រាជធានីភ្នំពេញ ៖ នាពេលកន្លងមកតារាសម្តែង នី មុនីនាថ រសាត់ប៉ះជាមួយព័ត៌មានថា បានភ្ជាប់ចំណងស្នេហ៍ជាមួយថៅកែកុនផង និងជាមួយអ្នកជំនួញផង ។ បណ្តាព័ត៌មានលេចឮមិនប្រាកដប្រជាទាំងនោះបង្កឱ្យតារាទឹកភ្នែក នី មុនីនាថ ល្វីងមុខមិនស្ទើរទេ ។
មហាជនកត់សម្គាល់ឃើញថា កញ្ញានី មុនីនាថ ហាក់មិនសមប្រកបជាមួយចំណងស្នេហាសោះ ។ ពីមុនតារាសម្តែងរូបនេះធ្លាយដំណឹងថា បុរសអាណិកជននៅអាមេរិកតាមស្នេហ៍រហូតឈានដល់ភ្ជាប់ពាក្យភ្ជាប់សម្តី មានចាស់ទុំដឹងឮទៀតផង ។ លើសពីនេះទទួលដំណឹងថា មុនីនាថ អាចនឹងចូលរោងការតាមគន្លងប្រពៃណី រួចហើយនឹងចាកចេញពីស្រុកកំណើតទៅសាងអនាគតថ្មីជាមួយស្វាមីនៅអាមេរិកដូចមិត្តភក្តិគឺនាងសារាយ សក្ខណា ដែរ ។
ក្រោយមកទាំងមុនីនាថ និងម្តាយរបស់នាងអះអាងថា នោះជារឿងយល់ច្រឡំ និងបដិសេធថាមិនបានភ្ជាប់ពាក្យទេ ។ ម្ល៉ោះហើយព័ត៌មានរៀបការរបស់នី មុនីនាថ ថា នឹងធ្វើឱ្យកក្រើកក្នុងសង្គមសិល្បៈនាចុងឆ្នាំ២០១៥នេះ មិនឃើញកើតឡើងទេ ។ ទោះជាយា៉ងណាក្តី នៅចុងឆ្នាំនេះ នី មុនីនាថ លេចឮថាភ្ជាប់ចំណងស្នេហ៍ជាមួយថៅកែផលិតកម្មមួយឈ្មោះ «ប៊ីខេអេស» គឺលោកភក្តី ។ ថៅកែរូបនោះ ក្រៅពីមានប្រាក់ច្រើនក៏មានវ័យក្មេង សង្ហា និងជាតារាចម្រៀងទៀតផង ។ ម្ល៉ោះហើយចាប់តាំងពីផលិតកម្មថ្មីនេះកកើតឡើងមក គេតែងតែឃើញមុនីនាថ ចេញចូលជាមួយផលិតកម្មនេះ ហើយឧស្សាហ៍បង្ហោះរូបភាពស្និទ្ធស្នាលគ្នាលើទំព័រហ្វេសប៊ុករបស់តារាពីរដួងនេះ ។
ជំនួបក្នុងពិធីក្រុងពលីដំណើរការថតរឿង «វិស្សមកាលមរណៈ» នី មុនីនាថ បានបកស្រាយទាក់ទិននឹងចម្ងល់មហាជន ក៏ដូចជាសារព័ត៌មានថា នាង និងថៅកែផលិតកម្មប៊ីខេអេស ពិតជាស្និទ្ធស្នាលគ្នាប្រាកដមែន តែមិនអាចកើតចេញជារឿងស្នេហាទេ ។ «រវាងលោកភក្តី និងនាងខ្ញុំ គឺមានវ័យខុសគ្នាឆ្ងាយ គាត់មានវ័យប្អូនខ្ញុំ៥ទៅ៦ឆ្នាំ មិនអាចកើតចេញជាស្នេហាបានទេ គឺភាពផ្អែមល្ហែមនេះជាការរាប់អានបែបបងប្អូនធម៌ប៉ុណ្ណោះ ។ អត់មានអ្វី គឺអត់ហើយ ។ បើនិយាយពីភាពស្និទ្ធ គឺស្និទ្ធជាមួយឪពុកម្តាយគាត់ខ្លាំងជាងគាត់ទៅទៀត ។ កាន់តែខុស គឺលោកភក្តី គាត់នឹងចូលរោងការនៅខែធ្នូចុងឆ្នាំនេះថែមទៀត ។ អុីចឹងហើយសូមកុំភ្ជាប់ជាមួយនឹងរឿងមួយនេះទៀតអី ហើយក៏មិនខុសអ្វីដែរបើគ្រាន់តែបង្ហោះរូបភាព សប្បាយៗបែបមិត្តភក្តិ គឺគ្មានប្លែកទេ អាចមកពីគេគិតថានាងខ្ញុំជាតារាម្នាក់គេស្គាល់ច្រើនទើបយល់បែបនេះ ។ យ៉ាងណាក្តី នាងខ្ញុំសុំមិននិយាយអ្វីវែងឆ្ងាយនោះទេ ពិសេសបណ្តារឿងស្នេហា គឺនាងសុំមិនបកស្រាយ ។ ចាប់តាំងពីមានព័ត៌មានផ្សេងៗមក នាងខ្ញុំពិតជាខ្លាចព័ត៌មានណាស់ គេចុះផ្សាយពីនេះ ពីនោះ រហូតលែងចង់ជួបមុខអ្នកសារព័ត៌មានហើយ ព្រោះពេលខ្លះព័ត៌មានមួយចំនួនប៉ះពាល់អារម្មណ៍ និងកេរ្តិ៍ឈ្មោះដែរប៉ុន្តែនាងខ្ញុំនៅតែស្វាគមន៍រាល់ការបកស្រាយមិនគេចចៀសអ្នកកាសែតឡើយ ព្រោះនាងខ្ញុំយល់ច្រើនពីតារាដែលមានការចាប់អារម្មណ៍កាន់តែខ្ពស់កាន់តែត្រូវខ្យល់» ។ កញ្ញានី មុនីនាថ ក្នុងឆ្នាំ២០១៥នេះ បានសាងស្នាដៃភាពយន្តច្រើន។ មិនតែប៉ុណ្ណោះនាងធ្វើជាពិធីការិនី និងច្រៀងក្នុងពិធីមង្គលការផងដែរ ៕
ចែករំលែកព័តមាននេះ