ភ្នំពេញ៖ កម្លាំងសមត្ថកិច្ចនៃស្នងការដ្ឋាននគរបាលរាជធានីភ្នំពេញ សហការជាមួយនឹងកម្លាំងសមត្ថកិច្ចខណ្ឌមានជ័យ បានដាក់គោលដៅ អនុវត្តបំរាមគោចរតាមសេចក្តីសម្រេចថ្មីរបស់រដ្ឋបាលរាជធានីភ្នំពេញ កាលពីវេលាម៉ោង ៨យប់ ថ្ងៃទី៧ ខែឧសភា ឆ្នាំ២០២១ ត្រង់ចំណុចច្រមុះជ្រូកក្បាលថ្នល់ ក្នុងសង្កាត់ចាក់អង្រែលើ ខណ្ឌមានជ័យ។
ប្រតិបត្តិការអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ដឹកនាំបញ្ជាផ្ទាល់ដោយលោកលោកឧត្តមសេនីយ៍ទោ ទិត វិសិដ្ឋ និងលោកឧត្តមសេនីយ៍ទោ ប៊ុន សុសិក្ខា បានដឹកនាំកម្លាំងចុះត្រួតពិនិត្យ និងអនុវត្តវិធានការធ្វើដំណើរ សម្រាប់តំបន់លឿងទុំ និងតំបន់លឿង ចន្លោះពីម៉ោង ៨យប់ រហូតដល់ម៉ោង ៣ភ្លឺ តាមសេចក្តីសម្រេចលេខ១០០/២១ សសរ ចុះថ្ងៃទី៥ ខែឧសភា ឆ្នាំ២០២១ របស់រដ្ឋបាលរាជធានី សម្រាប់រយៈពេល ៧ថ្ងៃ ដែលគិតចាប់ពីថ្ងៃទី៦ ខែឧសភា ដល់ថ្ងៃទី១២ ខែឧសភា ឆ្នាំ២០២១។ ជាលទ្ធផល បន្ទាប់ពីការអនុវត្តបំរាមគោចរ កម្លាំងសមត្ថកិច្ច បានធ្វើការឃាត់ម៉ូតូ ដែលល្មើសបានចំនួន ៦គ្រឿង។
ក្រោយពីបញ្ចប់ប្រតិបត្តិការម៉ូតូចំនួន ៦គ្រឿង ត្រូវបានសមត្ថកិច្ច ដកហូត យកទៅរក្សាទុកនៅអធិការដ្ឋាននគរបាលខណ្ឌមានជ័យ និងបានឲ្យម្ចាស់ម៉ូតូ ទៅធ្វើចត្តាឡីស័ក នៅផ្ទះចំនួន ១៤ថ្ងៃ ទើបអាចមកយកម៉ូតូត្រឡប់ទៅវិញបាន៕
ចែករំលែកព័តមាននេះ