ខេត្តសៀមរាប ៖ កិច្ចប្រជុំដែលមានសហប្រធាន (អាជ្ញាធរខេត្តសៀមរាប និងអាជ្ញាធរជាតិអប្សរា) បានផ្តោតជាសំខាន់ទៅលើការបំពេញតួនាទីភារកិច្ចរបស់គណៈកម្មការចម្រុះ ដើម្បីសម្របសម្រួលការប្រើប្រាស់ដីធ្លី ការទប់ស្កាត់សំណង់ខុសច្បាប់ និងរៀបចំសណ្តាប់ធ្នាប់នៅតំបន់រមណីយដ្ខានអង្គរ។ នាថ្ងៃទី១៧ ខែឧសភា ឆ្នាំ២០២១ គណៈកម្មការចម្រុះ (រដ្ឋបាលខេត្តសៀមរាប និងអាជ្ញាធរជាតិអប្សរា) ដើម្បីសម្របសម្រួលការប្រើប្រាស់ដីធ្លី ការទប់ស្កាត់សំណង់ខុសច្បាប់ និងរៀនចំសណ្តាប់ឆ្នាប់នៅក្នុងតំបន់រមណីយដ្ឋានអង្គរ បានជួបពិភាក្សាការងារជាមួយគ្នានៅសាលាខេត្តសៀមរាប លើរបៀបវារៈដ៏សំខាន់ដោយឈរលើមូលដ្ឋាននៃការអនុវត្តសេចក្តីសម្រេចរបស់រាជរដ្ឋាភិបាលកម្ពុជា លេខ៧០ សសរ ចុះថ្ងៃទី១៦ ខែវិច្ឆិកា ឆ្នាំ២០០៤ ស្តីពីការកំណត់បទដ្ឋានប្រើប្រាស់ដីធ្លីនៅតំបន់១ និងតំបន់២ ក្នុងរមណីយដ្ឋានសៀមរាបអង្គរ។
សហប្រធាននៃកិច្ចប្រជុំរួមមាន លោក ទៀ សីហា អភិបាលនៃគណៈអភិបាលខេត្តសៀមរាប និងលោក ហង់ ពៅ អគ្គនាយកនៃអគ្គនាយកដ្ឋានអាជ្ញាធរជាតិអប្សរា។ សមាជិកគណៈកម្មការ ដែលចូលរួមក្នុងកិច្ចប្រជុំនេះ មានឯកឧត្ដម លោកជំទាវ អស់លោក លោកស្រី ជាអភិបាលរងខេត្ត អគ្គនាយករងអាជ្ញាធរជាតិអប្សរា នាយករដ្ឋបាលសាលាខេត្ត ថ្នាក់ដឹកនាំមន្ទីរ អាជ្ញាធរក្រុង ស្រុក ដែលមានភូមិសាស្ត្រជាប់ពាក់ព័ន្ធរមណីយដ្ឋានអង្គរ រួមទាំងនាយកទីចាត់ការសាលាខេត្តចូលរួមផងដែរ។ ក្នុងឱកាសលោក ទៀ សីហា អភិបាលខេត្តបានមានប្រសាសន៍ថា កិច្ចប្រជុំរបស់គណៈកម្មការចម្រុះមួយនេះ គឺជាការជួបជុំពិភាក្សាពិសេសមួយ ហើយក៏មិនមែនជាលើកដំបូងនោះដែរ បន្ទាប់ពីសមាសភាពរបស់គណកម្មការមួយនេះត្រូវបានសម្រេចបង្កើតឡើងកាលពីដើមខែកក្កដា ឆ្នាំ២០២០ កន្លងទៅ។
កិច្ចប្រជុំនេះ ផ្តោតជាសំខាន់ទៅលើដែនកំណត់សម្រាប់ការអនុវត្តតួនាទី-ភារកិច្ច ក្នុងក្របខណ្ឌនៃកិច្ចសហការគ្នា ដើម្បីស្វែងរកគន្លឹះដោះស្រាយបញ្ហាប្រឈមនានាពាក់ព័ន្ធនឹងការប្រើប្រាស់ដីធ្លី ការសាងសង់សំណង់របស់ប្រជាពលរដ្ឋដែលបានតាំងទីលំនៅ និងរស់នៅតាំងពីយូរណាស់មកហើយ (មុនឆ្នាំ២០០៤ )ក្នុងតំបន់រមណីដ្ឋានអង្គរ និងការកំណត់លិខិតបទដ្ឋានគតិយុត្តិជាធរមាន។ ក្នុងនោះលោកក៏បានលើកពីគម្រោងស្ថាបនាផ្លូវ៣៨ខ្សែ ក្នុងក្រុងសៀមរាប ក្នុងការជំរុញដល់វិស័យសេដ្ឋកិច្ចរបស់ប្រជាពលរដ្ឋខេត្តសៀម រាប ក្រោយពេលបញ្ចប់វិបត្តិជំងឺកូវីដ-១៩ នៅលើពិភពលោកយើងនេះ និងធ្វើឲ្យជីវភាពរបស់ប្រជាពលរដ្ឋ មានការកើនឡើងទៀតផង។ លើការងារសាងសង់ផ្លូវ៣៨ខ្សែនេះ អាជ្ញាធរខេត្តក៏បានធ្វើការដោះស្រាយនូវរាល់បញ្ហាមួយចំនួនជាមួយបងប្អូនទៀតផង។
លោកក៏បានបញ្ជាក់ថា កិច្ចប្រជុំនាថ្ងៃនេះក៏ជាការបើកផ្លូវមួយក្នុងការដោះស្រាយបញ្ហាប្រឈម និងទុក្ខកង្វល់របស់ប្រជាពលរដ្ឋនៅក្នុងតំបន់រមណីដ្ឋានអង្គរ ព្រមមាននូវគោល នយោបាយមួយចំនួន ដើម្បីជូយដល់ជីវភាពរបស់បងប្អូនទៀតផង។ លោកក៏បានសង្កត់ធ្ងន់ផងដែរថា រាល់កិច្ចការងារទាំងឡាយ ដែលអាជ្ញាធរជាតិអប្សរាអនុវត្ត គឺត្រូវមានកិច្ចសហការជាមួយអាជ្ញាធររដ្ឋអំណាចមូលដ្ឋាន ដើម្បីកុំឲ្យបងប្អូនប្រជាពលរដ្ឋមានសតិអារម្មណ៍ចំពោះអាជ្ញាធរ។ កត្តាសំខាន់លើការបង្ក្រាប រាល់សំណង់អាណាធិបតេយ្យគ្មានច្បាប់ទម្លាប់ និងការទន្ទ្រានកាន់កាប់ដីធ្លីរបស់រដ្ឋ (ទីទួលបុរាណដ្ឋាន)ការកាប់បំផ្លាញព្រៃឧទ្យានអង្គរសំដៅលុបបំបាត់នូវក្រុមជនខិលខួចទាំងនោះ។
កិច្ចប្រជុំបានពិភាក្សាធ្វើឲ្យប្រសើរឡើង ការធ្វើសមាហរណកម្មជាមួយគ្នា ក្នុងការអនុវត្តគម្រោងនានារបស់អាជ្ញាធរមូលដ្ឋាន និងអាជ្ញាធរជាតិអប្សរា។ ក៏ជាការកែលម្អរួមគ្នាផងដែរ គឺតម្រូវឲ្យមានកិច្ចពិភាក្សាគ្នាជាចាំបាច់ សម្រាប់កិច្ចសហប្រតិបត្តិការ និងកំណត់ព្រំដែនតួនាទីភារកិច្ចរបស់អាជ្ញាធរខេត្ត និងអាជ្ញាធរជាតិអប្សរា ការកំណត់ជនបង្គោល ដើម្បីសហការអនុវត្តការងារឲ្យមានប្រសិទ្ធភាព៕ ដោយ ៖ ច័ន្ទ រស្មី
ចែករំលែកព័តមាននេះ