ខេត្តកំពង់ឆ្នាំង ៖ ផ្ទះស្លឹកមួយខ្នងទំហំប្រមាណ៤គុណ៦ម៉ែត្រសង់ផ្ទាល់ដី ត្រូវបានភ្លើងឆេះអស់ជញ្ជាំងខាងមុខមួយចំនួនដោយសារទុស្សេខ្សែភ្លើងឆេះទូរទស្សន៍១គ្រឿង។
ខេត្តកំពង់ឆ្នាំង ៖ ផ្ទះស្លឹកមួយខ្នងទំហំប្រមាណ៤គុណ៦ម៉ែត្រសង់ផ្ទាល់ដី ត្រូវបានភ្លើងឆេះអស់ជញ្ជាំងខាងមុខមួយចំនួនដោយសារទុស្សេខ្សែភ្លើងឆេះទូរទស្សន៍១គ្រឿង។ ហេតុការណ៍នេះបានកើតឡើងកាលពីវេលាម៉ោង៤ និង៥០នាទីល្ងាច ថ្ងៃទី០១ វិច្ឆិកា ២០១៥ នៅក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។
ទោះយ៉ាងណាក្នុងហេតុការណ៏នេះ ត្រូវបានអ្នកស្រុកជិតខាងជួយគាស់ទ្វារផ្ទះបាញ់ទឹកពន្លត់ទាន់ពេលវេលា ខណៈពេលម្ចាស់ផ្ទះមិននៅ។ សមត្ថកិច្ចនគរបាលក្រុងកំពង់ឆ្នាំងបានឱ្យដឹងថា ម្ចាស់ផ្ទះរងគ្រោះខាងលើនេះមាន ឈ្មោះ សូ អ៊ីវ ភេទស្រី អាយុ៥២ឆ្នាំ មានមុខរបរលក់ដូរអីវ៉ាន់នៅផ្សារក្រោម។
មុនពេលកើតហេតុអ្នកស្រុកក្នុងភូមិបានឃើញភ្លើងឆេះជញ្ជាំងស្លឹកផ្នែកខាងមុខផ្ទះយ៉ាងសន្ធោសន្ធៅ ពេលនោះអ្នកភូមិជិតខាងក៏បាននាំគ្នាគាស់ទ្វារផ្ទះអូសទុយោទឹកបាញ់ពន្លត់ជិតកន្លះម៉ោងទើបគ្រប់គ្រងសភាពការណ៍នេះបាន ខណៈដែលម្ចាស់ផ្ទះមិនបាននៅផ្ទះទេ គឺគាត់ទៅលក់ដូរអីវ៉ាន់នៅផ្សារក្រោម។
ក្រោយពេលកើតហេតុសមត្ថកិច្ចបានចុះទៅពិនិត្យផ្ទះជនរងគ្រោះ និងបានដឹងថា ករណីឆេះផ្ទះនេះបណ្តាលមកពីទុស្សេខ្សែភ្លើងឆេះទូរទស្សន៍១គ្រឿងដែលបានដាក់ជាប់នឹងជញ្ជាំងស្លឹកទើបរាលដាលឆេះផ្ទះតែម្តង កុំតែបានអ្នកភូមិជួយពន្លត់ទាន់ពេល កុំអីឆេះផ្ទះហ្មត់៕
ចែករំលែកព័តមាននេះ