ហ្គាហ្សាស្ទ្រីប ៖ យោធាអ៊ីស្រាអែល បានបង្កើនការវាយលុករបស់ខ្លួន ទៅលើតំបន់ហ្គាហ្សា ខណៈក្រុមសកម្មប្រយុទ្ធប៉ាឡេស្ទីន បន្តបាញ់រ៉ុក្កែត ចូលទឹកដីអ៊ីស្រាអែល នៅថ្ងៃទី៥ នៃសង្គ្រាម ។ យោធាអ៊ីស្រាអែល បាននិយាយថា កងកម្លាំងអាកាស និងបងទ័ពជើងគោក បានចូលរួមនៅក្នុងការវាយប្រហារ កាលពីថ្ងៃសុក្រនេះ ប៉ុន្តែមិនបានវាយលុកចូលតំបន់ហ្គាហ្សាទេ ។
វីដេអូពីទីក្រុងហ្កាហ្សា បានបង្ហាញថា ផ្ទៃមេឃនាពេលយប់ ពោពេញដោយពន្លឺគ្រាប់កាំភ្លើង ដែលបាញ់ចេញពីកាំភ្លើងធំ និងការវាយប្រហារតាមអាកាសរបស់អ៊ីស្រាអែល ។
មនុស្ស១១៩នាក់ ត្រូវបានសម្លាប់ នៅតំបន់ហ្គាហ្សា និង០៨នាក់បានស្លាប់ នៅក្នុងប្រទេសអ៊ីស្រាអែល ចាប់តាំងពីការប្រយុទ្ធគ្នា បានចាប់ផ្តើមតាំងពីថ្ងៃចន្ទ កន្លងមក
ការបាញ់ផ្លោងគ្រាប់រ៉ុក្កែត របស់ប៉ាឡេស្ទីន និងការវាយប្រហារតាមអាកាសរបស់អ៊ីស្រាអែល នៅសប្តាហ៍នេះ ធ្វើអោយតំបន់ហ្គាហ្សា និងអ៊ីស្រាអែល កាន់តែអាក្រក់ទៅៗ ចាប់តាំងពីឆ្នាំ២០១៤មក ។
ដោយការភ័យខ្លាចការលុកចូលរបស់កងទ័ពអ៊ីស្រាអែល នៅតំបន់ហ្គាហ្សា ប្រជាជនប៉ាឡេស្ទីន បាននិងកំពុងភៀសខ្លួនចេញពីតំបន់ ដែលនៅជិតព្រំដែនជាមួយអ៊ីស្រាអែល ។ អ្នកស្រុកដែលបានចាកចេញពីស្រុក Shejaiya ក្នុងទីក្រុង Gaza ។ ប្រជាជនប៉ាឡេស្ទីន និយាយថា គ្រាប់កាំភ្លើងបានធ្លាក់ទៅលើផ្ទះរបស់ពួកគេ ។
ចំណែកឯអ៊ីស្រាអែល បានសេចក្តីថ្លែងការណ៍ថា ខ្លួនបានធ្វើប្រតិបត្តិការមួយយប់ ដើម្បីបំផ្លាញបណ្តាញផ្លូវរូងក្រោមដី របស់ក្រុមហាម៉ាស ដែលវាត្រូវបានគេហៅថា“មេត្រូ” ប៉ុន្តែគ្មានកងទ័ពណាមួយបានចូលទៅកាន់តំបន់ហ្គាហ្សាទេ ។
សេចក្តីថ្លែងការណ៍ដដែល បានបន្ថែមទៀតថា នៅល្ងាចថ្ងៃព្រហស្បតិ៍ និងព្រឹកថ្ងៃសុក្រទី១៤ ឧសភានេះ មានគ្រាប់ផ្លោងចំនួន ២២០គ្រាប់ទៀត ត្រូវបានបាញ់ចេញពីតំបន់ហ្គាហ្សាស្ទ្រីប ។
នៅព្រឹកថ្ងៃសុក្រ លោកនាយករដ្ឋមន្ត្រីអ៊ីស្រាអែល បេនយ៉ាមីន ណេតាន់យ៉ាហ៊ូ បាននិយាយថា ប្រតិបត្តិការយោធាអ៊ីស្រាអែល ប្រឆាំងនឹងក្រុមសកម្មប្រយុទ្ធប៉ាឡេស្ទីន ចាំបាច់នឹងបន្ត ។ លោកបានបន្ថែមថា ក្រុមអ៊ីស្លាមហាម៉ាស ដែលគ្រប់គ្រងតំបន់ហ្គាហ្សា យើងនឹងត្រូវចំណាយច្រើន ដូចជាក្រុមភេរវករផ្សេងទៀតដែរ ។
រីឯ អ្នកនាំពាក្យយោធាហាម៉ាស វិញបាននិយាយថា ក្រុមនេះបានត្រៀមខ្លួនជាស្រេច ដើម្បីបង្រៀន “យោធារបស់អ៊ីស្រាអែល ឲ្យស្គាល់ថ្នាំខ្លាំង” ប្រសិនបើសម្រេចចិត្តបន្តការលុកលុយនៅមូលដ្ឋាន ។
កាលពីថ្ងៃព្រហស្បតិ៍ យោធាអ៊ីស្រាអែល បានកោះហៅកងទ័ពចំនួន ៧,០០០នាក់ និងដាក់ពង្រាយកងទ័ពថ្មើរជើង និងរថក្រោះ នៅក្បែរព្រំដែនរបស់ខ្លួនជាមួយ ហ្គាហ្សា ។ សេចក្តីថ្លែងការណ៍របស់មេទ័ពអ៊ីស្រាអែល និយាយថា ការវាយលុកចូលក្នុងតំបន់ហ្គាហ្សា គឺជាជម្រើសមួយ ដែលត្រូវតែពិចារណា ប៉ុន្តែការសម្រេចចិត្តមិនទាន់ត្រូវបានធ្វើនៅឡើយទេ ។
នៅពេលការប្រយុទ្ធបានឈានចូលដល់ថ្ងៃទី៥ ត្រូវនឹងថ្ងៃទី១៤ ឧសភានេះ អគ្គលេខាធិការអង្គការសហប្រជាជាតិ លោក António Guterres បានអំពាវនាវឲ្យមានការដកខ្លួនចេញជាបន្ទាន់ និងបញ្ឈប់នូវភាពសត្រូវនឹងគ្នា នៅហ្គាហ្សា និងអ៊ីស្រាអែល ។
ក្រសួងសុខាភិបាល ក្នុងតំបន់ហ្គាហ្សា បានអោយដឹងថា មានកុមារ ២៧នាក់ស្ថិតក្នុងចំណោមអ្នកដែលត្រូវបានសម្លាប់ ចាប់តាំងពីការប្រយុទ្ធគ្នា បានចាប់ផ្តើម ហើយជនស៊ីវិលជាច្រើនទៀតបានស្លាប់ ។ ប្រជាជននៅតំបន់ហ្គាហ្សា ៦០០នាក់ផ្សេងទៀត ក៏បានរងរបួស ផងដែរ ។
មន្ត្រីយោធាអ៊ីស្រាអែល និយាយថា មនុស្សរាប់សិបនាក់ ដែលត្រូវបានសម្លាប់នៅតំបន់ហ្គាហ្សា គឺជាពួកសកម្មប្រយុទ្ធ ហើយការស្លាប់ខ្លះ គឺបណ្តាលមកពីគ្រាប់រ៉ុក្កែត ដែលបាញ់ចេញពីតំបន់ហ្គាហ្សាខុសគោលដៅខ្លួនឯង ។
នៅទីប្រជុំជន Sderot របស់អ៊ីស្រាអែល ក្បែរតំបន់ហ្គាហ្សា ក្មេងប្រុសម្នាក់ត្រូវបានសម្លាប់ដែរ នៅពេលដែលគ្រាប់រ៉ុក្កែត ធ្លាក់ចំបានឆាបឆេះផ្ទះ ហើយអំបែងគ្រាប់ បានទម្លុះទីជម្រកដែលពួកគេកំពុងលាក់ខ្លួន ៕
ចែករំលែកព័តមាននេះ