ខេត្តបាត់ដំបង ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវដល់លោកអាប់ភីស៊ីត វេចាជីវ៉ា នាយករដ្ឋមន្ត្រីថៃថា «សុំមេត្តាប្រញាប់ប្រញាល់ ហើយកុំនៅជ្រំជើង ទ្វេភាគី ឬពហុភាគីចង់ថា អីក៏ថាចុះ…»។ សម្តេចតេជោនាយករដ្ឋមន្ត្រី ហ៊ុន សែន បានអំពាវនាវបែបនេះនាព្រឹកថ្ងៃទី១០ មីនា ក្នុងឱកាសអញ្ជើញជាអធិបតីក្នុងពិធីកាត់ឫសសីមាវត្តឯកសុវណ្ណ ហៅវត្តកូនក្អែក និងសម្ពោធអនុវិទ្យាល័យសម្តេចតេជោ ហ៊ុន សែន មង្គល ស្ថិតនៅភូមិកូនក្អែក ឃុំរបស់មង្គល ស្រុកមោងឫស្សី ខេត្តបាត់ដំបង ។
សម្តេចតេជោនាយករដ្ឋមន្ត្រីមានប្រសាសន៍ថា ប្រជុំនៅក្រុមប្រឹក្សាសន្តិសុខដោយមានប្រទេសសមាជិក១៥បូក និង៣មានថៃ-កម្ពុជា និងប្រធានអាស៊ាន ហៅទ្វេភាគីក៏បានស្រេចតែនឹងចិត្ត ព្រោះឡើង១៨ហើយ ។ សំបុត្ររដ្ឋមន្ត្រីការបរទេសឥណ្ឌូណេស៊ី ផ្ញើមករដ្ឋមន្ត្រីការបរទេសកម្ពុជា រដ្ឋមន្ត្រីការបរទេសថៃ ក៏គេផ្ញើទៅរដ្ឋមន្ត្រីការបរទេសចំនួន៧ទៀត ។ តើនោះទ្វេភាគី ឬពហុ…ខ្ញុំអត់យល់ទេ…។ ដល់ថ្ងៃប្រជុំទៅប្រជុំនៅទីក្រុងបោហ្គោ ថ្ងៃទី២៤-២៥ ឥណ្ឌូណេស៊ីអតីតហ្ស៊ីម១ ហ្ស៊ីម២…។
សម្តេចតេជោនាយករដ្ឋមន្ត្រីបានបញ្ជាក់ថាប្រធានអាស៊ានបាន សូមថ្លែងអំណរគុណចំពោះរដ្ឋាភិបាលទាំងពីរដែលបានគាំទ្រសេចក្តីព្រាងក្របខណ្ឌប្រតិបត្តិស្តីពីការដាក់ពង្រាយក្រុមអ្នកសង្កេតការណ៍ឥណ្ឌូណេស៊ី ដែលបានទទួលនូវសំណើដាក់បញ្ចូលមួយចំនួនទៅក្នុងសេចក្តីព្រាងលក្ខខណ្ឌប្រតិបត្តិនោះ ។ ខ្ញុំសូមដាក់ជូននូវលក្ខខណ្ឌប្រតិបត្តិថ្មីដើម្បីពិចារណាប្រកបដោយវិជ្ជមាន និងជាបន្ទាន់ ។
សម្តេចបានលើកមកបញ្ជាក់ថា លក្ខខណ្ឌប្រតិបត្តិលើកមុនកម្ពុជាបានឆ្លើយតបមិនឱ្យលើសពី២៤ម៉ោងឡើយ ។ ឥឡូវយើងបានឆ្លើយទៅហើយ ។ ឥឡូវឥណ្ឌូណេស៊ីបញ្ជាក់ថា តាមពិតខ្ញុំបានទទួលរួចហើយ នូវទីតាំងត្រូវសង្កេតការណ៍ដែលស្នើ ដោយកម្ពុជានូវរបត់ព្រំដែនខាងកម្ពុជាដែលរងផលប៉ះពាល់ ។ ខាងឥណ្ឌូណេស៊ី ខ្ញុំសង្ឃឹមថា នឹងទទួលបាននូវទីតាំងត្រូវសង្កេតការណ៍ពីព្រះរាជាណាចក្រថៃដូចគ្នាដែរ ។
មានន័យថា ខាងកម្ពុជាបានដាក់ទីតាំងចំនួន១៤កន្លែង ឱ្យឥណ្ឌូណេស៊ីសង្កេតការណ៍ក្នុងពេលដែលថៃអត់ទាន់បានដាក់ទេ ។ សំបុត្ររដ្ឋមន្ត្រីការបរទេសឥណ្ឌូណេស៊ីផ្ញើមកកាលពីថ្ងៃទី៨ ហើយមកដល់កម្ពុជា ថ្ងៃទី៩ មីនា ។ នេះជាចំណុចមួយកត់សំគាល់ថា កម្ពុជាបានដាក់ទៅរួចហើយ ទីតាំងសង្កេតការណ៍ ។ ឥណ្ឌូណេស៊ីបញ្ជាក់ទៀតថា ខ្ញុំសង្ឃឹមថា នឹងទទួលបាននូវទីតាំងត្រូវសង្កេតការណ៍ពីព្រះរាជាណាចក្រថៃ ដូចគ្នា ។ ចំណុចទី២ ឥណ្ឌូណេស៊ី បានគូសបញ្ជាក់ថា ឥណ្ឌូណេស៊ី បានត្រៀមខ្លួនដើម្បីធ្វើជាម្ចាស់ផ្ទះ និងផ្តល់ទីកន្លែងសម្រាប់ប្រជុំប្រព្រឹត្តទៅជាប់គ្នា ឬទន្ទឹមនឹងគ្នានៃគណៈកម្មការចំរុះ ដើម្បីខណ្ឌ សីមាព្រំដែនគោករវាងថៃនិងកម្ពុជា JBC និងគណៈកម្មការព្រំដែនទូទៅខាងមុខ ។
ក្នុងទំនាក់ទំនងផ្ទាល់មាត់ជាមួយតំណាងលោកនៅទីក្រុងហ្សាការតា ឥណ្ឌូណេស៊ី បានបញ្ជាក់ពីការត្រៀមខ្លួនរបស់ឥណ្ឌូណេស៊ី ក្នុងការធ្វើម្ចាស់ផ្ទះរៀបចំកិច្ចប្រជុំថ្ងៃទី២៤-២៥ មីនា ឆ្នាំ២០១១ ។ បន្ទាប់ពីនោះខ្ញុំបានយល់ព្រម ពីព្រះរាជាណាចក្រកម្ពុជា ចំពោះសំណើរនេះ ។ ភាគីឥណ្ឌូណេស៊ី ខ្ញុំទន្ទឹងរង់ចាំទទួលចម្លើយជាវិជ្ជមានពីរាជាណាចក្រថៃ ។ សម្តេចតេជោនាយករដ្ឋមន្ត្រីបញ្ជាក់ថា កម្ពុជាឆ្លើយយល់ព្រមហើយ… តែថៃអត់ទាន់ឆ្លើយ ។
កម្ពុជាអំពាវនាវទៅរាជាណាចក្រថៃ ទៅនាយករដ្ឋមន្ត្រីអាប់ភីស៊ីត សូមលោកឆ្លើយឱ្យបានលឿនបំផុតតាមដែលធ្វើទៅបាន អំពីការប្រជុំ ឬមិនប្រជុំ តើឱ្យអ្នកសង្កេតការណ៍មក ឬមិនមកជាជាងមកដាស់តឿនកម្ពុជា ។ កាលពីមុនថៃថា កម្ពុជាគួរតែយល់ព្រម ព្រោះគាត់ព្រមទៅហើយ លុះដល់កម្ពុជាទៅបែរជាថៃថា កំពុងពិចារណា ។ សម្តេចតេជោថ្លែងថា សូមលោកអាប់ភីស៊ីត ឆ្លើយឱ្យរហ័ស ព្រោះ រឿងនេះវាជារឿងក្រុមប្រឹក្សាសន្តិសុខ រឿងអាស៊ាន ។ នៅក្នុងខ្លឹមសារមួយដែលលោករដ្ឋមន្ត្រីការបរទេសឥណ្ឌូណេស៊ី បានបញ្ជាក់បន្តិចទៀតនេះវាមានរយៈពេលមួយខែហើយ តាំងពីកិច្ចប្រជុំមន្ត្រីការបរទេសអាស៊ាន ក្រៅផ្លូវការ ថ្ងៃទី២២ កុម្ភៈ ឆ្នាំ២០១១ ។ ខ្ញុំជឿជាក់ថា យើងទាំងអស់គ្នាបានទទួលស្គាល់នូវភាពបន្ទាន់នៃសកម្មភាពជាក់ស្តែង ។
នេះជាការដាស់តឿនមួយរបស់ប្រធានអាស៊ាន ចំពោះភាគីទាំងពីរ ប៉ុន្តែភាគីទាំងពីរ គឺភាគីមួយ គឺកម្ពុជាបានឆ្លើយតប កាលពីថ្ងៃទី៩ មីនា នូវទំរង់លក្ខខណ្ឌបែបបទថ្មីត្រូវបានទទួលការយល់ព្រមទាំងស្រុងពីសំណាក់ភាគីកម្ពុជា ដោយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសមិនលើសពី២៤ម៉ោងឡើយ ព្រមទៀត ដោយមានការកែប្រែចំណុចមួយចំនួនប្រៀបធៀបនឹងចំណុចមុន គឺល្អទេ មិនមានបញ្ហាទេ ក៏ធ្វើឱ្យថៃកាត់បន្ថយកង្វល់ដែលខ្លួនកំពុងមានកង្វល់ ។
ពាក់ព័ន្ធបញ្ហានេះសម្តេចតេជោបានលើកថា នៅថ្ងៃ នេះពួកអាវលឿងដាក់ញាត្តិទៅទូតឥណ្ឌូ ណេស៊ី និងបាតុកម្មប្រឆាំងនឹងទូតឥណ្ឌូណេស៊ីថា ឥណ្ឌូណេស៊ីមកជ្រៀតជ្រែក ។ តើប្រទេសថៃមានរដ្ឋាភិបាលប៉ុន្មាន? រដ្ឋាភិបាលអាវលឿង? រដ្ឋាភិបាលផ្លូវការ?
សម្តេចតេជោនាយករដ្ឋមន្ត្រីក៏បានលើកមកបង្ហាញនូវចំណុចបន្ថែមកែប្រែ នឹងមិនធ្វើឱ្យប៉ះពាល់ដល់ព្រះរាជាណាចក្រកម្ពុជា និងព្រះរាជាណាចក្រថៃទេ ក៏ដូចជាលទ្ធផលសម្រេចនៃការចរចាស្តីពីការកំណត់សីមាព្រំដែនរវាងព្រះរាជាណាចក្រកម្ពុជា និងព្រះរាជាណាចក្រថៃឡើយ ។ មានអ្នកខ្លះថាព្រម អ្នកខ្លះថាមិនព្រម អ្នកខ្លះថាបើកចំហ អ្នកខ្លះថាគួរតែ… ដូច្នេះកថាខណ្ឌនេះគឺជាកថាខណ្ឌដែលផ្តល់ឱ្យថៃមានភាពងាយស្រួល ។
សម្តេចតេជោនាយករដ្ឋមន្ត្រីគូសបញ្ជាក់ថា ចំណុចដែលអ្នកសង្កេតការណ៍ឥណ្ឌូណេស៊ីមក គឺមិនប៉ះពាល់ទៅដល់អ្វីដែលជាការកំណត់ព្រំដែនរវាងប្រទេសទាំងពីរទេ ព្រោះគេមកពិនិត្យមើលការឈប់បាញ់ កុំឱ្យចោទគ្នាទៅវិញទៅមក។ ដូច្នេះបញ្ហាព្រំដែនវាអត់ប៉ះពាល់អ្វីទេ សូមថៃ កុំបារម្ភ ។
ដោយឡែករដ្ឋាភិបាលនៃព្រះរាជាណាចក្រថៃ ពុំទាន់ដាក់សំណើពីតំបន់សង្កេតការណ៍ទេ។ ដូច្នេះមានន័យថា អ្វីៗស្ថិតនៅលើដៃថៃទាំងអស់ ឥណ្ឌូណេសីុមកបាន ឬមិនបានស្ថិតនៅលើថៃ ។ ដូច្នេះសុំក្រុមប្រឹក្សាសន្តិសុខ អ.ស.ប ក៏ដូចជាអាស៊ាន និងបរទេសទាំងអស់ពិនិត្យមើល តើអ្នកណានាំឆ្ពោះទៅរកការធូរស្រាលតាមរយៈយន្តការត្រួតពិនិត្យមួយរបស់អាស៊ាន គឺ ប្រធានអាស៊ាន ដើម្បីចៀសវាងការប៉ះទង្គិចគ្នាសាជាថ្មីនៃកម្លាំងប្រដាប់អាវុធនៃភាគីទាំងពីរ ។
នេះខ្ញុំបកស្រាយប្រាប់ប្រជាពលរដ្ឋរបស់ខ្ញុំ កិច្ចប្រជុំវាលែងដូចមុនទៀតហើយ ទ្រង់ទ្រាយវាមិនដូចមុនទេ កាលពីមុនប្រជុំតែពីរនាក់ ចុះហត្ថលេខាតែពីរនាក់ មួយមិនគោរព ។ អាងអីដាក់ទៅសភា ឥឡូវរឿងកំណត់ហេតុ៣កាលពីពាក់កណ្តាលខែកុម្ភៈ ថា ចុងខែកុម្ភៈ នឹងឱ្យសច្ចាប័ន ដល់ខែមីនា ថា ចាំពាក់កណ្តាលខែមីនា ចាំឱ្យសច្ចាប័ន…។
សម្តេចតេជោមានប្រសាសន៍ថា ខ្ញុំសង្ឃឹមថា បើការប្រជុំកើតឡើងនៅថ្ងៃទី២៤-២៥ មីនា ខាងមុខនេះ សច្ចាប័នមួយនឹងឱ្យទៅលើកំណត់ហេតុនៃការប្រជុំទាំងបី ។ សម្តេចអំពាវនាវទៀតថា បើមានការចាំបាច់បន្ទាន់ដោយសារឯកសារនេះត្រូវចុះហត្ថលេខាដោយរដ្ឋមន្ត្រីការបរទេស៣ ក្នុងពង្រាងដាក់តាមតួអក្សរកម្ពុជានៅលើឥណ្ឌូណេស៊ី និងថៃ។ បើចាំបាច់ និងបន្ទាន់កុំចាំបាច់ដល់ថ្ងៃទី២៤-២៥ នាំគ្នាទៅទីក្រុងហ្សាការតា ដើម្បីជជែកគ្នាទៅ រួចហើយព្រមព្រៀងគ្នាទៅតាមលក្ខខណ្ឌប្រតិបត្តិចុះហត្ថលេខាតែម្តងទៅក៏វាល្អដែរ ដើម្បីឱ្យធានានូវសុវត្ថិភាពសម្រាប់បទឈប់បាញ់គ្នា ៕
ចែករំលែកព័តមាននេះ