ភ្នំពេញ៖ កម្លាំងសមត្ថកិច្ច ចម្រុះបន្តអនុវត្តបំរាមគោចរ នៅរង្វង់មូលកងព្រហ្ម ខណ្ឌជ្រោយចង្វារ ដោយឃាត់មនុស្សបាន ៣៣នាក់ ក្នុងនោះ ស្រី ៧នាក់។…
ភ្នំពេញ៖ កម្លាំងសមត្ថកិច្ច ចម្រុះបន្តអនុវត្តបំរាមគោចរ នៅរង្វង់មូលកងព្រហ្ម ខណ្ឌជ្រោយចង្វារ ដោយឃាត់មនុស្សបាន ៣៣នាក់ ក្នុងនោះ ស្រី ៧នាក់។ ប៉ុន្តែសមត្ថកិច្ច គ្រាន់តែពិន័យ ដោយអោយរត់ ជុំវិញរង្វង់មូលកងព្រហ្ម ១០ជុំ សម្រាប់បុរសៗ។ ចំណែកស្រីៗ អោយរត់ ៥ជុំ ទើបអោយត្រឡប់ទៅផ្ទះវិញ។
លោក កែវ សារ៉ាវុធ អភិបាលរង ខណ្ឌជ្រោយចង្វារ បានអោយដឹងថា លើកនេះ គ្រាន់តែធ្វើការអប់រំអោយពួកគាត់ទាំងអស់ រត់ជុំវិញរង្វង់មូលកងព្រហ្មតែប៉ុណ្ណោះ តែបើពួកគាត់ ឆ្លងកាត់លើកក្រោយទៀត និងមិនគោរពវិធានការបំរាមគោចរ ដោយគិតចាប់ពីម៉ោង ៨យប់ រហូតដល់ម៉ោង ៣ទៀបភ្លឺនោះ គឺនឹងត្រូវពិន័យតាមច្បាប់ហើយ។ ពួកគាត់ទាំងអស់ ត្រូវអនុវត្តន៍ ដោយត្រូវចូលផ្ទះអោយបានមុនម៉ោង ៨យប់ ដើម្បីគោរពតាមបំរាមគោចរ។ លើកនេះ គ្រាន់តែអោយរត់ប៉ុណ្ណោះ ដោយសារតែបងប្អូនប្រជាពលរដ្ឋខ្លះ គាត់មិនបានដឹង។
ដួចនេះ ដើម្បីអោយបងប្អូនប្រជាពលរដ្ឋយើង ចូលរួមគោរពច្បាប់បំរាមគោចរទាំងអស់គ្នា ដោយសាលារាជធានីភ្នំពេញ បានដាក់ចេញមកអោយតាមបណ្ដាខណ្ឌទាំង ១៤ ចូលរួមគោរព និងអនុវត្តន៍ទាំងអស់គ្នា ដើម្បីចូលរួមទប់ស្កាត់ការរីករាលដាលនៃជំងឺកូវិដ១៩ផងដែរ។
ក្រោយពីបងប្អូនប្រជាពលរដ្ឋ ដែលសមត្ថកិច្ចឃាត់បាននោះ គឺតម្រូវអោយរត់ជុំវិញរង្វង់កងព្រហ្មគ្រប់ចំនួនហើយ និងត្រឡប់ទៅផ្ទះវិញ និងប្រាប់ថា កុំអោយមកឆ្លងកាត់ទៀត បើមិនស្ដាប់ទេ ឃាត់លើកក្រោយ សមត្ថកិច្ចនឹងចាត់ការតាមច្បាប់ ដោយមានការពិន័យជាប្រាក់ផងដែរ៕
ចែករំលែកព័តមាននេះ