ខេត្តព្រះសីហនុ៖ វិធានការរដ្ឋបាល ដែលត្រូវអនុវត្តក្នុងភូមិសាស្ត្រក្រុងព្រះសីហនុ ត្រូវចាប់ផ្តើមអនុវត្តសម្រាប់រយៈពេល ១៤ថ្ងៃ ចាប់ពីម៉ោងសូន្យ ថ្ងៃទី១៤ ដល់ថ្ងៃទី២៧ ខែឧសភា ឆ្នាំ២០២១។ នោះគឺការបែងចែកជា ៣តំបន់ សម្រាប់អនុវត្តវិធានការរដ្ឋបាល ដើម្បីទប់ស្កាត់ការឆ្លងរាលដាលជំងឺកូវីដ១៩ គឺ «តំបន់ក្រហម» «តំបន់លឿងទុំ» និង «តំបន់លឿង»។
តាមសេចក្តីសម្រេចថ្មី តំបន់លឿងទុំ ក្នុងក្រុងព្រះសីហនុ រួមមាន៖ សង្កាត់លេខ១ ( ១-ផ្សារ និងតំបន់ជុំវិញផ្សារយាទូចញូវស្តារ ២-ផ្សារ និងតំបន់ជុំវិញផ្សារយូស៊ីន ៣-ផ្សារ និងតំបន់ជុំវិញផ្សារទំនប់រលក )។ សង្កាត់លេខ២ ( ផ្នែកខ្លះនៃភូមិ១ និងផ្សារ និងតំបន់ជុំវិញផ្សារពាណិជ្ជកម្ម )។ សង្កាត់លេខ៤ ( ផ្នែកខ្លះនៃភូមិ១ ភូមិ២ ភូមិ៣ ភូមិ៤ និងភូមិ៥ )។
រីឯតំបន់លឿង រួមមាន៖ ទីតាំងទាំងមូលនៃសង្កាត់លេខ១ លើកលែងតែតំបន់លឿងទុំ។ ទីតាំងទាំងមូលនៃសង្កាត់លេខ២ លើកលែងតែតំបន់លឿងទុំ។ ទីតាំងទាំងមូលនៃសង្កាត់លេខ៣។ សង្កាត់លេខ៤ ( ភូមិ៤ និងផ្នែកខ្លះនៃភូមិ១ ភូមិ២ ភូមិ៣ ភូមិ៤ និងភូមិ៥ )។
សេចក្តីសម្រេច បង្ហាញថា ក្នុងអំឡុងពេលនៃការបិទខ្ទប់ វិធានការដែលត្រូវអនុវត្តសម្រាប់ភូមិសាស្ត្រ ដែលត្រូវបានកំណត់ជា «តំបន់លឿងទុំ» គឺបុគ្គលគ្រប់រូប ត្រូវបានហាមឃាត់មិនឲ្យធ្វើដំណើរ ចេញពីលំនៅឋាន ឬទីសំណាក់បច្ចុប្បន្នរបស់ខ្លួនឡើយ។ ក្នុងករណីមានការបំពានវិធានការហាមឃាត់ការធ្វើដំណើរនេះ អាជ្ញាធរអនុវត្តវិធានការបិទខ្ទប់ ត្រូវអនុវត្តវិធានការច្បាប់យ៉ាងម៉ឺងម៉ាត់ ដោយរួមទាំងការឃាត់ទុកជាបណ្តោះអាសន្ននូវមធ្យោបាយធ្វើដំណើរនេះ ដោយអនុលោមតាមបទប្បញ្ញត្តិ និងនីតិវិធីជាធរមាន។
ប៉ុន្តែការធ្វើដំណើរចេញក្រៅពីលំនៅឋាន ឬទីសំណាក់បច្ចុប្បន្ន អាចត្រូវបានអនុញ្ញាតក្នុងករណីចាំបាច់ ដូចតទៅ៖ ការធ្វើដំណើររបស់កម្មករ និយោជិត ឬបុគ្គលិក ដើម្បីបម្រើឲ្យសកម្មភាពការងារ មុខរបរ ឬអាជីវកម្ម ដែលត្រូវបានអនុញ្ញាត ត្រូវភ្ជាប់ជាមួយឯកសារបញ្ជាក់អត្តសញ្ញាណ និងប័ណ្ណសម្គាល់ ដែលចេញដោយអង្គភាពសាមី។ ការអនុញ្ញាតនេះ ត្រូវប្រព្រឹត្តិទៅក្នុងពេលព្រឹកចន្លោះម៉ោង ៦ ដល់ម៉ោង ៨ និងនៅពេលល្ងាច ចន្លោះពីម៉ោង ៥ល្ងាច ដល់ម៉ោង ៧យប់។
នៅតំបន់លឿងទុំ ក៏ត្រូវបានហាមឃាត់រាល់សកម្មភាពការងារ មុខរបរ ឬអាជីវកម្មទាំងអស់ ដែលមិនមែនជាតម្រូវការចាំបាច់ប្រចាំថ្ងៃ។ ត្រូវហាមឃាត់រាល់ការជួបជុំ ឬការប្រមូលផ្តុំមនុស្ស លើកលែងតែក្នុងករណីចាំបាច់មួយចំនួន ដូចជា ការជួបជុំក្នុងចំណោមសមាជិកគ្រួសារ ដែលរស់នៅក្នុងលំនៅឋានជាមួយគ្នា និងការរៀបចំពិធីបុណ្យសព ដោយគោរពតាមការកំណត់របស់អាជ្ញាធរមានសមត្ថកិច្ច ជាដើម។
នៅតំបន់លឿងទុំ ក្នុងក្រុងព្រះសីហនុ ក៏បានកំណត់ អនុវត្តបម្រាមគោចរ ដោយផ្អាកជាបណ្តោះអាសន្ននូវរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្មនៅចន្លោះពីម៉ោង ៨យប់ ដល់ម៉ោង ៥ព្រឹក។ លើកលែងតែករណីមួយចំនួន ដូចជា ការធ្វើដំណើររបស់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ ដែលមានសមត្ថកិច្ចអនុវត្តវិធានការនានា ក្នុងអំឡុងពេលបិទខ្ទប់ ដោយត្រូវភ្ជាប់ជាមួយនូវលិខិតបញ្ជាបេសកកម្ម ឬប័ណ្ណអនុញ្ញាត។ ការធ្វើដំណើរដោយមូលហេតុសុខភាពបន្ទាន់ ជាដើម។
នៅតំបន់លឿង ក្នុងក្រុងព្រះសីហនុ ក៏បានកំណត់ហាមឃាត់នូវរាល់ការជួបជុំ ឬការប្រមូលផ្តុំមនុស្ស ដើម្បីសេពគ្រឿងស្រវឹងគ្រប់ប្រភេទ។ តំបន់លឿង ក៏ត្រូវអនុវត្តបម្រាមគោចរ ដោយផ្អាកជាបណ្តោះអាសន្ននូវរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្ម នៅចន្លោះម៉ោង ៨យប់ ដល់ម៉ោង ៥ភ្លឺ លើកលែងតែក្នុងករណីមួយចំនួន ដូចជា ការធ្វើដំណើររបស់មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ ការធ្វើដំណើរដោយមូលហេតុសុខភាពបន្ទាន់ ការដឹកជញ្ជូនទំនិញ ជាដើម។
សេចក្តីសម្រេចរបស់រដ្ឋបាលខេត្តព្រះសីហនុ ក៏បានកំណត់ថា ក្នុងករណីរកឃើញមានអ្នកជំងឺកូវីដ១៩ នៅក្នុងលំនៅឋានណាមួយ ឬទីសំណាក់ណាមួយ ឬសណ្ឋាគារ កាស៊ីណូ ផ្ទះសំណាក់ណាមួយ ឬក្រុមហ៊ុនណាមួយ…។ល។ ត្រូវកំណត់ទីតាំងនោះ ជា «ទីតាំងក្រហម» ទោះបីទីតាំងនោះ ស្ថិតនៅក្នុងតំបន់ណាមួយក៏ដោយ។
សូមរម្លឹកថា ដើម្បីទប់ស្កាត់ការឆ្លងរាលដាលជំងឺកូវីដ១៩ ក្នុងព្រឹត្តិការណ៍សហគមន៍២០កុម្ភៈ នៅខេត្តព្រះសីហនុ បានអនុវត្តវិធានការបិទខ្ទប់ខេត្តទាំងមូល កាលពីថ្ងៃទី៤ ខែមីនា ឆ្នាំ២០២១។ រហូតដល់ក្រោយ រាជរដ្ឋាភិបាល សម្រេចបើកខេត្តឡើងវិញ កាលពីថ្ងៃទី២៦មេសា ទើបខេត្តព្រះសីហនុ បើកព្រំដែនខេត្តឡើងវិញ តែបានបិទខ្ទប់ក្រុងព្រះសីហនុ ដោយសារតែមានការឆ្លងរាលដាលជំងឺកូវីដ១៩ ច្រើន។
មកដល់ពេលនេះ រដ្ឋបាលខេត្តព្រះសីហនុ បានសម្រេចដាក់ចេញវិធានការថ្មី ១៤ថ្ងៃទៀត ដោយបង្រួមតំបន់បិទខ្ទប់ ដែលបែងចែកជា ៣តំបន់ ហើយតំបន់បិទខ្ទប់ ក៏ត្រូវបានបង្រួម មកនៅតូចជាងពេលមុន៕
ចែករំលែកព័តមាននេះ