ខេត្តបន្ទាយមានជ័យ ៖ ទោះបីជាស្ថានភាពជំងឺកូវីដ១៩នៅតែបន្តរាតត្បាតមិនទាន់មានកាថមថយ ទាំងនៅក្នុងប្រទេសដូចជានៅប្រទេសថៃក្តី នៅតែមានពលករខ្មែរមួយចំនួននៅតែចាញ់បោកមេខ្យល់បន្តលួចឆ្លងដែនដដែល ហើយត្រូវសមត្ថកិច្ចចម្រុះថៃចាប់បានជាបន្តបន្ទាប់ ។
ជាក់ស្តែង ពលករចំនួន១៤នាក់ត្រូវបានភាគីថៃធ្វើការចាប់ខ្លួន កាលពីថ្ងៃទី២៤ ឧសភា ២០២១ ពីគោលដៅ២ផ្សេងគ្នា ក្នុងស្រុកអារញ្ញខេត្តស្រះកែវ ។ នេះបើយោងតាមកាចុះផ្សាយរបស់គេហទំព័រនិងកាសែតក្នុងស្រុកថៃមួយ។
ប្រភពថា ពលករ១១នាក់ដែលមកពីខេត្តបាត់ដំបង និងខេត្តសៀមរាប ត្រូវបានភាគីថៃចាប់ខ្លួនក្នុងភូមិ និងឃុំថាប់ភ្រិកស្រុកអារញ្ញ ហើយក្រោយសួរនាំពួកគេប្រាប់សមត្ថកិច្ចថៃថា ប្រុងទៅធ្វើការជាកម្មករសំណង់នៅខេត្តឈុនបុរី និងក្រុងបាងកក។ដោយឡែកពលករ៣នាក់ផ្សេងទៀត ត្រូវបានភាគីថៃចាប់ខ្លួនក្នុងភូមិប៉ារ៉ៃថ្មី ឃុំប៉ារ៉ៃ ស្រុកអារញ្ញក្នុងថ្ងៃដដែល ដោយប្រាប់ថាពួកគេប្រុងទៅស៊ីឈ្នួលធ្វើការឲ្យគេនៅផ្សារ(ដិតថៃ)ក្នុងផ្សាររុងក្លឿ។
ពលករទាំង១៤នាក់ខាងលើ ក្រោយសាកសួរនិងធ្វើកំណត់ហេតុភាគីថៃក៏បានធ្វើការពិនិត្យសុខភាពតាមវិធានការរបស់ក្រសួងសុខាភិបាលរបស់គេមុនទំនាក់ទំនងបញ្ជូនឲ្យភាគីកម្ពុជាតាមច្រកតំបន់ម៉ាឡៃ ឬច្រកកិច្ចព្រមព្រៀងគឺច្រករបៀងអូរបីជាន់ក្នុងស្រុកអូរជ្រៅ ឬច្រកទ្វារអន្តរជាតិប៉ោយប៉ែត៕ ដោយ៖ មុត សារុន
ចែករំលែកព័តមាននេះ