រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា រថយន្តឃ្លុបដឹកភេសជ្ជៈមួយគ្រឿងបើកបោះពួយក្នុងល្បឿនលឿនទៅបុកពីក្រោយរថយន្តដឹកដីមួយគ្រឿង ដែលបត់ឆ្លងផ្លូវពេញទំហឹង បណ្តាលអោយរយះបែកទ្រុង ហើយក្រឡាប់ ចាក់ភេសជ្ជៈចោលពេញផ្លូវ និងសង្កត់លើបុរសម្នាក់ដែលកំពុងតែជិះម៉ូតូ បណ្តាលអោយស្លា.ប់នៅនឹងកន្លែងតែម្តង ។ ហើយក្នុងគ្រោះថ្នាក់នេះដែរ បានបណ្តាលអោយបុរសដែលជាអ្នកបើកបររថយន្តឃ្លុប រងរបួសធ្ងន់ និងព្រូ២នាក់ទៀតបានរងរបួសស្រាល ចំណែកអ្នកបើកបររថយន្តដឹកដីវិញ ត្រូវបាននគរបាលឃាត់ខ្លួនតែម្តង ។
សេចក្តីរាយការបន្តថា គ្រោះថ្នាក់ចរាចរណ៍ដ៏រន្ធត់ខាងលើនេះបានកើតឡើងកាលពីវេលាម៉ោងប្រមាណ១១និង១៥នាទីព្រឹក ថ្ងៃទី១១ ខែឧសភា ឆ្នាំ២០២១ នៅតាមបណ្តោយផ្លូវជាតិលេខ៦ ចន្លោះស្ពានលេខ១០ និងលេខ១១ ស្ថិតក្នុងភូមិចំបក់មាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។
ជនរងគ្រោះដែលបានស្លា.ប់ក្នុងគ្រោះថ្នាក់ខាងលើនេះ ត្រូវបាននគរបាលអោយដឹងថា មានឈ្មោះ កាន ថូយ ភេទប្រុស អាយុ៣២ឆ្នាំ មានស្រុកកំណើតនៅភូមិសំពៅលូន ឃុំជាំតាម៉ៅ ស្រុកមេមត់ ខេត្ត កំពងចាម បានជិះម៉ូតូម៉ាកហុងដា ពាក់ស្លាកលេខ ភ្នំពេញ ១IF.១១៧៣ មួយគ្រឿង។
នគរបាលអោយដឹងបន្តថា គ្រោះថ្នាក់នេះ បណ្តាលមកពីរថយន្តដឹកភេសជ្ជៈមួយគ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខភ្នំពេញ ៣D.៥៣៩០ ជិះគ្នា៣នាក់ បានបុកពីក្រោយរថយន្តដឹកដីម៉ាកDAEWOO ពណ៌ឈាមជ្រូក អត់ស្លាកលេខ មួយគ្រឿងទៀតបើកបរដោយឈ្មោះ ប៊ី ប៊ូតេន ភេទប្រុសអាយុ២៨ឆ្នាំ ស្នាក់នៅក្នុងភូមិមឿនជ័យ ឃុំមឿនជ័យ ស្រុករំដួល ខេត្តស្វាយរៀង ខណៈដែលកំពុងតែបត់ឆ្លងផ្លូវ។ ក្នុងគ្រោះថ្នាក់នេះ បណ្តាលឱ្យរថយន្តដឹកភេសជ្ជៈបែកទ្រុងឃ្លុប ហើយក្រឡាប់សង្កត់អ្នកដំណើរម្នាក់បើកបរម៉ូតូស្លា.ប់នៅនឹងកន្លែងកើតហេតុតែម្តង ។
បើតាមសាក្សីបានអោយដឹងថា នៅមុនពេលកើតហេតុ រថយន្តទាំង២គ្រឿង និងម៉ូតូមួយគ្រឿងទៀត បានធ្វើដំណើរក្នុងទិសដៅស្របគ្នា ពីត្បូងទៅជើង (ចេញពីភ្នំពេញ) ដោយរថយន្តដឹកដីបើកមុខ ។ ខណៈពេលធ្វើដំណើរមកដល់កន្លែងកើតហេតុ រថយន្តដឹកដីបង្អន់ល្បឿនបត់ឆ្វេងឆ្លងផ្លូវ ស្រាប់តែរថយន្តដឹកទំនិញទឹកសុទ្ធ និងភេសជ្ជៈ ដែលបើកនៅខាងក្រោយ មកបុកពីក្រោយពេញទំហឹងតែម្តង ។
តាមសាក្សីបានអោយដឹងទៀតថា ក្នុងគ្រោះថ្នាក់នេះ បណ្តាលអោយរថយន្តដឹកភេសជ្ជៈដែលដឹកធ្ងន់នោះ ក៏បានបែកឃ្លុប ហើយក៏ក្រឡាប់ទៅខាងស្តាំដៃ រួចក៏ចង្កត់ពីលើម៉ូតូគ្រឿង បណ្តាលអោយអ្នកបើកម៉ូតូស្លា.ប់នៅនឹងកន្លែងកើតហេតុ ចំណែករថយន្តដឹកទំនិញភេសជ្ជៈខ្ទេតពេញផ្លូវ ។ ហើយក្នុងគ្រោះថ្នាក់នេះដែរ បណ្តាលអោយអ្នកបើកររថយន្តដឹកទំនិញ ព្រមទាំងព្រូ២នាក់បានរងរបួសស្រាល។
ដោយឡែក រថយន្តដឹកដីក៏បានព្យាយាមបើកគេច តែក៏ត្រូវបានកម្លាំងនគរបាលដេញតាមឃាត់បានទាំងអ្នកបើកបរ និងរថយន្តតែម្តង។ ក្រោយពេលកើតហេតុ រថយន្តទាំង២គ្រឿង និងម៉ូតូ ព្រមទាំងអ្នកបើកបរ ត្រូវបាននគរបាលបញ្ជូនទៅកាន់ការិយាល័យចរាចរណ៍ផ្លូវគោក ដើម្បីចាត់ការតាមច្បាប់។ ចំណែកស.ពជនរងគ្រោះបានប្រគល់អោយក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ