អាជ្ញាធរមូលដ្ឋាននិយាយថា អ្នកស្លាប់ក្នុងការរញ្ជួយដីនៅភាគនិរតីប្រទេសចិន កាលពីថ្ងៃទី១០ មីនា កន្លងមក មានចំនួន២៥នាក់ ហើយមនុស្សជាង១៦០នាក់ទៀតរងរបួស ។ ការរញ្ជួយដីនេះ កម្រិត៥,៤រីស្ទ័រ កើតឡើងនៅតំបន់ក្បែរព្រំដែនជាមួយប្រទេសភូមា បណ្តាលឱ្យផ្ទះជាច្រើនខ្នង នៅតំបន់ដាច់ស្រយាលយីងជ្រៀង ខេត្តយុនណាន ត្រូវរលំបាក់ ។
ទីភ្នាក់ងារសារព័ត៌មានរដ្ឋចិនរាយការណ៍ថា ការរញ្ជួយដីនេះកើតឡើងនៅវេលាម៉ោងប្រហែល១រសៀលថ្ងៃទី១០ មីនា កាត់ផ្តាច់ការផ្គត់ផ្គង់អគ្គិសនី និងបណ្តាលឱ្យអគារសណ្ឋាគារ និងសាលារៀនដួលរលំ ។
ចំណុចកណ្តាលនៃការរញ្ជួយដីនេះគឺមានចម្ងាយ២គីឡូម៉ែត្រ ពីសង្កាត់យីងជៀង មានប្រជាពលរដ្ឋ២៧០.០០០នាក់ ភាគច្រើនជាជនជាតិភាគតិច ។
រដ្ឋមន្ត្រីការបរទេសសហរដ្ឋអាមេរិក លោកស្រីហ៊ីល ឡារី គ្លីនតុន ជំនួសមុខឱ្យលោកប្រធានាធិបតីបារ៉ាក់ អូបាម៉ា បានសម្តែងសមានទុក្ខ និងរួមរំលែកទុក្ខជាមួយគ្រួសារជនរងគ្រោះក្នុងការរញ្ជួយដីនេះ ៕
ចែករំលែកព័តមាននេះ