រាជធានីភ្នំពេញ ៖ ក្នុងពេលមានវិបត្តិនៃជំងឺកូវីដ១៩ វិស័យជាច្រើនត្រូវបានជាប់គាំងតែសម្រាប់គម្រោងអភិវឌ្ឍន៍អចលនទ្រព្យជាច្រើនក្នុងទឹកដីខេត្តកំពតត្រូវបានមើលឃើញថា នៅតែបន្តដំណើរការអភិវឌ្ឍទោះមានការបិទខ្ទប់តំបន់មួយចំនួនក្នុងប្រទេសកម្ពុជាក្ដី ។
បើតាមលោកកែវ សុជាតិ ប្រធានក្រុមហ៊ុនអចលនទ្រព្យ KW Cambodia ប្រចាំខេត្តកំពតបានឱ្យដឹងថា ជាការពិតណាស់ ក្នុងពេលបិទខ្ទប់រាជធានីភ្នំពេញ និងក្រុងតាខ្មៅគម្រោងអភិវឌ្ឍន៍មួយចំនួន ក្នុងប្រទេសត្រូវបានផ្អាកដំណើរការ តែសម្រាប់នៅក្នុងខេត្តកំពត គម្រោងជាច្រើននៅតែបន្តសកម្មភាពសាងសង់ ដើម្បីបញ្ចប់ទៅតាមផែនការ ជាក់ស្ដែងគម្រោងអភិវឌ្ឍន៍អគារខ្ពស់ គម្រោងសាងសង់សណ្ឋាគារ និងបុរីលំនៅឋានក្នុងខេត្តកំពតនៅតែមានសកម្មភាពដដែល ។
លោកបន្តថា គម្រោងមួយចំនួនជាគម្រោងដែលគេទុនស្រាប់ ដូច្នេះទោះបីជាមានវិបត្តិក៏ម្ចាស់គម្រោងមានទុនសម្រាប់បង្ហើយគម្រោងដែរ តែក្នុងនោះក្នុងខេត្តកំពតក៏មានគម្រោងមួយចំនួនត្រូវបានផ្អាកដំណើរការមួយរយៈក្នុងពេលបិទខ្ទប់ដោយសារតែម្ចាស់គម្រោងជាអ្នកនៅភ្នំពេញ និងមិនអាចមកមើលការសាងសង់បានទើបបញ្ជាឱ្យមានការផ្អាកសិន តែមានតិចតួចប៉ុណ្ណោះ ។ លោកថា៖« វាពិតជាមានគម្រោងខ្លះគាំងមែន តែមិនមែនច្រើននោះទេ ដោយសារតែម្ចាស់លុយមិនអាចបង្វិលលុយមកបន្តដំណើរការគម្រោងធ្វើឱ្យកម្មករ សាងសង់ត្រូវផ្អាកសិន តែក្រោយពេលចប់ការបិទខ្ទប់គេឃើញថាដំណើរការសាងសង់ចាប់ផ្ដើមឡើងវិញ » ។
លោកបន្ថែមថា ទន្ទឹមនឹងវិបត្តិនៃកូវីដ១៩នេះដែរ នៅក្នុងខេត្តកំពតនៅតែទទួលបានការអភិវឌ្ឍគម្រោងថ្មីៗ ជាពិសេសគម្រោងអភិវឌ្ឍន៍ពីវិនិយោគិនក្នុងស្រុកដូចជា គម្រោងអភិវឌ្ឍន៍លំនៅឋាននៅទីក្រុងថ្មីនៃខេត្តកំពត គឺក្រុងបូកគោ គម្រោងអភិវឌ្ឍន៍ផ្ទះលំហែកាយ នៅក្បែរមាត់ព្រែកជាដើម ។ ដោយឡែកសកម្មភាពនៃការទិញលក់ដីថ្វីត្បិតតែមានភាពស្ងប់ស្ងាត់បន្តិចនៅក្នុងដំណាក់កាលបិទខ្ទប់ តែតម្លៃវិញគឺមិនមានការធ្លាក់ចុះនោះទេ បើទោះបីជាអ្នកទិញទាមទារបញ្ចុះតម្លៃយ៉ាងណាក្ដី ។
លោកខូល័រ តាន់ម្ចាស់គម្រោងអភិវឌ្ឍន៍អចលនទ្រព្យមួយកន្លែងនៅក្បែរជើងភ្នំបូកគោ បានឱ្យដឹងថា សក្ដានុពលនៃការអភិវឌ្ឍក្នុងខេត្តជាពិសេសនៅក្រុងថ្មីគឺក្រុងបូកគោបានធ្វើឱ្យលោកនិងអ្នកអភិវឌ្ឍន៍ផ្សេងទៀតនៅតែបន្តដាក់ទុនទោះស្ថិតនៅក្នុងដំណាក់កាលនៃវិបត្តិបែបនេះក្ដី ។ លោកបន្តថា ការបង្កើតរដ្ឋបាលក្រុងបូកគោក្នុងខេត្តកំពត គឺជាការទាក់ទាញ វិនិយោគិនទាំងក្នុងនិងក្រៅប្រទេសចូលបណ្ដាក់ទុនវិនិយោគក្នុងទឹកដីនៃក្រុងថ្មីនេះ ខណៈតំបន់នេះ វាមានសក្ដានុពលស្រាប់ហើយ ជាក់ស្ដែងវាមានរមណីយដ្ឋានភ្នំបូកគោ ដ៏ល្បីមានសមុទ្រ មានព្រែកនិងព្រៃព្រឹក្សាជាច្រើនទៀតសម្រាប់អភិវឌ្ឍន៍ជាទីក្រុងបៃតង ហើយវានឹងក្លាយជាទីក្រុងបៃតងដ៏មានសក្ដានុពលសម្រាប់ទាក់ទាញវិនិយោគិននិងភ្ញៀវទេសចរ ជាតិនិងអន្តរជាតិ ។
លោកគឹម សង្គ្រាមភ្នាក់ងារអចលនទ្រព្យមួយរូបនៅក្នុងខេត្តកំពតក៏បានបញ្ជាក់ថា សក្ដានុពលមួយចំនួនក្នុងខេត្តកំពត បានធ្វើឱ្យវិនិយោគិននៅតែសម្លឹងមើលទីតាំងនេះសម្រាប់អភិវឌ្ឍន៍ ក្នុងនោះ កំពតបាននិងកំពុងសាងសង់កំពង់ផែទេសចរណ៍ទឹកជ្រៅមួយដែលអាចទទួលបានភ្ញៀវទេសចរ និងនាវាធំចូលចត ការសាងសង់ហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់ទឹកដីខេត្តកំពតនិងពីកំពតទៅកាន់ក្រុងព្រះសីហនុ គឺសុទ្ធតែជាចំនុចទាក់ទាញវិនិយោគិនចូលស្វែងរកការវិនិយោគអចលនទ្រព្យក្នុងខេត្តមួយនេះ ៕
ចែករំលែកព័តមាននេះ