ចាំទេ! តារាភាពយន្តជើងចាស់អ្នកស្រី ណុប ណែម នៅមានជីវិត ក្រោយបាត់វត្តមានជាង១០ឆ្នាំ
- ភ្នំពេញ
រាជធានីភ្នំពេញ ៖ តារាសម្តែងជើងចាស់អ្នកស្រី ដួង តារា ឬអ្នកស្រី ណុប ណែម ត្រូវបានគេដឹងថា អ្នកស្រីកំពុងរស់រានមានជីវិតនៅឡើយទេ…
រាជធានីភ្នំពេញ ៖ តារាសម្តែងជើងចាស់អ្នកស្រី ដួង តារា ឬអ្នកស្រី ណុប ណែម ត្រូវបានគេដឹងថា អ្នកស្រីកំពុងរស់រានមានជីវិតនៅឡើយទេ ខណៈពេលដែលអ្នកស្រីបានបាត់វត្តមានឈឹងអស់ប្រមាណជាង១០ឆ្នាំមកហើយ ដែលទស្សនិកជាច្រើនបានសន្និដ្ឋានពីការទទួលមរណភាពរបស់អ្នកស្រី។ យ៉ាងណានាពេលនេះ អ្នកស្រីត្រូវបានគេរកឃើញនៅមានជីវិតនៅឡើយ និងកំពុងរស់នៅក្នុងខេត្តកំពង់ស្ពឺ ជាមួយនឹងការញាំញីដោយជំងឺ និងជរាពាធ។
បើយោងតាមផេកហ្វេសប៊ុក Amazing Cambodia បានអោយដឹងថា ថ្ងៃនេះ យើងខ្ញុំមានសេចក្តីរំភើបត្រេកអរដែលបានសំណេះសំណាលជាមួយលោកយាយ ដួង តារា (ឬលោកស្រី ណុប ណែម) ដែលជាតារាភាពយន្តជើងចាស់ម្នាក់បានបាត់មុខពីសង្វៀនសិល្បៈជាង១០ឆ្នាំមកហើយ រហូតដល់មានព័ត៌មានចចាមអារ៉ាមអកុសលមួយចំនួនថា លោកយាយបានលាចាកលោកហើយ។
ផេកខាងលើបញ្ជាក់ថា តាមការពិតគាត់នៅរស់ទេ ជាមួយចៅស្រីម្នាក់នៅស្រុកសំរោងទង ខេត្តកំពង់ស្ពឺ ក្រោយបោះបង់អាជីពនេះទាំងអាលោះអាល័យ។ លោកយាយបានបកស្រាយចម្ងល់ថា មូលហេតុដែលលោកយាយលាចាកពីសិល្បៈថតកុន ដោយសារតែមានជំងឺពុកឆ្អឹងមិនអាចថតបន្តបាន ទើបផ្លាស់ប្តូរមករស់នៅកំពង់ស្ពឺជាមួយកូនស្រី ជាទីតាំងដែលលោកយាយធ្លាប់រស់នៅស្គាល់គេឯងកាលពីជំនាន់ប៉ុលពត។ រឿងចុងក្រោយដែលលោកយាយបានថតក្នុងជីវិតសិល្បៈមានដូចជា រឿង «ជ្រោះស្នេហ៍ពេជ្រនិល» រឿង «ថ្ងៃរះបញ្ច្រាសទិស» រឿង «តេជោដំឌិន» រឿង «ផ្នូរសត្យា» រឿង «កងកម្មកងកែវ» ។ល។
អ្នកស្រី ណុប ណែមបានអោយដឹងទៀតថា ភាពយន្តដែលគាត់បានចូលសម្តែងដំបូង គឺរឿង លោហិតវាសនា ផលិតកម្មក្រុងកែបភាពយន្ត ដឹករឿងដោយ លោក ផឹក សំផេន ក្នុងឆ្នាំ១៩៦៤ (បញ្ចាំងឆ្នាំ១៩៦៥) ហើយបានចូលថតកុនតាមរយៈលោកស្រី ជិន ស៊ីណាត ដែលជាតារាភាពយន្តសម័យនោះ។
សព្វថ្ងៃ លោកយាយមានព្រះជន្មាយុ៨១ឆ្នាំហើយ ហើយសព្វថ្ងៃកូនស្រីគាត់បានស្លា.ប់ នៅសល់តែចៅស្រីនៅផ្ទះជាមួយគ្នាជួយចិញ្ចឹមមើលថែ។ ប្រិយមិត្ត ដែលស្រឡាញ់រាប់អានគាត់ អាចជួយបរិច្ចាគថវិកាតាម ABA ចៅស្រីគាត់ផ្ទាល់ 000710640 PICH MAKARED។ «ធ្វើបុណ្យទាន់ខែភ្លឺ»៕
ចែករំលែកព័តមាននេះ