ខេត្តបាត់ដំបង៖ ជនម្នាក់ដែលតែងធ្វើសកម្មភាពចូលលួចទូរស័ព្ទនិងទ្រព្យសម្បត្តិផ្សេងៗ របស់អ្នកជំងឺ និងរបស់គ្រូពេទ្យស្ទើររាល់យប់នៅក្នុងមន្ទីរបង្អែកខេត្ត ពេលនេះត្រូវបានកម្លាំងកងរាជអាវុធហត្ថខេត្តឃាត់ខ្លួនបានហើយ កាលពីយប់ថ្ងៃទី១៧ ឧសភា ខណៈជននេះបង្ហាញខ្លួន នៅភូមិម្មករ សង្កាត់ស្វាយប៉ោ ក្រុងបាត់ដំបង។
ប្រធានមន្ទីរយុត្តិធម៌បញ្ជាការដ្ឋានកងរាជអាវុធហត្ថខេត្ត លោក សូ ឌី បានឲ្យដឹងថា ជនដៃដល់ដែលកម្លាំងរបស់លោកឃាត់ខ្លួនបាននេះ ឈ្មោះ សូ ភារិទ្ធ អាយុ២៨ឆ្នាំ នៅភូមិទូលតាឯក សង្កាត់ទូលតាឯក ក្រុងបាត់ដំបង ។ លោកថា ជននេះបានប្រព្រឹត្តបទល្មើសជាលើកចុងក្រោយនៅវេលារំលងអាធ្រាត្រឈានចូលថ្ងៃទី១៧ ឧសភា នៅក្នុងមន្ទីរពេទ្យខេត្ត ដែលបានចូលលួចទូរស័ព្ទអ្នកជំងឺម្នាក់ឈ្មោះ ឈិន សុផារ៉ា ស្រីអាយុ២៣ឆ្នាំ ហើយត្រូវកម្លាំងរបស់លោកស្រាវជ្រាវឃាត់ខ្លួនបាននៅយប់ថ្ងៃដដែល។
សូមរំលឹកថា កន្លងមកនៅក្នុងមន្ទីរពេទ្យបង្អែកខេត្ត មិនថា អ្នកជំងឺ ឬ គ្រូពេទ្យនោះ តែបាត់បង់ទ្រព្យសម្បត្តិ ស្ទើររាលយប់ ដោយសារស្នាដៃលោកចោរម្នាក់នេះ ហើយរាល់សកម្មភាពរបស់ជននេះ បានជាប់នៅក្នុងកាមេរ៉ាសុវត្ថិភាពដែលបំពាក់នៅតាមអគារនានា នៃមន្ទីរពេទ្យយ៉ាងច្បាស់ក្រឡែតទៀតផង តែសមត្ថកិច្ចហាក់កំណត់មុខសញ្ញាមិនបានឡើយ។ ជាក់ស្ដែងនៅយប់កើតហេតុចុងក្រោយនេះ ជននេះបានពាក់មួកសុវត្ថិភាពដើរចូលលុកលុយឆ្លងកាត់គ្រែអ្នកជំងឺ និង តាមបន្ទប់គ្រូពេទ្យសម្រាក ពាស់ពេញ នៃអគារពេទ្យ ស្វែងរកលួចទ្រព្យសម្បត្តិ និង ទូរស័ព្ទដែលអ្នកជំងឺ និង គ្រូពេទ្យទុកប្រហែស។
បើតាមប្រភពពីគ្រូពេទ្យ ឬ អ្នកជំងឺបាននិយាយថា ពេលខ្លះជននេះ បានដើរចូលទៅក្នុងអគារអ្នកជំងឺ បន្លំធ្វើជាគ្រូពេទ្យ ហើយធ្វើជាសួរសុខទុក្ខអ្នកជំងឺ។ ប៉ុន្តែលទ្ធផលចុងក្រោយ នៅពេលអ្នកជំងឺមិនបានចាប់អារម្មណ៏ ត្រិមមួយប៉ព្រិចភ្នែកប៉ុណ្ណោះ ស្រាប់តែបាតើទូរស័ព្ទពីលើគ្រែ បាត់ទាំងគ្រូពេទ្យក្លែងក្លាយនោះឈឹង។ ប៉ុន្តែយ៉ាងណា ពេលនេះត្រូវកម្លាំងកងរាជអាវុធហត្ថ ស្រាវជ្រាវឃាត់ខ្លួនចោរសកម្មនេះបានហើយ ។ លោក សូ ឌី បាននិយាយថា ពេលនេះជនដៃដល់កំពុងសួរនាំនៅការិយាល័យជំនាញ ដើម្បីចាត់ការតាមនីតិវិធីហើយ៕
ចែករំលែកព័តមាននេះ