ខេត្តត្បូងឃ្មុំ ៖ ដោយមើលឃើញពីភាពលំបាករបស់ទុរគតជនមួយគ្រួសារដែលមានគ្នា៣នាក់ ក្នុងនោះប្រពន្ធពិការភ្នែកសងខាង កូនស្រីមានជំងឺឆ្កួតជ្រូក រស់នៅជួបការលំបាក នៅក្នុងភូមិម្កោថ្មី ឃុំទន្លូង ស្រុកមេមត់ ត្រូវបានលោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត បាននាំយកអំណោយទៅជួយឧបត្ថម្ភនាព្រឹកថ្ងៃទី៤ វិច្ឆិកា ២០១៥ ដែលអមដំណើរដោយលោកអភិបាលរងស្រុកមេមត់ ព្រមទាំងសហការីផងដែរ ។
លោកវរសេនីយ៍ត្រី ហុង គឹមហឿន អធិការនគរបាលស្រុកមេមត់ បានប្រាប់ឲ្យដឹងថា ក្រោយពីរូបលោកបានផ្លាស់មកកាន់នៅអធិការដ្ឋាននគរបាលស្រុកមេមត់ ដោយបានចុះពង្រឹងការងារសន្តិសុខ និងសណ្តាប់ធ្នាប់ជូនដល់ពលរដ្ឋនៅតាមបណ្តាឃុំនានា ក្នុងនោះគឺការពង្រឹងគោលនយោបាយភូមិ-ឃុំមានសុវត្ថិភាពទាំង៩ចំណុចរបស់ក្រសួងមហាផ្ទៃ ។ លោកបន្តថា នៅពេលកន្លងទៅរូបលោកបានចុះទៅកាន់ភូមិម្កោថ្មី ឃុំទន្លូង បានជួបនឹងគ្រួសារមួយឈ្មោះ សែម កែម ជាអតីតមេភូមិនោះ មានប្រពន្ធឈ្មោះ ឆាន់ ទុំ ពិការភែ្នកទាំងសងខាង ចំណែកកូនស្រីវ័យ២២ឆ្នាំ មានជំងឺឆ្កួតជ្រូកទៀត រស់នៅជួបនឹងការលំបាកណាស់ គឺប្តីបានចេញទៅរើសដំឡូងបាន១ថ្ងៃ៤-៥គីឡូក្រាមដើម្បីលក់យកលុយទិញអង្ករដាំបាយហូបទាំងត្រដាបត្រដួសបំផុត ស្របពេលដែលលោកស្នងការនគរបាលខេត្តត្រឡប់មកពីបំពេញភារកិច្ចនៅឃុំជាំវិញ ក៏បានយកអំណោយរួមានដូចជា អង្ករ៥០គីឡូក្រាម ធុងទឹកចម្រោះបរិសុទ្ធ មី ត្រីខ ត្រីងៀត ឆៃប៉ូវ កន្ទេល ភួយ មុង ទឹកត្រី រួមនិងរបស់របរផ្សេងៗទៀត អមដោយថវិការចំនួន១០ម៉ឺនរៀលផងដែឬ ។
នៅពេលដែលទទួលបានអំណោយនេះ លោកតា និងលោកយាយមានទឹកចិត្តត្រេកអរជាពន់ពេក ដោយបានស្រក់ទឹកភ្នែករលីងរលោង ជាមួយគ្នានោះដែរលោកតាក៏បានលើកដៃសំពះបួងសួងសូមឲ្យទេវតាជួយថែរក្សា ការពារលោកស្នងការនគរបាលខេត្ត ព្រមទាំងសហការីឲ្យជួបតែសេចក្តីសុខសាន្តគ្រប់ពេលវេលា ។
លោកអធិការនគរបាលស្រុកមេមត់ បញ្ជាក់ថា នៅចុងសប្តាហ៍នេះរូបលោកនឹងបន្តចុះនាំយកអំណោយទៅចែកដល់ទុរគតជនបន្តនៅកន្លែងផ្សេងទៀតនៅស្រុកមេមត់ ដើម្បីរួមចំណែកជួយដល់សង្គមជាតិ ៕
ចែករំលែកព័តមាននេះ