រាជធានីភ្នំពេញ ៖ វិស័យទេសចរណ៍កម្ពុជាបានធ្លាក់ចុះជាបន្តបន្ទាប់តាំងពីឆ្នាំ២០២០មក ពោលគឺជាប់តាំងពីមានការរីករាលដាលនៃជំងឺកូវីដ១៩នៅលើពិភពលោកដែលធ្វើឱ្យភ្ញៀវទេសចរអន្តរជាតិធ្វើដំណើរកម្សាន្តបានធ្លាក់ចុះជាបន្តបន្ទាប់ រហូតដល់ឆ្នាំ២០២១នេះ ចំនួនភ្ញៀវទេសចរអន្តរជាតិមកដល់កម្ពុជានៅតែបន្តធ្លាក់ចុះថែមទៀត ។
យោងតាមរបាយការណ៍របស់ក្រសួងទេសចរណ៍កម្ពុជាឱ្យដឹងថាក្នុងរយៈពេល១ត្រីមាសដំបូងនៃឆ្នាំ២០២១នេះភ្ញៀវទេសចរ អន្តរជាតិបានមកដល់កម្ពុជាសរុបមានចំនួនតែជាង៧ម៉ឺននាក់ប៉ុណ្ណោះ ធ្លាក់ចុះប្រមាណ៩៣,៩ភាគរយធៀបននឹងរយៈពេលដូចគ្នាក្នុងឆ្នាំ២០២០ ខណៈត្រីមាសទី១ឆ្នាំ២០២០កន្លងទៅកម្ពុជាទទួលបានភ្ញៀវទេសចរអន្តរជាតិចំនួនជាង១,១៥លាននាក់ ។
របាយការណ៍ដដែលនេះបានបង្ហាញថា ចាប់តាំងពីខែមករា ដល់ខែដំណាច់មីនា ២០២១ ភ្ញៀវអន្តរជាតិដែលបានមកដល់កម្ពុជាតាមរយៈច្រកអាកាសយានដ្ឋានមានចំនួន៣៣.៥៣៥នាក់ ធ្លាក់ចុះ៩៤,៩ភាគរយធៀបនឹងរយៈពេលដូចគ្នាក្នុងឆ្នាំ២០២០ ក្នុងនោះអាកាសយានដ្ឋានអន្តរជាតិទទួលសៀមរាបបានអន្តរជាតិតែ២នាក់ប៉ុណ្ណោះ ខណៈអាកាសយានដ្ឋានអន្តរជាងកងកេង ទទួលបានជាង៦៤០០នាក់ផងដែរ ក្នុងរយៈពេលបីខែដំបូងនេះ ហើយភ្ញៀវអន្តរជាតិដែលចូលតាមច្រកផ្លូវទឹកមិនមាននោះទេក្នុងត្រីមាសទី១នេះ ។
យោងតាមការព្យាកររបស់ក្រសួងទេសចរណ៍កម្ពុជាបានបញ្ជាក់ថា ក្នុងឆ្នាំ២០២១នេះ វិស័យទេសចរណ៍នឹងបន្តធ្លាកក់ចុះ ហើយភ្ញៀវអន្តរជាតិដែលមកដល់កម្ពុជានឹងធ្លាក់ចុះបន្ថែមទៀតពី ៦០ទៅ៧០ភាគរយនិងរំពឹងថាងើបឡើងវិញបន្តិចនៅក្នុងឆ្នាំ២០២២និងឆ្នាំ២០២៣ ដែលជាពេលវេលាកម្ពុជានឹងរៀបចំព្រឹត្តិការណ៍ប្រកួតកីឡាស៊ីហ្គេម។
លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានឱ្យដឹងថា បើទោះបីជាពេលនេះកម្ពុជានៅតែទទួលរងឥទ្ធិពលពីវិបត្តិកូវីដ១៩មកលើវិស័យទេសចរណ៍ក្ដី តែប្រតិបត្តិករទេសចរគួរតែត្រៀមរៀបចំនូវសេវាកម្មសម្រាប់ទទួលភ្ញៀវទេសចរអន្តជរជាតិឡើងវិញក្រោយពេលវិបត្តិត្រូវបានបញ្ចប់លោកបន្តថា បើសិនជាយើងមិនបានត្រៀមរៀបចំមុន ហើយរង់ចាំពេលចប់ទើបរៀបចំ ពេលនោះកម្ពុជានឹងចាញ់គេ ហើយប្រទេសដែលបានរៀបចំរួចហើយគេនឹងទទួលបានភ្ញៀវអន្តរជាតិទាំងនោះទៅកម្សាន្តប្រទេសអស់ហើយ ។ ដូចគ្នានេះដែរ ប្រជាពលរដ្ឋកម្ពុជាជាច្រើនបានចាក់វ៉ាក់សាំងរួចរាល់ ហើយមិនយូរទេ ពេលស្ថានភាពស្ងប់ស្ងាត់បន្តិច ភ្ញៀវក្នុងស្រុកនឹងអាចចេញធ្វើដំណើរការកម្សាន្តទៅតាមតំបន់រមណីយដ្ឋានទេសចរណ៍ នានា ដែលអាចជំរុញឱ្យប្រតិបត្តិករទេសចរត្រូវតែត្រៀមរៀបចំសម្រាប់ភ្ញៀវក្នុងស្រុកផងដែរ ។
លោកបន្ថែមថា យើងមិនដឹងថា រយៈពេលប៉ុន្មានទៀតដែលវិបត្តិនឹងបញ្ចប់ តែបើសិនជាបញ្ចប់បានឆាប់ វិស័យទេសចរណ៍យើងនឹងឆាប់បានងើបឡើងវិញ ហើយនឹងអាចជំរុញឱ្យសេដ្ឋកិច្ចកម្ពុជាងើបទៅតាមហ្នឹងដែរ តែយ៉ាងណាក៏ដោយលោករំពឹងថារដ្ឋាភិបាលនឹងជួយសម្រួលដល់វិស័យទេសចរណ៍ ដែលរងផលប៉ះពាល់មុនគេ និងធ្ងន់ធ្ងរជាងពីវិបត្តិនៃជំងឺកូវីដ១៩ តាមរយៈការបន្ធូបន្ថយពន្ធ ការអនុគ្រោះនានាបន្តទៀតទោះបីជាទទួលបានភ្ញៀវទេសចរឡើងវិញក្ដី ៕
ចែករំលែកព័តមាននេះ