ខេត្តកំពង់ចាម ៖ រមណីយដ្ឋានកែច្នៃឆ្នេរខ្សាច់កោះប៉ែន ដែលធ្លាប់តែទាក់ទាញមនុស្សពីតាមបណ្ដាខេត្តផ្សេងៗ ឱ្យមកកម្សាន្តលេងច្រើនកុះករ តែមកដល់ពេលនេះបែរជាមានសភាពស្ងប់ស្ងាត់ សូម្បីតែប្រដឹសឫស្សីតភ្ជាប់ពីត្រើយក្រុងកំពង់ចាមទៅឆ្នេរខ្សាច់កោះប៉ែន មានប្រវែងជាង៧០០ម៉ែត្រ គឺមិនមានមនុស្សដែលឆ្លងកាត់នោះទេ ព្រោះម្នាក់ៗខ្លាចឆ្លងជំងឺកូវីដ១៩ ដែលកំពុងតែរាតត្បាត។
លោកស្លេះ សាន់ អាយុ៥៦ឆ្នាំ អ្នកលក់សំបុត្រនៅឆ្នេរខ្សាច់កោះប៉ែន ប្រាប់ឲ្យដឹងនៅព្រឹកថ្ងៃទី១២ ឧសភា ២០២១ ថា ក្រោយពីទឹកទន្លេមេគង្គ បានចាប់ផ្ដើមស្រក លោកប៊ុន ដារ៉ា ម្ចាស់រមណីយដ្ឋានកោះប៉ែន បានជួលកម្មករជាច្រើននាក់ឲ្យដំឡើងប្រដឹសឫស្សី សម្រាប់ភ្ញៀវជាតិនិងអន្តរជាតិដើរឆ្លងកាត់ពីរក្រោយក្រុងកំពង់ចាម ទៅឆ្នេរខ្សាច់កោះប៉ែន។ មនុស្សម្នាក្មេងចាស់ប្រុសស្រី នាំគ្នាមកលេងនៅឆ្នេរខ្សាច់កោះប៉ែន ក្នុងអំឡុងពេលបុណ្យចូលឆ្នាំប្រពៃណីចិនកន្លងទៅរាងគ្រាន់បើ បន្ទាប់មកជំងឺកូវីដបានផ្ទុះឡើងធ្វើឱ្យឆ្នេរខ្សាច់កោះប៉ែន មានសភាពស្ងាត់ ហើយរដ្ឋបាលខេត្តកំពង់ចាមក៏បានចេញសេចក្តីប្រកាស បិទរមណីយដ្ឋានទាំងអស់នៅក្នុងខេត្តកំពង់ចាម ដើម្បីការពារការរីករាលដាលនៃជំងឺកូវីដ។
លោកបានបន្តថា ក្រោយមក រដ្ឋបាលខេត្តបានអនុញ្ញាតឱ្យរមណីយដ្ឋានដំណើរការឡើងវិញ ទោះជាបែបនេះក្តីមកដល់ខែឧសភា ២០២១ ប្រដឹសកោះប៉ែន គឺនៅតែស្ងប់ស្ងាត់ មានពេលខ្លះក្នុងមួយថ្ងៃមានមនុស្សដែលឆ្លង២ទៅ៥នាក់ ដើម្បីទៅលេងឆ្នេរខ្សាច់កោះប៉ែន ជួនមួយថ្ងៃពេញមិនមានមនុស្សដើរឆ្លងកាត់ក៏មានដែរ។ដោយទទួលបានការណែនាំពីមន្ទីរទេសចរណ៍ខេត្ត រូបលោកបានរៀបចំឲ្យមានពាក់ម៉ាស់និងអាកុលបាញ់លាងសំអាតដៃ ជាប់ជាប្រចាំជាមួយនោះថែមទាំងបានចាក់វ៉ាក់សាំងការពារជំងឺផងដែរ។នៅខែមិថុនាខាងមុខទឹកទន្លេមេគង្គ បានបន្តហក់ឡើង ដូច្នេះប្រដឹសឫស្សីនិងត្រូវរុះរើ សម្រាប់យកទុកប្រើប្រាស់នៅឆ្នាំក្រោយដែលអាចក្រាលធ្វើជាបន្ទាំសម្រាប់ម៉ូតូឬរថយន្តបើកឆ្លងកាត់ដាក់នៅតាមផ្លូវលើឆ្នេរខ្សាច់កោះប៉ែន ។
លោកស៊ាន សុគុន ប្រធានមន្ទីរទេសចរណ៍ខេត្តកំពង់ចាមមានប្រសាសន៍ឲ្យដឹងដែរថា កន្លងទៅរដ្ឋបាលខេត្តបានចេញសេចក្តីប្រកាស ដល់រមណីយដ្ឋានកែច្នៃនិងរមណីយដ្ឋានបែបធម្មជាតិនៅក្នុងខេត្តកំពង់ចាម ទាំងអស់ត្រូវតែផ្អាកទទួលភ្ញៀវដើម្បីបង្ការទប់ស្កាត់ការរីករាលដាលឆ្លងនៃជំងឺកូវីដ។ ក្រោយមកក៏បានប្រកាសបើកវិញទោះជាយ៉ាងនេះក៏ដោយប្រជាពលរដ្ឋនៅក្នុងខេត្តកំពង់ចាម រួមនិងតាមបណ្ដាខេត្តផ្សេងទៀតម្នាក់ៗ មានការខ្លាចរអាដោយមិនហ៊ាននាំគ្នាទៅកំសាន្តលេងនោះទេ។
ប្រធានមន្ទីរទេសចរណ៍ខេត្តកំពង់ចាម មានប្រសាសន៍បន្តឲ្យដឹងទៀតថា ទោះបីជារដ្ឋបាលខេត្តអនុញ្ញាតឱ្យបើកដំណើរការឡើងវិញ តែហាមការជួបជុំមនុស្សគ្នាច្រើនហើយគ្រឿងស្រវឹងនៅតែបន្តហាមមិនឱ្យលក់ដូរដដែល។
រដ្ឋមន្ត្រីក្រសួងទេសចរណ៍ក៏បានណែនាំឲ្យអ្នកបម្រើសេវាទេសចរណ៍ត្រូវតែចាក់វ៉ាក់សាំងការពារជំងឺកូវីដ ក្រោយពីចាប់បានចំនួន២ ដុស ត្រូវតែមានកាតពាក់សម្គាល់ដើម្បីអោយភ្ញៀវដែលគេមកកំសាន្តលេងមានការទុកចិត្ត ព្រមទាំងពាក់ម៉ាស់ ជាមួយនឹងអាល់កុលឬជែលបាញ់លាងសម្អាតដៃ។ ដោយឡែកមន្ត្រីមន្ទីរទេសចរណ៍ខេត្តកំពង់ចាមទាំងអស់បានចាក់វ៉ាក់សាំងការពារកូវីតរួចរាល់ជាមួយនោះនៅតែប្រកាន់ជំហរអនុវត្ត៣កុំ ៣ការពារ។
ដោយមានការណែនាំពីសំណាក់លោកអ៊ុន ចាន់ដា អភិបាលខេត្ត មន្ត្រីមន្ទីរទេសចរណ៍បានចុះផ្សព្វផ្សាយនៅតាមបណ្ដារមណីយដ្ឋាននានា ក្នុងខេត្តកំពង់ចាម ដោយឲ្យម្ចាស់រមណីយដ្ឋានត្រូវយកចិត្តទុកដាក់ អនុវត្តវិធានការរបស់ក្រសួងសុខាភិបាល ដើម្បីរួមចំណែកទប់ស្កាត់ការរីករាលដាលនៃជំងឺកូវីដ-១៩ ៕
ចែករំលែកព័តមាននេះ