កូវីដ១៩ ថយនៅភ្នំពេញ តែខេត្ត និងករណីពលករមកពីថៃ កើន
- ភ្នំពេញ
ភ្នំពេញ៖ ក្នុងរយៈពេលប៉ុន្មានថ្ងៃនេះ ករណីឆ្លងសហគមន៍ តាមរយៈព្រឹត្តិការណ៍ ថ្ងៃ២០កុម្ភៈ នៅក្នុងប្រទេសកម្ពុជាយើង ហាក់បានថមថយ និងឈានទៅគ្រប់គ្រងបានហើយ។ នៅភ្នំពេញ ថយចុះច្រើនជាងគេ។…
ភ្នំពេញ៖ ក្នុងរយៈពេលប៉ុន្មានថ្ងៃនេះ ករណីឆ្លងសហគមន៍ តាមរយៈព្រឹត្តិការណ៍ ថ្ងៃ២០កុម្ភៈ នៅក្នុងប្រទេសកម្ពុជាយើង ហាក់បានថមថយ និងឈានទៅគ្រប់គ្រងបានហើយ។ នៅភ្នំពេញ ថយចុះច្រើនជាងគេ។…
ភ្នំពេញ៖ ក្នុងរយៈពេលប៉ុន្មានថ្ងៃនេះ ករណីឆ្លងសហគមន៍ តាមរយៈព្រឹត្តិការណ៍ ថ្ងៃ២០កុម្ភៈ នៅក្នុងប្រទេសកម្ពុជាយើង ហាក់បានថមថយ និងឈានទៅគ្រប់គ្រងបានហើយ។ នៅភ្នំពេញ ថយចុះច្រើនជាងគេ។ តែនៅតាមបណ្តាខេត្តមួយចំនួន ហាក់ដូចជា កើនឡើង ជារៀងរាល់ថ្ងៃ ខណៈដែលចំនួនពលករខ្មែរ ធ្វើដំណើរចូលមកពីប្រទេសថៃ នាប៉ុន្មានថ្ងៃនេះ រកឃើញកើតកូវីដ ហាក់ដូចជាកម្រើកឡើងវិញ។
កាលពីថ្ងៃទី១៣ ខែឧសភា ក្រសួងសុខាភិបាល បានប្រកាសពីករណីរកឃើញអ្នកឆ្លងកូវីដ១៩ថ្មី នៅទូទាំងប្រទេស ចំនួន ៤៤៦នាក់ ជាសះស្បើយ ៩៨០នាក់ និងមានអ្នកស្លាប់ ៦នាក់ កាលពីថ្ងៃទី១២ ខែឧសភា។ គិតត្រឹមព្រឹកថ្ងៃទី១៣ ខែឧសភា នៅទូទាំងប្រទេស មានអ្នកឆ្លងកូវីដ១៩ សរុបចំនួន ២១១៤១នាក់។ ក្នុងនោះ ជាសះស្បើយ ៩៥១៩នាក់ និងស្លាប់សរុប កើនឡើងដល់ ១៤២នាក់។
របាយការណ៍តាមបណ្តារាជធានីខេត្ត ដែលបានបង្ហោះតាមហ្វេសប៊ុក កាលពីថ្ងៃទី១៣ឧសភា បង្ហាញថា នៅភ្នំពេញ បន្តមានអ្នកឆ្លងច្រើនជាងគេដដែល តែបានថយចុះបើធៀបនឹងបណ្តាថ្ងៃមុនៗ។ នោះគឺនៅថ្ងៃទី១២ ខែឧសភា នៅរាជធានីភ្នំពេញ រកឃើញករណីវិជ្ជមានកូវីដ-១៩ ចំនួន ១៥៤នាក់ ដែលជាករណីឆ្លងក្នុងសហគមន៍។ ចំនួននេះ បានថយចុះបើធៀបនឹងថ្ងៃទី១១ឧសភា។ ថ្ងៃទី១១ឧសភា ដែលមានអ្នកឆ្លងកូវីដចំនួន ២៧៩នាក់ និងថ្ងៃមុនៗ ក៏សុទ្ធតែចូលខ្ទង់ជាង ២០០នាក់។
ក្រៅពីនោះ កាលពីថ្ងៃទី១២ឧសភា នៅខេត្តតាកែវ ក៏បានរកឃើញអ្នកឆ្លងកូវីដ ៧នាក់ និងស្លាប់ម្នាក់។ នៅខេត្តកំពង់ចាម ១៣នាក់ ខេត្តបាត់ដំបង ៤នាក់ និងនៅខេត្តកំពង់ធំ រកឃើញអ្នកឆ្លងថ្មី ៧នាក់។ នៅខេត្តព្រះសីហនុ មានអ្នកឆ្លង ៧០នាក់។ ខេត្តកំពង់ស្ពឺ រកឃើញអ្នកឆ្លងកូវីដ១៩ថ្មី ចំនួន ២៣នាក់ទៀត ជាករណីឆ្លងសហគមន៍ ជាដើម។
របាយការណ៍ពីខេត្តនៅជាប់ព្រំដែនថៃ ក៏ដូចជា ក្រសួងសុខាភិបាល ក៏បានបង្ហាញពីចំនួនពលករខ្មែរ ឆ្លងដែនមកពីថៃ រកឃើញឆ្លងកូវីដជាបន្តបន្ទាប់។ ក្នុងនោះ នៅថ្ងៃទី១២ឧសភា ក្នុងចំណោមអ្នកឆ្លងថ្មី សរុប ៤៤៦នាក់ គឺមានករណីនាំចូលពីក្រៅប្រទេស ចំនួន ១៥នាក់។ ករណីនាំចូលពីក្រៅប្រទេសនេះ សំដៅលើអ្នកធ្វើដំណើរចូលកម្ពុជាតាមយន្តហោះ និងពលករខ្មែរ ធ្វើដំណើរចូលកម្ពុជា តាមព្រំដែនគោក ដែលមានច្រើនជាងគេ នៅខេត្តបាត់ដំបង បន្ទាយមានជ័យ ប៉ៃលិន និងខេត្តឧត្តរមានជ័យ ជាដើម។
ជាវិធានការរបស់រាជរដ្ឋាភិបាលកម្ពុជា ដើម្បីទប់ស្កាត់ការឆ្លងរាលដាលជំងឺកូវីដ១៩ ពីក្រៅប្រទេស ចូលមកកម្ពុជា គឺតាមផ្លូវអាកាស ត្រូវបានអនុវត្តវិធានការត្រួតពិនិត្យសុខភាព ធ្វើតេស្តយកសំណាក រកកូវីដ១៩ នៅពេលចុះពីយន្តហោះ ហើយយកអ្នកដំណើរទាំងអស់ ទៅធ្វើចត្តាឡីស័ក ១៤ថ្ងៃ នៅសណ្ឋាគារ ឬនៅកន្លែង ដែលក្រសួងសុខាភិបាល រៀបចំ។ អ្នកដំណើរចូលកម្ពុជា តាមផ្លូវអាកាស ត្រូវបានគ្រប់គ្រងបានល្អ។
ចំណែកនៅតាមព្រំដែនគោក ក៏អ្នកដំណើរទាំងអស់ ពិសេសពលករខ្មែរយើង ត្រូវឆ្លងកាត់ការពិនិត្យសុខភាពបឋម និងនាំទៅធ្វើចត្តាឡីស័ក នៅតាមបណ្តាខេត្តជាប់ព្រំដែន ព្រមទាំងធ្វើតេស្ត រកមេរោគកូវីដ១៩។ វិធានការរឹតបន្តឹងនេះ ត្រូវបានអនុវត្តចាប់តាំងថ្ងៃទី២០ ខែធ្នូ ឆ្នាំ២០២០ ក្នុងពេលប្រទេសថៃ ផ្ទុះការឆ្លងរាលដាលកូវីដ ក្នុងសហគមន៍។ វិធានការទាំងនោះ ត្រូវបានអនុវត្តបន្តដល់សព្វថ្ងៃ។
ជាបន្តបន្ទាប់ មុនពេលកម្ពុជាផ្ទុះការឆ្លងសហគមន៍២០កុម្ភៈ គឺចំនួនពលករខ្មែរ មកពីថៃ ត្រូវបានរកឃើញឆ្លងកូវីដ១៩ ត្រឹមតែ ៩០នាក់ប៉ុណ្ណោះ។ ចំនួននេះ កើនឡើងតិចតួច អំឡុងពេលផ្ទៃក្នុងប្រទេស ឆ្លងរាលដាលខ្លាំងក្នុងសហគមន៍។
ប៉ុន្តែក្នុងអំឡុងពេលចុងក្រោយនេះ ពេលដែលការឆ្លងសហគមន៍ ក្នុងព្រឹត្តិការណ៍ថ្ងៃ២០កុម្ភៈ ហាក់បានថមថយ ដែលរាជរដ្ឋាភិបាល ឈានទៅគ្រប់គ្រងបាន ពិសេសនៅភ្នំពេញ ក៏បានថយចុះជាបន្តបន្ទាប់ បែរជានៅតាមបណ្តាខេត្តមួយចំនួន ហាក់ដូចជា កើនឡើងបន្តិច។ ចំណែកពលករខ្មែរ ឆ្លងដែនមកពីប្រទេសថៃ ហើយរកឃើញឆ្លងកូវីដ ក៏ហាក់ដូចជា កម្រើកឡើងវិញ។
ដូច្នេះអំឡុងពេលដែលកូវីដនៅផ្ទៃក្នុងប្រទេស រាងថមថយ ហើយតាមបណ្តាខេត្តខ្លះ ក៏ហាក់កើនឡើងវិញនេះ អាជ្ញាធរសមត្ថកិច្ចយើង ពិសេសនៅតាមបណ្តាខេត្តជាប់ព្រំដែនថៃ រួមមាន៖ កោះកុង ពោធិ៍សាត់ បាត់ដំបង ប៉ៃលិន បន្ទាយមានជ័យ និងខេត្តឧត្តរមានជ័យ សូមបង្កើនការទប់ស្កាត់ ធ្វើយ៉ាងណា កុំឲ្យប្រជាពលរដ្ឋខ្មែរយើង ឆ្លងដែនខុសច្បាប់ ចេញចូលតាមច្រករបៀងនានា ព្រោះថា បើពលរដ្ឋខ្មែរយើង ចេញចូលតាមច្រកព្រំដែនផ្លូវការ តាមច្បាប់ត្រឹមត្រូវ គឺមិនជាបញ្ហាទេ ដោយសារតែមានយន្តការនៃការត្រួតពិនិត្យសុខភាព និងការធ្វើចត្តាឡីស័កយ៉ាងហ្មត់ចត់។
ដើម្បីរឹតបន្តឹងវិធានការនេះ ត្រូវបន្ថែមកម្លាំងយាមល្បាត តាមបន្ទាត់ព្រំដែន។ ក្នុងនោះ ក៏ត្រូវរកឲ្យឃើញអ្នកឆ្លងដែនខុសច្បាប់ ហើយនាំទៅធ្វើចត្តាឡីស័ក ព្រមទាំងសួររកឲ្យឃើញពីដំណើរឆ្លងដែនខុសច្បាប់ ដើម្បីតាមរកមេខ្យល់ ឬក៏អាជ្ញាធរសមត្ថកិច្ច នៅច្រកព្រំដែនណា ដែលនាំផ្លូវ និងអនុញ្ញាតចេញចូលដោយខុសច្បាប់នេះ។ ក្នុងនោះ មេខ្យល់ នាំពលករចេញចូលឆ្លងដែនខុសច្បាប់ ក៏ត្រូវចាប់ឲ្យបាន ដូចកន្លងមក មិនតិចនាក់ទេ ត្រូវបានចាប់ខ្លួន បញ្ជូនទៅកាត់ទោស នៅតុលាការ ក្នុងករណីនាំពលករឆ្លងដែនខុសច្បាប់នេះ។
ពលករឆ្លងដែនមកថៃ មិនមែនចេះបំបាំងកាយ ឬចេះជ្រែកដីឡើយ។ វាទាល់តែមានមេខ្យល់នាំផ្លូវ ឬក៏អាជ្ញាធរសមត្ថកិច្ច នៅព្រំដែន បិទភ្នែកបិទច្រមុះ បើកដៃឲ្យឆ្លងកាត់ព្រំដែន ទើបអាចចេញចូលទៅមកប្រទេសថៃបាន។
ក្នុងកាលៈទេសៈយើងពេលនេះ ក្នុងពេលផ្ទៃក្នុងប្រទេស មិនទាន់កាត់ផ្តាច់ និងបញ្ចប់ព្រឹត្តិការណ៍ឆ្លងសហគមន៍ ២០កុម្ភៈផង ហើយបើនៅតាមព្រំដែន កម្រើកឡើងវិញនូវការឆ្លងរាលដាលជំងឺកូវីដ តាមរយៈពលករខ្មែរយើង ឆ្លងដែនមកពីថៃ រកឃើញឆ្លងកូវីដ១៩ ទៀតនោះ គឺជាបន្ទុកថ្មីថែមមួយកម្រិតទៀត។ បើអ្នកឆ្លងដែនទាំងនោះ ចូលមក រកឃើញនៅទល់ដែន មិនជាបញ្ហាចោទប៉ុន្មានទេ តែបើអ្នកឆ្លងដែនទាំងនោះ រួចធ្លាយ ធ្វើដំណើរ រហូតចូលមកដល់ស្រុកកំណើត តាមបណ្តាខេត្តនានា នោះគឺជាបញ្ហា។ បញ្ហា ដែលបង្កឲ្យមានហានិភ័យឆ្លងរាលដាលជំងឺកូវីដ១៩ ខណៈដែលនៅតាមបណ្តាខេត្ត ក៏កំពុងទប់ស្កាត់ និងបន្តរកឃើញអ្នកកើតជំងឺកូវីដ១៩ ជារៀងរាល់ថ្ងៃ៕
ចែករំលែកព័តមាននេះ