកម្មវិធីប្រគំតន្ត្រីនានានឹងរៀបចំឡើង ។ ការប្រគំតន្ត្រីទាំងនោះនឹងជាការកម្សាន្តមួយផ្នែកសម្រាប់មហាជនដែលប្រាថ្នាចង់ដើរលេងកម្សាន្តក្នុងឱកាសបុណ្យអុំទូក ព្រមទាំងកម្ចាត់ភាពស្ងប់ស្ងាត់ ខណៈគ្មានភាពអឹុកអធឹកនៃព្រះរាជពិធីបុណ្យអុំទូកនោះ ។
សម្តេចតេជោហ៊ុន សែន នាយករដ្ឋមន្ត្រីបានបញ្ជាក់ពីគម្រោងប្រគំតន្ត្រីនោះ ដោយថ្លែងថា «អាជ្ញាធរត្រូវរៀបចំការប្រគំតន្ត្រីឱ្យច្រើននៅភ្នំពេញ ក្នុងថ្ងៃឈប់សម្រាកព្រះរាជពិធីបុណ្យអុំទូករយៈពេលបីថ្ងៃ ចាប់ពីថ្ងៃទី២៤ ដល់ថ្ងៃទី២៦ វិច្ឆិកា ២០១៥ ។ អ្នកចម្រៀងល្បីរបស់កម្ពុជាទាំងអស់ត្រូវយកមកច្រៀងកម្សាន្តក្នុងឱកាសនោះផងដែរ ដោយខ្ញុំជាអ្នកប៉ាវខាងសិល្បៈ» ។
នៅសួនច្បារមុខវត្តបទុមវតី នាព្រឹកថ្ងៃទី៥ វិច្ឆិកា ២០១៥ ក្នុងពិធីបើកសម្ពោធដាក់ឱ្យប្រើប្រាស់ជាផ្លូវការគម្រោងការពារទឹកជំនន់ និងកែលម្អប្រព័ន្ធប្រឡាយលូក្នុងរាជធានីភ្នំពេញជំហានទី៣ សម្តេចតេជោហ៊ុន សែន បានថ្លែងបែបនោះ ហើយថា ការផ្អាកព្រះរាជពិធីបុណ្យអុំទូកនៅឆ្នាំ២០១៥នេះ មិនមែនមកពីហេតុផលនយោបាយទេ ។ វាមកពីទឹកទន្លេនៅមុខព្រះបរមរាជវាំងមានកម្រិតទាប ក្រោម៥ម៉ែត្រ មិនមែនខ្លាចបាតុកម្មដូចជាគេលើកឡើងនោះទេ ។
សម្តេចតេជោនាយករដ្ឋមន្ត្រីចំអកថា បើសិនជាអ្នកវិភាគ ឬអ្នកនយោបាយ រាប់ទាំងតំណាងរាស្ត្រមួយចំនួនរបស់គណបក្សប្រឆាំងអះអាងថា ទោះជាទឹកទន្លេមានកម្រិតទាប ក៏អាចប្រណាំងទូកបានដែរនោះ សូមឱ្យអ្នកទាំងនោះទៅអុំ ដោយសម្តេចជាអ្នករៀបចំ និងចេញលុយ ។
ការពារការសម្រេចផ្អាករៀបចំព្រះរាជពិធីបុណ្យអុំទូក នៅឆ្នាំ២០១៥នេះ សម្តេចតេជោ ហ៊ុន សែន លើកឧទាហរណ៍មួយចំនួនថា ដូចជានៅខេត្តកំពង់ធំ ដោយសារតែទឹកមានកម្រិតទាប មិនអាចនាំទូកងមកភ្នំពេញបានទេ ។ មិនតែប៉ុណ្ណោះកីឡាករអុំទូកក៏មិនមានដែរ ព្រោះជាប់រវល់ធ្វើស្រែ ។
ការផ្គត់ផ្គង់ទូក.ងមួយគ្រឿងសម្រាប់ចូលរួមប្រណាំងនៅរាជធានីភ្នំពេញ ក្នុងកម្រិតប្រមាណ១ម៉ឺនដុល្លារ ហើយការចំណាយលើការរៀបចំព្រះរាជពិធីអុំទូកទាំងមូលក៏មិនតិចដែរ ដូច្នេះសម្តេចតេជោ ហ៊ុន សែន នាយករដ្ឋមន្ត្រីបង្វែរប្រាក់ទាំងនោះសម្រាប់ទិញប្រេងបូមទឹកសង្គ្រោះស្រូវរបស់កសិករដែលជួបគ្រោះរាំងស្ងួតវិញ ។
ថ្ងៃទី២៤,២៥ និងទី២៦ វិច្ឆិកា មិនមានព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ប៉ុន្តែនៅភ្នំពេញ មានកម្មវិធីប្រគំតន្ត្រី ដូច្នេះមហាជនអាចចូលរួមទស្សនាកម្សាន្តបាន ៕
ចែករំលែកព័តមាននេះ