ខេត្តកំពង់ឆ្នាំង ៖ មន្ត្រីផ្នែក សង្កាត់ និងខណ្ឌរដ្ឋបាលព្រៃឈើកំពង់ឆ្នាំង កាលពីវេលាម៉ោង១១ និង២០នាទីយប់ថ្ងៃទី២ មីនា បានតាមប្រមាញ់ស្ទាក់ចាប់បានរថយន្តដឹកឈើមួយគ្រឿងនៅចំណុចមុខសណ្ឋាគារស៊ី ស្ថិតក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ប៉ុន្តែម្ចាស់រថយន្តកូរ៉េដឹកឈើចំណុះ៣តោននោះ បានគេចខ្លួនបាត់ ។
លោកនូវ ប៉ោលីន នាយរងខណ្ឌរដ្ឋបាលព្រៃឈើកំពង់ឆ្នាំងបានឱ្យដឹងថា រថយន្តកូរ៉េចំណុះ៣តោននោះពាក់ស្លាកលេខធ០០៩៤ ភព៣ ដឹកឈើប្រភេទដើមតាឡាត់ ដើមផ្តៀក និងដើមរកា ចេញពីចំណុចភូមិក្តុល ស្រុកទឹកផុស បំណងយកទៅដាក់នៅសិប្បកម្មមួយកន្លែងដែលទើបបង្កើតឡើងនៅក្នុងស្រុករលាប្អៀរ គឺសិប្បកម្មធ្វើស៊ុមកញ្ចក់ ។ ទោះយ៉ាងណា លោកបញ្ជាក់ថា ការដឹកជញ្ជូន និងកាប់ឈើប្រភេទនេះ គឺខុសច្បាប់ទាំងស្រុង បើទោះជាឈើទាំងនេះជាឈើប្រភេទលេខ៣ លេខ៤ ក្តី ប៉ុន្តែការកាប់បំផ្លាញបែបនេះនឹងធ្វើឱ្យហិនហោចព្រៃឈើលើភ្នំផងដែរ ។
លើសពីនេះទៀត ឈើទាំងនោះមានទំហំមុខកាត់ប្រហែលពីរ ទៅបីតឹក គឺមិនទាន់គ្រប់អាយុត្រូវកាប់នោះទេ ដែលដើមឈើប្រភេទនេះវាអាចមានទំហំមុខកាត់ពីកន្លះម៉ែត្រ ទៅ៧ ឬ៨តឹក ។ ឈើមួយរថយន្តនេះ បើតាមការប៉ាន់ស្មានមានប្រហែលជាង៤ម៉ែត្រគូប ដែលគេកាត់ជាកំណាត់ៗក្នុងមួយកំណាត់មានប្រវែងពី១ម៉ែត្រ ទៅ១ម៉ែត្រកន្លះ ។ នេះជាលើកទីមួយហើយដែលឈើប្រភេទនេះត្រូវបានមន្ត្រីមេព្រៃបង្ក្រាប ៕
ចែករំលែកព័តមាននេះ