គណបក្សប្រធានាធិបតីតួកគី លោក រីសេប តៃយីបអ័រដូហ្គាន ក្នុងការបោះឆ្នោតសភាកាលពីថ្ងៃទី១ វិច្ឆិកា ផ្ទុយពីការព្យាករណ៍នានា បែរជាទទួលបានជោគជ័យដោយប្រមូលបានសំឡេងភាគច្រើនដាច់ខាតដែលខ្លួនបាត់បង់កាលពី៥ខែមុនទៅវិញ ។
ក្រោយពីការរាប់សន្លឹកឆ្នោតស្ទើរតែរួចរាល់ គណបក្សយុត្តិធម៌ និងការអភិវឌ្ឍ AKP ទទួលបានសំឡេង៤៩,២% ដោយដណ្តើមកៅអី៣១៦ ក្នុងសភាដែលមានកៅអីទាំងអស់៥៥០ ។
លទ្ធផលនេះបង្ហាញពីជ័យជម្នះដ៏ត្រចះត្រចង់សម្រាប់លោកអ័រ ដូហ្គាន អាយុ៦១ឆ្នាំ ។ ក្នុងការបោះឆ្នោតសភាកាលពីថ្ងៃទី៧ មិថុនា គណបក្សលោកបាត់បង់ការត្រួតត្រាសភាទាំងស្រុង បន្ទាប់ពីគណបក្សលោកតែងមានសំឡេងគ្របដណ្តប់ក្នុងសភាចាប់តាំងពី១៣ឆ្នាំមកហើយ ។ អាស្រ័យហេតុនេះ បុរសខ្លាំងរបស់ប្រទេសរូបនេះក៏សម្រេចឱ្យមានការបោះឆ្នោតសភាមុនកាលកំណត់ ដោយយល់ថាអាចប្រមូលសំឡេងបានច្រើនវិញ ។
នាយករដ្ឋមន្ត្រីចប់អាណត្តិ និងជាប្រមុខគណបក្ស AKP លោក AHMET DAVUTOGLU នៅឯទីតាំងគណបក្សលោកឯសង្កាត់ KONYA ភាគកណ្តាលក្រុងអង់ការ៉ា ថ្លែងថា ពេលនេះគឺជាថ្ងៃនៃជ័យជម្នះ ។ ពេលនេះពុំមានអ្នកចាញ់ តែសុទ្ធជាអ្នកឈ្នះ ។ លោកអះអាងពីការឈោងចាប់ដៃជាមួយបណ្តាគូប្រជែង ។
មានការភ្ញាក់ផ្អើលមួយទៀត ដោយគណបក្សប្រជាធិបតេយ្យប្រជាជន HDP ស្និទ្ធពួកឃើត ដែលជាអ្នកទទួលបានជោគជ័យក្នុងការបោះឆ្នោតសភា កាលពីខែមិថុនាកន្លងមកនេះទទួលបានសំឡេង១០,៤% ក្នុងកម្រិតជាតិ ។ ពួកអ្នកគាំទ្រគណបក្សនេះដែលនាំគ្នាប្រមូលផ្តុំធ្វើបាតុកម្ម ព្រមទាំងដាក់បារ៉ាស់ និងដុតសម្បកកង់រថយន្តនៅមុខទីស្នាក់ការគណបក្ស HDP ក្នុងទីក្រុងឌីយ៉ាបាគៀរ ជាទីក្រុងធំនៅភាគអាគ្នេយ៍ ប្រទេសមានជនជាតិឃើតភាគច្រើននាំគ្នាស្រែកថា ប្រសិនបើគណបក្ស HDP នៅតែទទួលសំឡេងបានក្រោម១០% នោះនឹងជាសង្គ្រាមមួយ ។ ប៉ូលិសបានបំបែកពួកបាតុករដោយបាញ់ឧស្ម័នបង្ហូរទឹកភ្នែក ព្រមទាំងកាណុងបាញ់ទឹក ។
យោងតាមលទ្ធផលមួយផ្នែក គណបក្សសាធារណរដ្ឋប្រជាជន CHP ក្នុងការបោះឆ្នោតស្ថិតក្នុងលំដាប់ទី២ ដោយទទួលសំឡេង២៤,៥% បន្ទាប់មកគឺគណបក្សសកម្មភាពជាតិនិយម MHP ដែលទទួលបានសំឡេង១២% ជាលទ្ធផលថយចុះខ្លាំង បើប្រៀបធៀបទៅនឹងការបោះឆ្នោតកាលពីខែមិថុនា ៕
ចែករំលែកព័តមាននេះ