ខេត្តឧត្តរមានជ័យ៖ គេបានធ្វើការសង្កេតឃើញថា ប៉ុន្មានថ្ងៃនេះ មានរថយន្តប្រភេទយក្សជាច្រើនគ្រឿង ដឹកជញ្ជូនឈើប្រភេទលេខ២ ជាច្រើនគ្រឿង ចេញពីខេត្តឧត្តរមានជ័យ ឆ្ពោះទៅខេត្តបាត់ដំបង។ ករណីនេះ មន្ត្រីជំនាញ អះអាងថា មានច្បាប់ត្រឹមត្រូវ។
ប្រជាពលរដ្ឋ ដែលមានទីលំនៅឋានក្បែរៗ ដងផ្លូវជាតិលេខ២៥ និងផ្លូវជាតិលេខ២៦ បានរាប់រៀបឱ្យអ្នកយកព័ត៌មានកោះសន្តិភាពដឹងថា ពួកគាត់ រស់នៅតាមដងផ្លូវជាតិ តែងតែសង្កេតឃើញ មានរថយន្តធុនធំ ដឹកជញ្ជូនឈើប្រភេទលេខ២ ដោយដឹកបន្តកន្ទុយគ្នា ហើយជួនពេលខ្លះ គេបានឃើញមានមន្ត្រីជំនាញ រួមទាំងមានស្ថាប័នសមត្ថកិច្ច ស្ទាក់ឃាត់ផងដែរ។ តែបន្តិចក្រោយមក ស្រាប់តែរថយន្ត ដែលដឹកឈើទាំងនោះ បើកបរចេញដោយរលូន។
ទាក់ទិនទៅនឹងព័ត៌មាន ដែលប្រជាពលរដ្ឋ លើកឡើងពីករណីរថយន្តដឹកឈើនេះ កោះសន្តិភាពបានទូរស័ព្ទ ធ្វើបទសម្ភាសន៍លោក អ៊ឹម សៅរិទ្ធ នាយខណ្ឌរដ្ឋបាលព្រៃឈើ ខេត្តឧត្តរមានជ័យ។ លោកបានឱ្យដឹងថា រថយន្ត ដែលដឹកជញ្ជូនឈើទាំងនេះ គឺចេញពីខេត្តមណ្ឌលគិរី ឆ្ពោះទៅខេត្តបាត់ដំបង ហើយការដឹកជញ្ជូនឈើ ដោយមានប៉េសេត្រឹមត្រូវរបស់ក្រុមហ៊ុនដឹកជញ្ជូន និងមានការឯកភាពពីក្រុមអាជ្ញាធរគ្រប់លំដាប់ថ្នាក់ផងដែរ៕ ឱម សារឿន
ចែករំលែកព័តមាននេះ