យោងតាម YONHAP ថា បន្ទាប់ពីកិច្ចប្រជុំកំពូលត្រីភាគីរវាងកូរ៉េខាងត្បូង ជប៉ុន និងចិន សេចក្តីថ្លែងការណ៍រួមសន្តិភាព និងកិច្ចសហប្រតិបត្តិការមួយត្រូវបានអនុម័តកាលពីថ្ងៃទី១ វិច្ឆិកា នៅវិមានប្រធានាធិបតី គឺវិមានពណ៌ខៀវ ហើយប្រធានាធិបតីកូរ៉េខាងត្បូង លោកស្រី PARK GEUN HYE មានប្រសាសន៍ថា ប្រទេសទាំង៣នឹងខិតខំធ្វើឱ្យសម្រេចនូវសន្តិភាព និងស្ថេរភាពក្នុងតំបន់ដោយគោរពស្មារតីបែរឆ្ពោះទៅរកអនាគត និងទស្សនៈត្រឹមត្រូវលើរឿងប្រវត្តិសាស្ត្ររវាងប្រទេសទាំង៣ ។
ស្តីពីបញ្ហាទាក់ទិននឹងប្រវត្តិសាស្ត្រដែលធ្វើឱ្យប៉ះពាល់ដល់ទំនាក់ទំនងត្រីភាគី ប្រទេសទាំង៣ គ្រាន់តែអះអាងពីគោលការណ៍នៃទស្សនៈត្រឹមត្រូវមួយលើរឿងប្រវត្តិសាស្ត្រ និងស្មារតីបែរឆ្ពោះទៅរកអនាគត ដោយពុំសម្រេចបានកិច្ចព្រមព្រៀងមួយបន្ថែមទៀតឡើយ ។ ជម្លោះនៅសមុទ្រចិនខាងត្បូង ឬបញ្ហាដែនដីឯទៀតៗពុំត្រូវបានលើកឡើងក្នុងពេលជួបគ្នាកំពូលត្រីភាគីលើកទី៦នេះឡើយ ។
ប្រទេសទាំង៣ក៏ព្រមព្រៀងគ្នាដែរ ធ្វើសកម្មភាពរួមនានា ដែលសំដៅឱ្យការចរចា៦ភាគីស្តីពីការរំសាយនុយក្លេអ៊ែរកូរ៉េខាងជើង អាចដំណើរការឡើងវិញដោយឆាប់រហ័ស ។
លោកស្រី PARK ក្នុងសន្និសីទសារព័ត៌មានរួមមួយក្រោយកិច្ចប្រជុំកំពូលនេះវាយតម្លៃថា ទទួលបានលទ្ធផលជាវិជ្ជមានសម្រាប់ស្តារឡើងវិញនូវរចនាសម្ព័ន្ធនៃកិច្ចសហប្រតិបត្តិការត្រីភាគី ហើយធានាសន្តិភាព និងភាពរុងរឿងនៅអាស៊ីភាពឦសាន ។
ចំពោះបញ្ហានុយក្លេអ៊ែរកូរ៉េខាងជើង មេដឹកនាំទាំង៣រូបអះអាងជាថ្មីពីការប្រឆាំងចំពោះការពង្រីកនុយក្លេអ៊ែរនៅឧបទ្វីបកូរ៉េ ។ ប្រទេសទាំង៣អះអាងរួមគ្នាថា ប្រឆាំងរាល់សកម្មភាពដែលរំលោភបំពានលើដំណោះស្រាយនានារបស់ក្រុមប្រឹក្សាសន្តិសុខ អ.ស.ប ។
ទាក់ទិនដល់ការបន្តកិច្ចប្រជុំកំពូល ត្រីភាគី លោកស្រី PARK ប្រកាសថា យើងនឹងធ្វើដោយទៀងទាត់នូវការជួបគ្នាកំពូលត្រីភាគីនេះ ហើយយើងនឹងពង្រឹងតួនាទីរបស់លេខាធិការដ្ឋាននៃកិច្ចសហប្រតិបត្តិការត្រីភាគី TCS ហើយយើងនឹងពង្រីករចនាសម្ព័ន្ធនៃការពិគ្រោះយោបល់អន្តររដ្ឋាភិបាលនៃប្រទេសទាំង៣ ។
ស្តីពីបញ្ហាសេដ្ឋកិច្ចប្រទេសទាំង៣ ព្រមព្រៀងគ្នាជំរុញការចរចាស្តីពីកិច្ចព្រមព្រៀងផ្លាស់ប្តូរសេរីរវាងប្រទេសទាំង៣ ដើម្បីស្វែងរកចលករថ្មីៗនៃកំណើន ហើយបង្កើនការខិតខំប្រឹងប្រែង ដើម្បីឈានទៅចុះហត្ថលេខាលើកិច្ចព្រមព្រៀងភាពជាដៃគូសេដ្ឋកិច្ចជាសាកល និងតំបន់ ៕
ចែករំលែកព័តមាននេះ