រាជធានីភ្នំពេញ ៖ បើទោះបីជាកម្ពុជាកំពុងជួបវិបត្តិនឹងជំងឺកូវីដ១៩ក្ដី ហើយធ្វើឱ្យវិស័យទេសចរណ៍ធ្លាក់ស្ទើរតែដល់កម្រិតសូន្យ ។ យ៉ាងណាទោះស្ថិតនៅក្នុងដំណាក់កាលរីករាលដាលយ៉ាងនេះក្ដី ក្រសួងទេសចរណ៍ ក៏បានត្រៀមរៀបចំទទួលភ្ញៀវទេសចរទាំងជាតិនិងអន្តរជាតិឡើងវិង ដោយរំពឹងថាវិស័យនេះ នឹងចាប់ផ្ដើមងើបឡើងវិញនៅក្នុងឆ្នាំ២០២២ខាងមុខ…
រាជធានីភ្នំពេញ ៖ បើទោះបីជាកម្ពុជាកំពុងជួបវិបត្តិនឹងជំងឺកូវីដ១៩ក្ដី ហើយធ្វើឱ្យវិស័យទេសចរណ៍ធ្លាក់ស្ទើរតែដល់កម្រិតសូន្យ ។ យ៉ាងណាទោះស្ថិតនៅក្នុងដំណាក់កាលរីករាលដាលយ៉ាងនេះក្ដី ក្រសួងទេសចរណ៍ ក៏បានត្រៀមរៀបចំទទួលភ្ញៀវទេសចរទាំងជាតិនិងអន្តរជាតិឡើងវិង ដោយរំពឹងថាវិស័យនេះ នឹងចាប់ផ្ដើមងើបឡើងវិញនៅក្នុងឆ្នាំ២០២២ខាងមុខ ។
យោងតាមសេចក្តីប្រកាសព័ត៌មានរបស់ក្រសួងទេសចរណ៍កម្ពុជានៅថ្ងៃទី១១ ឧសភា២០២១នេះ ឱ្យដឹងថា ក្រសួងប្រកាសរកបេក្ខជន ដែលរស់នៅតំបន់ភូមិភាគឦសានដើម្បីចូលសិក្សាវគ្គបណ្ដុះបណ្ដាលគ្រូបង្គោលផ្នែកសេវាកម្មម្ហូបអាហារនិងភេសជ្ជៈ ដើម្បីបំពេញសមត្ថភាពឱ្យកាន់តែប្រសើរក្នុងការបណ្ដុះបណ្ដាលដល់អ្នកបម្រើការងារក្នុងវិស័យទេសចរណ៍បន្តទៀត ។ ក្នុងន័យនេះ នៅពេលវិបត្តិកូវីដ១៩ ភ្ញៀវទេសចរជាតិនិងអន្តរជាតិនឹងចាប់ផ្ដើមចេញធ្វើដំណើរកម្សាន្តនៅតំបន់ទេសចរណ៍នានាក្នុងប្រទេសកម្ពុជា ហើយពេលនោះ យើងនឹងមានធនធានក្នុងវិស័យនេះស្រាប់ដើម្បីបម្រើជូនភ្ញៀវទេសចរ ។
លោក ជួប រតនា ប្រធាននាយកដ្ឋានផែនការអភិវឌ្ឍន៍ទេសចរណ៍ នៃក្រសួងទេសចរណ៍ និងជាប្រធានលេខាធិការដ្ឋាននៃគណៈកម្មការគ្រប់គ្រងគម្រោង ហូកា (HoKa) បានឱ្យដឹងថា ការសិក្សាវគ្គបណ្តុះបណ្តាលគ្រូបង្គោលផ្នែកសេវាកម្មម្ហូបអាហារ និងភេសជ្ជៈនេះ នឹងចូលរួមអភិវឌ្ឍធនធានមនុស្សក្នុងវិស័យទេសចរណ៍ និងបង្កើនសមត្ថភាពរបស់គ្រូបង្គោលនៅតំបន់ភូមិភាគឦសានឱ្យកាន់ល្អប្រសើរផងដែរ ។
លោកជំទាវឆាយ ស៊ីវលីនប្រធានសមាគមទីភ្នាក់ងារទេសចរណ៍កម្ពុជា បានលើកឡើងផងដែរថា បើទោះបីជាកម្ពុជាជួបវិបត្តិដោយសារតែជំងឺកូវីដ១៩ ហើយមិនមានភ្ញៀវទេសចរចេញធ្វើដំណើរកម្សាន្តតាមរមណីយដ្ឋានដូចមុនក្ដី ក៏ក្រសួងនិងអ្នកពាក់ព័ន្ធគួរតែបណ្ដុះបណ្ដាលធនធានមនុស្សក្នុងវិស័យទេសចរណ៍ឱ្យបានកាន់តែច្រើន ដើម្បីទទួលភ្ញៀវទេសចរអន្តរជាតិពេលចប់វិបត្តិជំងឺកូវីដ ។ បើពុំនោះទេ ពេលដែលភ្ញៀវចាប់ផ្ដើមចេញធ្វើដំណើរកម្សាន្ត តើកម្ពុជាអាចមានសមត្ថភាពប៉ុន្មានក្នុងការទាក់ទាញនិងទទួលភ្ញៀវទេសចរអន្តរជាតិ ។
លោកជំទាវបន្តថា នៅក្នុងឆ្នាំ ២០២០និង២០២១នេះ វិស័យទេសចរណ៍កម្ពុជាក៏ដូចជាពិភពលោកនៅតែមិនអាចមានពន្លឺឡើងវិញនោះទេ ខណៈការរាលដាលនៃជំងឺនេះនៅតែបន្តមាន ហើយក្នុងអំឡុងពេលនេះដែរ រដ្ឋាភិបាលកម្ពុជាគួរតែជួយអនុគ្រោះដល់ប្រតិបត្តិករទេសចរបន្ថែមទៀត ដើម្បីឱ្យពួកគេអាចនៅរង់ចាំបម្រើវិស័យនេះឡើងវិញ នៅពេលចប់វិបត្តិ ។ លោកជំទាវថា៖« ការអនុគ្រោះរបស់រដ្ឋាភិបាលលើការបង់ពន្ធអាជីវម្មប្រចាំខែ គឺជារឿងមួយ តែពន្ធប្រចាំឆ្នាំ និងពន្ធនានាដែលប្រតិបត្តិករបានជំពាក់រដ្ឋាភិបាលគួរតែមានការលើកឡើង ព្រោះពេលនេះ ប្រតិបត្តិករទាំងអស់មិនមានចំណូលអ្វីទាល់តែសោះសម្រាប់អាជីវកម្ម » ។
បើតាមការព្យាករកន្លងមក របស់ក្រសួងទេសចរណ៍កម្ពុជាឱ្យដឹងថា វិស័យទេសចរណ៍ក្នុងឆ្នាំ២០២១នេះ នឹងនៅតែបន្តមានកំណើនជាអវិជ្ជមានបន្តទៀត ដោយសារតែរីករាលដាលនៃជំងឺកូវីដ១៩ តែនៅក្នុងឆ្នាំ២០២៣ និង២០២៣ កម្ពុជាអាចនឹងទទួលបានភ្ញៀវទេសចរអន្តរជាតិឡើងវិញ ខណៈក្នុងឆ្នាំ ២០២៣កម្ពុជានឹងធ្វើជាម្ចាស់ផ្ទះនៃការប្រកួតកីឡាស៊ីហ្គេម ដូច្នេះកម្ពុជាត្រូវត្រៀមលក្ខណៈសម្រាប់ទទួល ភ្ញៀវទេសចរអន្តរជាតិនឹងមកដល់នៅពេលជាបន្តបន្ទាប់ ៕
ចែករំលែកព័តមាននេះ