នៅថ្ងៃទី១៨ ខែឧសភា ឆ្នាំ២០២១ ក្រុមឆ្លើយតបបន្ទាន់មន្ទីរសុខាភិបាលខេត្តប៉ៃលិន បានរកឃើញវិជ្ជមានជំងឺកូវីដ១៩ ចំនួន៣ករណី ដែលមានឈ្មោះដូចខាងក្រោម ៖
ខេត្តប៉ៃលិន ៖ យោងតាមសេចក្តីប្រកាសព័ត៌មានរបស់រដ្ឋបាលខេត្តប៉ៃលិន បានឱ្យដឹងថា ៖ នៅថ្ងៃទី១៨ ខែឧសភា ឆ្នាំ២០២១ ក្រុមឆ្លើយតបបន្ទាន់មន្ទីរសុខាភិបាលខេត្តប៉ៃលិន បានរកឃើញវិជ្ជមានជំងឺកូវីដ១៩ ចំនួន៣ករណី ដែលមានឈ្មោះដូចខាងក្រោម ៖
ទី១- ឈ្មោះ សុង រ៉ា ភេទស្រី អាយុ៦៤ឆ្នាំ ជនជាតិខ្មែរ មុខរបរលក់ខោអាវជជុះផ្សារកូនដំរី រស់នៅស្រុកម៉ាឡៃ ខេត្តបន្ទាយមានជ័យ ទី២- ឈ្មោះ សូ ញាក់ ភេទប្រុស អាយុ៦២ឆ្នាំ (ប្តី) ជនជាតិខ្មែរ និងទី៣- ឈ្មោះ ថា វី ភេទស្រី អាយុ៦២ឆ្នាំ (ប្រពន្ធ) ជនជាតិខ្មែរ ទាំងពីរនាក់ ធ្វើចំការ រស់នៅភូមិធ្លោកវៀន ស្រុកសាមគ្គីមានជ័យ ខេត្តកំពង់ឆ្នាំង ។
ប្រភពបន្តទៀតថា ប្រវត្តិនៃការធ្វើដំណើរ ៖ គឺនៅថ្ងៃទី១៦ ខែឧសភា វេលាម៉ោង៦ព្រឹក ស្ត្រីឈ្មោះ សុង រ៉ា បានធ្វើដំណើរចេញពីស្រុកម៉ាឡៃ ឆ្ពោះទៅផ្ទះប្អូននៅភូមិកូនដំរី ឃុំនិមិត្ត ស្រុកអូរជ្រៅ ខេត្តបន្ទាយមានជ័យ ស្នាក់ទីនោះបាន១យប់ (ផ្ទះប្អូនខាងក្រោយការ៉ាសសាំងកូនដំរី)។ លុះនៅថ្ងៃទី១៧ ខែឧសភា ស្ត្រីឈ្មោះ សុង រ៉ា បានធ្វើដំណើរចេញពីភូមិកូនដំរី ឃុំនិមិត្ត សំដៅមកភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដើម្បីយកខោអាវមកលក់នៅផ្សារព្រំ ។ ប៉ុន្តែពេលមកដល់ចំណុចព្រំប្រទល់ខេត្តបាត់ដំបង និងខេត្តប៉ៃលិន ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ក្រុមឆ្លើយតបបន្ទាន់មន្ទីរសុខាភិបាល ប្រចាំការនៅប៉ុស្តិ៍ត្រួតពិនិត្យសុខាភាពភ្នំកុយ បានធ្វើតេស្តរហ័សចំនួន៣លើក រកឃើញថា វិជ្ជមានកូវីដ១៩ ហើយក្រុមការងារក៏បានបញ្ជូនវត្ថុសំណាកទៅធ្វើតេស្តនៅមន្ទីរពិសោធន៍ ខេត្តបាត់ដំបង លទ្ធផលវិជ្ជមានដដែល ។
ប្រភពដដែលបញ្ជាក់ថា ៖ នៅថ្ងៃទី១៦ ខែឧសភា បុរសឈ្មោះ សូ ញាក់ និងប្រពន្ធឈ្មោះ ថា វី បានធ្វើដំណើរដោយរថយន្តផ្ទាល់ខ្លួនម៉ាក Mazda ពាក់ស្លាកលេខ ភ្នំពេញ 2AG-5445 ពណ៌ស អ្នករួមដំណើរ០៥នាក់ ចេញពីភូមិធ្លោកវៀន ឃុំធ្លោកវៀន ស្រុកសាមគ្គីមានជ័យ ខេត្តកំពង់ឆ្នាំង ឆ្ពោះមកភូមិអូរដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។ ក្នុងពេលធ្វើដំណើរបានឈប់កន្លែងចាក់សាំងនៅម្តុំពុកឆ្មា មានលក់សត្វស្លាប (ខេត្តបាត់ដំបង រួចបន្តដំណើរចូលតាមច្រករ៉ែដែក ស្រុកសំឡូត មកខេត្តប៉ៃ លិន វេលាម៉ោង៥ល្ងាច) ។
គួរបញ្ជាក់ថា អ្នកប៉ះពាល់ជាមួយ ឈ្មោះ សុង រ៉ា គឺមានឈ្មោះ ពៅ រស់នៅភូមិកូនដំរី ឃុំនិមិត្ត ស្រុកអូរជ្រៅ ខេត្តបន្ទាយមានជ័យ និងអ្នកបើកបររថយន្ត ដោយមានអ្នករួមដំណើរ៤នាក់ ។ បច្ចុប្បន្ន មន្ត្រីសុខាភិបាល ខេត្តប៉ៃលិន បាននាំយកទៅធ្វើចត្តាឡីស័ករួចហើយ ។
ចំណែកអ្នកប៉ះពាល់ជាមួយនឹងឈ្មោះ សូ ញាក់ ភេទប្រុស និងប្រពន្ធ ឈ្មោះ ថា វី មានដូចជា ៖ ទី១- ឈ្មោះ ញ៉ង ផេង ភេទប្រុស អាយុ៤១ឆ្នាំ ទី២- ឈ្មោះ ហូរ រ៉េត ភេទស្រី អាយុ៣៩ឆ្នាំ ទី៣- ឈ្មោះ មាន ធារ៉ា ភេទប្រុស អាយុ០៨ឆ្នាំ ទី៤- ឈ្មោះ មាន បញ្ញា ភេទប្រុស អាយុ០២ឆ្នាំ ទី៥- ឈ្មោះ លី ស្មាអែល ភេទប្រុស អាយុ២៣ឆ្នាំ ទី៦- ឈ្មោះ ម៉ាន់ ទួន ភេទប្រុស អាយុ២៥ឆ្នាំ ទី៧- ឈ្មោះ អុង ចាន់រី ភេទប្រុស អាយុ២៣ឆ្នាំ ទី៨- ឈ្មោះ វ៉ាន ស៊ីណា ភេទប្រុស អាយុ១៨ឆ្នាំ ទី៩- ឈ្មោះ អេង ឆន ភេទប្រុស អាយុ៥៩ឆ្នាំ ទី១០- ឈ្មោះ តាត ណៃ ភេទប្រុស អាយុ២៤ឆ្នាំ និងទី១១- ឈ្មោះ សុក ខឿន ភេទស្រី អាយុ២៣ឆ្នាំ ។
គួរបញ្ជាក់ទៀតថា ទោះបីជាយ៉ាងណា ឈ្មោះ សុង រ៉ា មិនទាន់បានឆ្លងចូលមកក្នុងទឹកដីខេត្តប៉ៃលិននោះទេ ដូច្នេះមិនទាន់មានការប្រាស្រ័យទាក់ទងផ្ទាល់ ឬប្រយោលជាមួយអ្នកទាំងអស់ខាងលើឡើយ។ ដូច្នេះសូមតាមដានសុខភាព ត្រូវយកវត្ថុសំណាកទៅពិនិត្យនៅមន្ទីរសុខាភិបាល ឬមន្ទីរពេទ្យបង្អែកខេត្ត ។ អាស្រ័យដូចបានជម្រាបខាងលើ សូមសាធារណជន និងបងប្អូនប្រជាពលរដ្ឋជ្រាបជាព័ត៌មាន និងចូលរួមអនុវត្តឱ្យបានខ្ជាប់ខ្ជួននូវវិធានការ «៣ការពារ ៣កុំ» របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឱ្យមានប្រសិទ្ធភាពខ្ពស់ ៕
ចែករំលែកព័តមាននេះ