រាជធានីភ្នំពេញ ៖ អាជ្ញាធររាជធានីភ្នំពេញ នៅតែទទូច និងសុំអង្វរដល់បងប្អូនប្រជាពលរដ្ឋ សូមមេត្តាទុកដាក់ និងវេចខ្ចប់សំរាមឱ្យបានត្រឹមត្រូវផង សូមកុំបោះសំរាមចូលក្នុងប្រឡាយ ព្រោះវាបណ្តាលឱ្យកកស្ទះប្រពន្ធ័ផ្លូវទឹក និងបង្កឱ្យលិចលង់ដល់យើងទាំងអស់គ្នា។
រដ្ឋបាលរាជធានីភ្នំពេញ ក្រោមការដឹកនាំរបស់ លោក ឃួង ស្រេង អភិបាលរាជធានីភ្នំពេញ បានយកចិត្តទុកដាក់យ៉ាងខ្លាំងក្នុងការកសាងហេដ្ឋារចនាសម្ព័ន្ធនានានៅក្នុងរាជធានីភ្នំពេញ មានទាំងការស្តារប្រឡាយ លូ ការស្ថាបនាលូថ្មីៗជាដើម ដើម្បីសម្រួលផ្លូវទឹកហូរ កាត់បន្ថយការលិចលង់ភូមិដ្ឋានប្រជាពលរដ្ឋ។
ជាក់ស្ដែងសម្រាប់ពេលនេះ ក្រុមការងាររបស់រាជធានីភ្នំពេញ បានធ្វើសកម្មភាពស្តារសំរាមនៅប្រឡាយបឹងទំពុន ក្នុងគម្រោងថែទាំជាប្រចាំ ដើម្បីសម្រួលផ្លូវទឹកហូរ កាត់បន្ថយការលិចលង់នៅរដូវវស្សាខាងមុខនេះ ។
លោក ដួង ចាន់សារ៉ាត់ ប្រធានអង្គភាពលូទឹកបូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញបានឲ្យដឹងថា ក្រុមការងារអង្គភាពលូទឹកបូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញ ក្រោយពីមានការណែនាំពីលោក ឃួង ស្រេង អង្គភាពលូទឹកបូមទឹក បានការងារស្តារប្រឡាយបឹងទំពុនជាប្រភេទប្រឡាយមេមានប្រវែង៣៧១០ម៉ែត្រ គិតចាប់ពីស្ពានស្ទឹងមានជយ័និងមានទទឹង៣០ម៉ែត្រ តភ្ជាប់ទៅកាន់ស្ថានីយបូមទឹកបឹងទំពុន ។ លោកបន្តថា ការងារថែទាំស្តារប្រឡាយនេះបានអនុវត្តន៏នៅថ្ងៃទី៥ មេសា ឆ្នាំ២០២១ និងបានបញ្ចប់នៅថ្ងៃទី៧ ឧសភា ឆ្នាំ២០២១ ជាលទ្ធផលស្តារស្មៅត្រឹបសំរាមនិងភក់បានចំនួន ៤៥៥០ម៉ែត្រគូប ឬស្មើនឹង៦៨២៥តោន។
លោកដួង ចាន់សារ៉ាត់ បានសូមឲ្យបងប្អូនប្រជាពលរដ្ឋមេត្តាទុកដាក់សំរាមឲ្យបានត្រឹមត្រូវកុំបោះសំរាមចូលក្នុងប្រឡាយ ចូររួមគ្នាថែរក្សារបរិស្ថានទីក្រុងយើងទាំងអស់គ្នាផង ៕
ចែករំលែកព័តមាននេះ