បន្ទាយមានជ័យ៖ ពលករខ្មែរប្រុសស្រី ១០នាក់ បម្រុងលួចឆ្លងដែនទៅថៃ ត្រូវបានឃាត់បញ្ជូនទៅមណ្ឌលធ្វើចត្តាឡីស័ក នៅវេលាម៉ោង ២ និង ៤០នាទី រំលងអាធ្រាត្រ…
បន្ទាយមានជ័យ៖ ពលករខ្មែរប្រុសស្រី ១០នាក់ បម្រុងលួចឆ្លងដែនទៅថៃ ត្រូវបានឃាត់បញ្ជូនទៅមណ្ឌលធ្វើចត្តាឡីស័ក នៅវេលាម៉ោង ២ និង ៤០នាទី រំលងអាធ្រាត្រ ចូលថ្ងៃទី១៥ ខែឧសភា ឆ្នាំ២០២១ នៅចំណុចភូមិសាស្ត្រ ក្នុងភូមិទំនប់ដាច់ ឃុំអូរបីជាន់ ស្រុកអូរជ្រៅ។
លោកវរៈសេនីយ៍ឯក សូរ ចាន់រី មេបញ្ជាការនគរបាលវរៈការពារព្រំដែនគោកលេខ៩១១ បានប្រាប់ថា ជាការណែនាំពីឯកឧត្តម នាយឧត្តមសេនីយ៍ ខេង សុមេត អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៤ និងទី៥ និងវិធានការលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ ហើយកម្លាំងនគរបាលវរៈការពារព្រំដែនគោកលេខ៩១១ បានចេញល្បាតតាមបន្ទាត់ព្រំដែនគោក បានឃាត់ពលករខ្មែរចំនួន ១០នាក់ ស្រី ០៦នាក់ ក្មេង ម្នាក់។
លោកបានបញ្ជាក់ថា ក្រោយពេលឃាត់ខ្លួន ពលករខ្មែរចំនួន ១០នាក់ ត្រូវបាននាំយកទៅសាកសួរនៅទីបញ្ជាការដ្ឋាននគរបាលវរៈការពារព្រំដែនគោកលេខ៩១១ គឺបម្រុងលួចឆ្លងតាមរយៈមេខ្យល់ ដែលយកតំលៃ ម្នាក់ ៥.០០០បាត ជូនដល់កន្លែងធ្វើការ និងរកការងារធ្វើ។ ពលករទាំង ១០នាក់នេះ ជាប្រជាពលរដ្ឋខេត្តសៀមរាប ចំនួន ៧នាក់ ខេត្តកំពង់ធំចំនួន ២នាក់ និងខេត្តបន្ទាយមានជ័យ ម្នាក់។
ក្រោយពេលសាកសួរ ហើយធ្វើកិច្ចសន្យា និងណែនាំរួច ពលករទាំង ១០នាក់ ត្រូវបានបញ្ជូនទៅមណ្ឌលធ្វើចត្តាឡីស័ក រយៈពេល ១៤ថ្ងៃ៕ ប៊ុន ធឿន
ចែករំលែកព័តមាននេះ