រាជធានីភ្នំពេញ ៖ លោកវរសេនីយ៍ឯក ម៉េង វិមានតារា អធិការខណ្ឌមានជ័យ នៅថ្ងៃទី០៩ ឧសភា ២០២១ បានចេញសេចក្តីប្រកាសបដិសេធទាំងស្រុងចំពោះការផ្សព្វផ្សាយព័ត៌មានមិនពិត…
រាជធានីភ្នំពេញ ៖ លោកវរសេនីយ៍ឯក ម៉េង វិមានតារា អធិការខណ្ឌមានជ័យ នៅថ្ងៃទី០៩ ឧសភា ២០២១ បានចេញសេចក្តីប្រកាសបដិសេធទាំងស្រុងចំពោះការផ្សព្វផ្សាយព័ត៌មានមិនពិត និងស្នើឲ្យបុរសម្នាក់ជាម្ចាស់ទូរស័ព្ទលេខ 069 359757 រួមទាំងបុរសម្នាក់ទៀតឈ្មោះ«ឈឹម» ជាម្ចាស់គណនីហ្វេសប៊ុកឱសថបុរាណភ្នំទ្រទ្រង់ បញ្ឈប់សកម្មភាពនេះជាបន្ទាន់ នឹងធ្វើការបកស្រាយ សុំទោសជាសាធារណៈ បើមិនដូច្នោះទេ លោកអធិការខណ្ឌមានជ័យ និងចាត់វិធានការតាមផ្លូវច្បាប់ជាធរមាន ។
លោកអធិការខណ្ឌមានជ័យ ព្រមានបែបនេះ បន្ទាប់ពីម្ចាស់គណនីហ្វេសប៊ុកឈ្មោះ«ឈឹម»(រហ័សនាមដែលអ្នកលេងហ្វេសប៊ុកផ្តល់ឲ្យ) បានបង្ហោះវីដេអូ កាលពីល្ងាចថ្ងៃទី០៨ ឧសភា ដោយដាក់ចំណងជើងថា (រឿងពិត មិនមែនសម្តែង បុគ្គលម្នាក់ខលមកខ្ញុំផ្ទាល់(ពូឈឹម) ហើយតាំងខ្លួនជាអធិការខណ្ឌមានជ័យ ! សូមស្តាប់ទាំងអស់គ្នា ហួសចិត្ត ហ៊ានណាស់) ។
ជាក់ស្តែងវីដេអូដែលមានរយៈពេលជាង៩នាទី បង្ហាញអោយឃើញថា មានជនមិនស្គាល់មុខម្នាក់ ដែលបានប្រើប្រាស់លេខទូរស័ព្ទ 069 359757 បន្លំខ្លួនជាអធិការខណ្ឌមានជ័យ ដោយបានទូរស័ព្ទទៅគម្រាមបុរសម្នាក់ទៀតឈ្មោះ«ឈឹម» ជាម្ចាស់គណនីហ្វេសប៊ុកឱសថបុរាណភ្នំទ្រទ្រង់ តាមរយៈវីដេអូនេះ លោកអធិការខណ្ឌមានជ័យ ពិនិត្យឃើញថា ការផ្សព្វផ្សាយនេះ ជាការបំភ្លៃខុសពីការពិតទាំងស្រុង ។
ម្យ៉ាងវិញទៀត នៅក្នុងវីដេអូនេះ ម្ចាស់គណនីខាងលើ គឺបានទាញយកឈ្មោះលោកអធិការខណ្ឌមានជ័យ ជាច្រើនលើក ច្រើនសារ ឲ្យចូលមកពាក់ព័ន្ធក្នុងសាច់រឿងរបស់ខ្លួន ដោយទង្វើទាំងនេះ មានចេតនាធ្វើឲ្យប៉ះពាល់ដល់កិត្តិយស សេចក្តីថ្លៃថ្នូរ របស់លោកវរសេនីយ៍ឯក ម៉េង វិមានតារា និងកិត្តិយសរបស់កងកម្លាំងនគរបាលជាតិទាំងមូល ដែលបច្ចុប្បន្នកម្លាំងទាំងអស់កំពុងតែមមាញឹក យកចិត្តទុកដាក់ ក្នុងកិច្ចប្រត្តិបត្តិការរក្សាការពារសន្តិសុខសណ្តាប់ធ្នាប់សាធារណៈ និងសុវត្ថិភាពសង្គម ជាពិសេសក្នុងយុទ្ធនាការប្រយុទ្ធប្រឆាំងនឹងការឆ្លងរាលដាល នៃជំងឺកូវីដ-១៩ ។
ពេលនេះ សមត្ថកិច្ចជំនាញ កំពុងតែស្រាវជ្រាវរកម្ចាស់លេខទូរស័ព្ទ ដែលបន្លំខ្លួនជាអធិការខណ្ឌមានជ័យ ក៏ដូចជាម្ចាស់ផេកឱសថស្ថានបុរាណ ភ្នំទ្រទ្រង់ ដើម្បីចូលខ្លួនមកបកស្រាយបំភ្លឺលើករណីបន្លំខ្លួនជាលោកអធិការនេះ ផងដែរ ៕
ចែករំលែកព័តមាននេះ