ខេត្តកំពង់ឆ្នាំង ៖ ប្រជាពលរដ្ឋមួយគ្រួសារបានស្នើសុំកាសែតទូរទស្សន៍ជួយផ្សព្វផ្សាយនូវភាពអយុត្តិធម៌ដ៏រ៉ាំរ៉ៃច្រើនឆ្នាំ ដោយសារមានបណ្តឹងពីភាគីដើមចោទ ដោយចោទប្រកាន់ច្រើនលើកច្រើនសាដែលពីដំបូងប្តឹងទាមទារដីកេរ្តិ៍ បន្ទាប់មកប្តឹងទំនាស់ដីធ្លី និងចុងក្រោយប្តឹងចោទជាកូនបំណុលទៅវិញ ហើយត្រូវតុលាការខេត្តចុះមកអានដីការក្សារការពារ នៅព្រឹកថ្ងៃទី០៤ វិច្ឆិកា ២០១៥ តែគ្រួសារខាងលើមិនព្រមទទួលយកឡើយ។
បុរសឈ្មោះ សឿង ម៉ារ៉ា អាយុ៥២ឆ្នាំ រសនៅភូមិទី៧ សង្កាត់ខ្សាម ក្រុងកំពង់ឆ្នាំង បានរៀបរាប់ថា មុនដំបូងឡើយបុរសឈ្មោះ អ៊ិន ណារី បានប្តឹងទាមទារដីកេរ្តិ៍ពីសង្គមចាស់ដែលគ្រួសារគាត់កំពុងរស់នៅតាំងពីឆ្នាំ១៩៧៩ មកដល់សព្វថ្ងៃ មានទំហំ៣៦គុណ១០០ម៉ែត្រ ជាដីស្របច្បាប់មានអាជ្ញាធរភូមិ-ឃុំ និងស្រុកទទួលដឹងឮ មានទាំងបង្កាន់ដីទៀតផង តែប្តឹងទាមទារមិនបានសម្រចក៏ប្រែបណ្តឹងទៅជាប្តឹងទំនាស់ដីធ្លីវិញ ប៉ុន្តែនៅតែមិនបានសម្រេចទៀត ក្រោយមកក៏ប្រែមកប្តឹងថា ម្តាយក្មេកគាត់ឈ្មោះ ប៉ែន វ៉ាត ជាកូនបំណុលទៅវិញ ខណៈដែលគ្រួសារគាត់មិនដែលខ្ចីប្រាក់ពីឈ្មោះ អ៊ិន ណារី មួយរៀលម្តងណាឡើយ ។
ហើយបណ្តឹងទាំងនេះបានអូសបន្លាយរាប់ឆ្នាំ តាំងពីសាលាដំបូងដល់សាលាកំពូល និងបានចុះមកអនុវត្តសាលាដីកាជាច្រើនសា តែគ្រួសារគាត់នៅតែក្រាញននាល មិនព្រមចេញពីដីនេះ ព្រោះគាត់យល់ថា អយុត្តិធម៌ខ្លាំងពេក ។
បុរសរូបនោះបានបន្តថា ដោយសារតែអំពើអយុត្តិធម៌បែបនេះហើយ ទើបគ្រួសារគាត់បានប្តឹងថ្វាយទៅព្រះមហាក្សត្រ ហើយត្រូវបានព្រះមហាក្សត្រឡាយព្រហស្ថ ចុះថ្ងៃទី១៥ កុម្ភៈ ២០១០ ជូនសម្តេចហ៊ុនសែន បន្ទាប់មក លោកហូ សិទ្ឋិ នាយខុទ្ឋកាល័យសម្តេចហ៊ុន សែន ចុះហត្ថលេខា ថ្ងៃទី២៣ កុម្ភៈ ២០១០ បញ្ជូនលោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ ដោយសុំកុំឱ្យអនុវត្តសាលដីការបស់សាលាកំពូលលេខ ៥១៦ ចុះថ្ងៃទី២១ ធ្នូ ២០០៧ ។
ដោយសារតែកាប្តឹងទាមទារមិនបានសម្រចនេះហើយទើបដើមបណ្តឹងកាឡៃមកជាប្តឹងទាមទារបំណុលវិញ ដោយចោទម្តាយក្មេកគាត់ឈ្មោះ ប៉ែន វ៉ាត ជាកូនបំណុល ទើបនៅព្រឹកថ្ងៃទី០៤ វិឆ្ឆិកា តុលាការខេត្តបានមកអានដីការក្សាការពារលើដីរបស់គាត់ទៅវិញ តែគាត់មិនឱ្យចូលក្នុងរបងភូមិគាត់ឡើយ ។
ក្រុមគ្រួសារគាត់បានសំណូមពរជាថ្មីដល់តុលាការខេត្តមេត្តាបញ្ឈប់សកម្មភាពរុកគួនគ្រួសារគាត់តាមបណ្តឹងរបស់ឈ្មោះ អ៊ិន ណារី ទៀតទៅ និងសំណូមពរដល់សម្តេចនាយករដ្ឋមន្ត្រី ហ៊ុន សែន សូមសម្តេច មេត្តាជួយរកយុត្តធម៌ជូនគ្រួសារគាត់ជាថ្មីទៀតផង ៕
ចែករំលែកព័តមាននេះ