អ៊ីស្រាអែល-ប៉ាឡេស្ទីន ៖ ក្រុមសកម្មប្រយុទ្ធប៉ាឡេស្ទីនពីតំបន់ហ្គាហ្សា បានបាញ់រ៉ុក្កែតរាប់សិបគ្រាប់លើអ៊ីស្រាអែល បន្ទាប់ពីការវាយប្រហារតាមអាកាសរបស់អ៊ីស្រាអែល បានស.ម្លា.ប់យោធាជាន់ខ្ពស់ពួកគេជាច្រើននាក់ ព្រមទាំងបំផ្លិចបំផ្លាញអគារជាច្រើននៅតំបន់ហ្គាហ្សា កាលពីថ្ងៃទី១២ ខែឧសភា។ នេះបើតាមការចេញពីផ្សាយពីសារព័ត៌មាន BBC។
របាយការណ៍បាននិយាយថា ទីតាំងជាច្រើននៅភាគខាងត្បូងប្រទេសអ៊ីស្រាអែល រងការវាយប្រហារដោយបានឆក់យកជិវិតជនស៊ីវិលផងដែរ។ ការកើនឡើងនៃការប្រយុទ្ធគ្នា ដែលចាប់ផ្តើមតាំងពីថ្ងៃ១០ ខែឧសភា បានជំរុញឱ្យប្រេសិតអង្គការសហប្រជាជាតិ (UN) ព្រមានពីការឈានទៅរកសង្គ្រាមទ្រង់ទ្រាយកាន់តែធំ។
យ៉ាងហោចណាស់មនុស្សចំនួន ៦៥នាក់នៅតំបន់ហ្គាហ្សា រួមទាំងកុមារ ១៤នាក់ និងប្រជាជនអ៊ីស្រាអែល ៧នាក់ត្រូវបានស.ម្លា.ប់ចាប់តាំងពីមានអំពើហិង្សានេះ។
ការប្រយុទ្ធគ្នាបានផ្ទុះឡើង បន្ទាប់ពីភាពតានតឹងរវាងអ៊ីស្រាអែល និងប៉ាឡេស្ទីនកើនឡើងជាច្រើនសប្តាហ៍កន្លងមក នៅភាគខាងកើតទីក្រុងហ្ស៊េរូសាឡឹម។ ដែលឈានដល់ការប៉ះទង្គិចគ្នានៅព្រះវិហារមួយ ជាទីសក្ការៈសម្រាប់ជនមូស្លីម និងជនជាតិជ្វីហ្វ។
អំពើហឹង្សាបន្ថែមទៀត នៅក្នុងតំបន់អ៊ីស្រាអែលជាមួយប្រជាជនជ្វីហ្វ និងអារ៉ាប់ចម្រុះបាននាំឱ្យមានការចាប់ខ្លួនមនុស្សជាង ៣៧៤នាក់កាលពីល្ងាចថ្ងៃទី១២ ខែឧសភា ហើយប៉ូលិស ៣៦នាក់បានរងរបួស។
ឆ្លើយតបជុំវិញបញ្ហានេះ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលយប់ថ្ងៃទី១២ ខែឧសភា ថាលោកនឹងបញ្ជូនកងកម្លាំងយោធា ដើម្បីជួយប៉ូលិសរក្សាសណ្តាប់ធ្នាប់នៅក្នុងទីក្រុងនានា ដែលរងការបំផ្លិចបំផ្លាញដោយអំពើហឹង្សានេះ។ ដោយលោកបានហៅការវាយប្រហារនៅក្នុងប៉ុន្មានថ្ងៃថ្មីៗនេះថា ជាទង្វើអនាធិបតេយ្យ៕
ចែករំលែកព័តមាននេះ